Jeden od nestareših zanatov na sveto je gledanje prek blanjki, očem reči, prek ograde k sosedima. Kaj sosed ima, kaj dela, kak dela, s kim to dela i još hajdi sakefele drugoga. K sosedo se gledalo dok ga niti ne bilo blanjki. Navek so nam pripovedali kak je sosedova trava bole zelena, sosedova krava je vekša i bolša, a kcoj još doji par litri mleka vejč, sosedove kokoši so navek nesle vejč jejci od naših i se so bile debleše, kaj nem pripovedal kak so sosedovi pajceki navek bile debleši i meli so deblešega špeha kaj je negda bila mera za pajcek. Ak se to tak vagalo unda je čistam normalno da je i sosedova sneha bila mlajša, lepša, bole lopošnata i bole frčna od naše, a stopram se je to bilo ak je bila hajdi mlajša ili pak je došla z grada pak se je znala zrihtati: složiti frizuro, počesati, našminkati, kaj nem spominjal male voske hlačice i lajbeke šteri so vejč otkrivali nek skrivali. Ve vidite o ovomo zadjemo bi štel par reči napisati. Več smo rekli kak smo mi sosedi furt gledali, očem reči, furt nam je oko bežalo prek blanjki kaj smo se znali ravnati je li naše gazdinstvo vredi vejč ili meje od sosedovoga, I otod je se počelo. Stari ljudi so rekli kak si navek moramo biti zdobra z sosedima i to bole nek z familijom jerbo nam je sosed vu semo prvi ak se nam pripeti kakša nevola. Toga smo se navek držali i sosedima smo se seposot parili. Po cele dneve smo skupa delali, očem reči, jeni smo drugima pomagali dok se je sadil kalamper, dok se je sejala kuruza, dok se je kopal kalamper ili pak kuruza. Unda je i čistam normalno bilo kaj smo skupa hodali i redit kuruzo, sušit i spravljat seno, otavo… A i žetvo smo navek skup zbavljali. I se fešte smo meli skupne: rođendane, gostuvanja, prve pričesti, ferme kaj se dece dotikavle, a i fešte so navek bile dok so se krave stelile ili pak prasice sprasile ili pak dok je kvočka zvalila vejč od petnaest picekov.
V nedelo se je nigdar ne v zemli rovalo i nejso se delali teški posli. Bil je to den Gospodnji, pak smo se si svegtešje sprajli i išli smo k meši, a posle smo se, do obeda, podružili z kavom, čajom ili pak smo sprobavali kolače ili pak prfkače štere je gazdarica na stol dela predi nek je obed bil gotov. Unda smo meli čas gledati jeni druge i kaj smo se upoznali i kaj smo zazvedili što je kaj, što je koga i kuliko vredi. Tu so nejglavneše bile stare mame ili pak mamice i jivim preštimanim očima je nikaj ne moglo pobeči. Dok so ljudi, a i žene meli čas unda so se i oni počeli pariti, onda se je moglo videti što je na koga oko hitil, što je komo fajni, što je komo po volji i što bi z kim štel nekaj meti. Te skrite želje so nekak po skrivečki dohajale do izražaja dok so se kuruze trebile, očem reči, luščile.Unda se je znalo pripetiti kaj so dečki ili pak več moži znali spod pod luščijom pustiti roko malo dale tak da so žene zahačili po kolenima ili pak nedaj Božek još malo globleše i ak so puce, žene ne podmeknule ono kaj je roka stisnula unda je posajeni kamen temeljac za druženje ili pak švaleraj šteri je stoga mogel ziti. Tak vam je to bilo negda, još zdavnja dok je greh bil ak je čovek sam pomislim kaj bi s deklom (čitaj: pucom) štel nekaj meti. No, šteli imi to priznati ili ne , ali od kuruze i z luščija je se počelo. V luščijo je to počelo po skrivečki i zazvedilo se je kak bi jen i druga šteli meti nekaj skupa, ali je trelo hajdi cajta dok je do toga došlo. Na grunto je navek tak bilo da mamičino oko se okoli gledi i se vidi i nikaj mo se ne dalo skriti. Velijo stareši da se je niti na parmo ne moglo oditi, a kaj mamica ne bi došla glet kaj se tam dela. To sam vam spripovedal kaj bodete znali da so postavleni kameni temeljci za nejstareši zanat na sveto.
