Sosedi Janezi so ne zebrali Janeza
Jako je malo vode preteklo spod pod mostom naše čakoske Trnave od dneva da so naši prvi sosedi Janezi v Deželi hodali glase davat i zbirali so svoje SLO parlamentarce. Več se na pre šepetujilo da bodo se za pobjedo borili (čitaj: foteljo premijera) demokrat, desničar i dofčerašji premijer Janez Janša i levičar (Pokret sloboda) Robert Golob. Ne znati kaj so Janezi meli na pameti (ili pak figo v žepo kak mi Međimorci) dok so hodali glase davat? Je li so zbirali po frizuri, je li so svoje glase davali onomo što ima vejč lasi, ali dok so se listeki i glasi prebrojili pobednik je bil Robert Golob, a Janša je pak odišel po riti k meši.
Kaj reči za nas v Lepoj našoj, za nas v Međimorjo, za koga smo mi drukali? Znate kaj, nebremo reči da smo ne zalukavali prek meje jerbo smo bili jako najgerek je li bode Janša i dale ostal glavni i prvi Janez ili pak to bode Golob? Naši levičari, (čitaj: antifašisti) so drukali za Goloba, a oni z druge strane vulice so i dale bili za Janšo. Znuomo kak je zišlo, a ve pak si mi premišlavlemo je li je Robi bolši za nas ili pak bi bilo čuda bole da je i dale ostal Janša.
Šteli mi to priznati ili ne, ali najbrž smo i mi, skupa z Janšom, v kmico fritnoli i odišli po riti k meši. Vidim da me malo čudno gledite i spituvlete me kaj mi itak imamo z sosedima Janezima, kaj mi imamo z jivim parlamentom, kaj mi imamo z jivim premijerom? Nekaj se je itak spremenilo v Deželi da se je Joško Joras zbudil i znova oglasil kaj je ne ruon dober znak da znomo kakše smo, pred dosti let, meli probleme žnjim. Probajte se sam zmisliti kuliko pot je on selil mejo Dežele po Lepoj našoj, ali dok je došel Janša unda se je smiril i več hajdi dugo smo nikaj ne čuli za jega. Još nekaj, si znuomo kak se mi v Lepoj našoj prepravlamo kak bodemo prevzeli šengena, očem reči, glavno mejo z Evropom, ali ak to očemo unda sosedi Janezi morajo dati svojega blagoslova jerbo so ve oni glavni porteri v Evropi. Još se je Robi Golobov niti ne pravzaprav sel vu foteljo premijera več se navelikom pripoveda kak bodo Janezi dali šengena Lepoj našoj ak mi „vrnemo“ našo Savudrisko valo kaj bode Piranski zaljev. No, to je još niti ne se, još bodemo morali postiti ribiče z Dežele kaj bodo lovili po našemo morjo kuliko god bodo šteli. Kuliko vidimo hajdi toga sega se išče za šengen.
Morem vam reči da sosedi Janezi pak puljkajo vodo na svoj melin (kak i navek). Nikaj se ne spominajo, a još meje ravnajo doli z Svete Gere i kaj bi več jempot pustili toga našega breščajka kaj si mi gori zafremamo svoje „vidikovce“, a ne kaj se šepurijo i gospodarijo na našemo hataro. Ve vidite da je bil mir i to na leta dok je desničar Janša hercuval v Deželi, a čim je došel levičar i poštejak (?) mam se je počelo trguvati z onim kaj je naše i kaj je nigdar ne bilo sosedovo. Najgerek sam, jako sam najgerek kak bode itak to se zišlo? A neje malo naših ljudi šteri so drukali za Goloba i pajdašijo!
Što je itak bolši, žene ili pak moški??
Kaj reči, furt i navek se mi moški, a i naše žene navek ftičemo što je bolši v kaj kakšim poslima. Još se niti točno ne zna što je bolši v kuhji z nožom, mlinčekom i kohačom, a ne kaj bi se znalo negdi drugdi. Negda se je znalo da je kuhja ne mesto de ono kaj znajo moški dolazi do izražaja, ali vremena so se spremenila pak kaj de najdemo moške v kuhji z fortofom na svojemo sklesanomo moškomo rušto i z kuhačom v roki. Nebremo reči da so tu žene spametneše, ali so prefrigane, rajši magadijo kaj moški kuhajo, još jif i falijo, sam kaj to ne morajo delati. Znate kak je to, dok moški jempot dajo daljinskoga z rok i primejo se kuhače več nigdar ne dojdejo na red kaj bi znova gospodarili z daljinskim.
Hajdi pot je bil spominek o tomo što je bolši šofer moški ili pak žene? Morem vam reči da sam još niti jempot ne čul kaj bi žene priznale da so one hujše, ne one dopuščajo moškima kaj vozijo, ali ne zato kaj so one hujše nek zato kaj je to moški posel, a posebno unda dok se nekam dale ide. Rekel sam vam več kak so žene prefrigane i jim je čuda leži dremati polek šofera nek voziti od hiže do debele vode. A moški se držijo za korman kak pijanec za plot i unda dok se pelajo dimo z goric jerbo se bojijo ak jempot dajo kormana z rok več nigdar ga ne bodo dobili nazaj kak je to zišlo z kuhačom i daljinskim.
Jako mi je to bilo lepo prečitati kak je Vesna Sobočancova štera vozi autobusa priznala kak joj je nejlepši znak: Janjetina 15 kilometri. Mortik so žene ne bolši šoferi, ali so pošteneše i priznajo kaj očejo, očem reči, kaj jim paše. Da ste čuli šteroga moškoga da je priznal da mo je nejlepše voziti, i da bi to delal saki den, po Vinskoj cesti. Ak bodete moškima žile rezali, ali ne bodo priznali da jiv sploh nekaj v brege i v gorice i pelnice vleče. Si znajo da je tak, ali moški nečejo priznati.
Prinas se je pripetilo…
Pripetilo se je prinas v Međimorjo i to v Štrigovi v glavni vulici. Došel je sosed Tonča alkoholno zmuočeni k sosedo Štefini i mam z vrati ga zapita: – Dober večer, sosed. Pre meni doma je sfalilo vino pak sem došel pitat i glet je li je to sam pre meni doma sfalilo ili pak je zginulo v celoj vulici?
Mi Mađerki dali brega, a oni bi i morje
Mi Međimorci jako dobro znuomo da imamo breščajka polek Štrigove, očem reči, polek Banfija šteroga zovemo Mađerkin breščajek. Te breščajek je tu od zdavnja i si se mi spominamo o Mađerki štera je negda hercuvala po štrigoskim goricama i kletima, očem reči, bregecima i jačkicama. Kakše je tua Mađerka mela bregece i jačkico to nebremo znati jerbo je zdavnja več odišla k Božeko na račun, ali je brzčas bila na dobromo glaso kak ona tak i jena pečkica oliti jačkica. Ne bi se ve znova o joj spominal da je ne sosed Orban pak z šublata vum zvlekel prašnato i na pol strgano karto negdašje Velike Mađarije i ve bi štel kaj bi ovo naše morje, naša debela voda, naš Jadran bil jiv. No, to more sam senjati i to ne sako noč. A mi Međimorci znuomo da ga ne bilo Zrinskih, Nikole Šubiča, Nikole Čakovečkoga i Petra još bi Mađari dendenes bili pod Turkima. A za Mađerkom je sam breščajek ostal i lepi spominki, dece ga ne bilo.