Denes ga čuda več priliki za to no ne znači da se čuda vejč toga i dela. A mortik se i dela da znamo da so jako srditi oni šteri so ne ožejeni, a još bole oni šteri so ožejeni ili kak veli sosed Tonča; oni šteri so nutri (ožejeni), oni bi vum, a oni šteri so vuni oni bi nutri. Za to je zmišlena jena fajna izreka štera veli: Ak se bodeš oženil ili pak bodeš ostal ledičen sikak bo ti žal! Verjem da ona denes več ne vredi jerbo denes i ovi ledični hodajo od hiže do hiže i lohnijo med ženskimi nogami, a niti ne pitajo je li je srce fraj.
Kaj reči, denes se mladi jako kesno ženijo, ali se zato fčasi rezidejo. Nikak nebrem razmeti da deset let skupa hodajo i živijo, a unda da se oženijo unda se ne poznajo. Brzčas se posle tulikši let zavolijo jeden drugoga i odidejo k „sosedo“ de je se mlajše i bolše. Bar tak dugo dok se ne sproba. Ne bi vam znal reči što je zmislil i zafremal to sprobavanje puci predi gostuvanja? Ne znati što nebre zdržati dečki ili pak puce. Najbrž so puce te štere jemlejo stvari vu svoje roke, Barika je priznala: Da sam ja na Jožeka čakala niti deco ne bi meli. Morem vam reči da te ljucke posle delajo i jeni i drugi, očem reči, i moški i žene i nikak sam ne uspel zazvediti što je to prvi počel.
- Čiji si ti mali? Ja i tata ne znamo, a mama neče reči!
Morem vam reči taman se je se posložilo v tem moški – žena odnosima i hajdi se je posli delalo vu fušo, a unda so došli mobiteli. Negda so krčmarice i natakarice bile glavne vu tem poslo jerbo saki drugi se je za jiv zahačil. Dobro so zgledale, navek so bile napete, vesele i prepravlene za saki posel, a denes dojdem v krčmo, pet dečki je naslijeno na šanko, saki drka po svojemo mobitelo, a sam ja gledim konobarico v pišek, bregece ili pak v mađerkin breg. To sam več parpot doživel tak kaj sam moral oditi k doktoro vu Vrapče pitat je li sam ja normalen.
Moram vam spripovedati kak je naš Pišta zišel kak zet vu Varaždino. Dobil je stana na Banfici na šestomo kato, a črez dva-tri mesece se je vu isti soliter doselili i Feri, pajdaš z posla. Bili so si pajdaši na poslo, a i doma so se družili. Črez par let je Feri zbetežel i kak se to veli, prek noči, je hmrl. Pišta je unda dohajal k sosedi Bariki na tretji kat da je ova kaj nucala: strujo je popravljal, šporhote slagal, vodovoda… i tak mic po mic počel je Ferija mejati i posteli. Pasalo Bariki, pasalo Pištijo. I črez jen cajt je Barika prosila Pištija kaj bi bil par dni bil pre joj po cele dneve i noči. Kak je Barikina centrifuga bila bolša od Maričikine doma Pišta je pristal. Zrihtal si je službenoga pota, no, tak je bar doma rekel, i odišel je na službeni pot z šestoga na tretji kat. Se bi to bilo vredo da je Pištijo ne bilo dosadno pak je tretji den smetje nesel v kontejner z Barikinoga stana, a dok je išel nazaj je mesto kaj bi na tretjemo kato postal otpelal se na šesti. Pozvonil je na svoja vrata, otprla mo je Marika, dok ga je spazila zapitala ga je: – Pak de se bil? – Kaj desam bil, pak sam smetje odnesel. Kak je to se na se zadje završilo ovi z hitne nečejo reči!
