Pred nami so prvi izbori

Kaj smo se mi Međimorci zamerili Peđi Grbino?

Brojimo zadje dneve pred nove izbore za nove ili pak več ponucane sabornike. Kak moji vnuki velijo, još se pet pot stanemo i išli bodemo znova glase davat. Mortik još navek ne znuomo točno komo bodemo svojega glasa dali, ali čim zazvedimo komo na bodemo dali unda si bodemo čuda leži zbrali onoga šteri je vreden kaj mo damo svojega. A nega jiv preveč. Kak i navek si se borijo za fotelje vu Saboro i ak dojdo do fotelji jim bode dobro, a kak bode nam biračkomo telo to jim je zadja briga. Tuliko sega se obečuvle kaj niti moja teca Franca nebre se zapamtiti, a niti pak zapisati. A zakaj? Zato kaj političari čuda fletneše obečuvlejo nek teca more pisati. I još nekaj, teca, makar je mlajša i od Bude Lončara i od Jože Manoliča, slabeše čuje pak unda nebre niti se zazvediti kaj političari obečavlejo. Kaj bodem vam rekel, nesam niti ja se zapamtil kaj nam obečavlejo, a to sam zato kaj jiv niti ne poslušam. A zakaj jiv ne poslušam? Preveč let imam kaj bi magadil kaj bi oni z mene hrmaka delali. Zapamtil sam jedino kaj nam je obečal prvi i nejvekši SDP-ovec Peđa Grbinov. On se dojde k nam v Međimorje falit kak bode zapral našo županijo i kak bodo naši međimorski političari morali svoje županiske puške hititi v kuruzo. I ne sam to, još oče kaj mo mi za to jegovo željo svoje glase damo. Ak mene pitate on je v kuruzo vritnol, a naši ga političari podržavlejo. Nebrem razmeti Peđo, a još meje naše političare. Nekaj meje od sto let smo čakali (od 1919. leta) kaj dojdemo na svoje, a ve Peđa oče kaj bo z našim hatarom, z našim “Falačkom med dvemi vodami” gospodaril nešči drugi. Ak bodemo za to glase dali unda smo mi ne kak tre.

Štel sam vam pravzaprav reči da so pred nami prvi izbori šteri so ne v nedelo kak to dragi božek zapoved nek v delaven den i to v sredo. A si znuomo da je odnavek bil v sredo sejam v Čakovco, a ve pak bodo izbori i to ne sam v Čakovco nek po celoj Lepoj našoj.

Što je itak SDP-ovcima slagal izborne listeke

Najte me krivo razmeti, ali moral sam hititi oko i na Peđin listek jerbo me je navlekel čim je svojega i SDP-ovoga izbornoga programa napravil brez naše Međimorske županije. Ve se on zgovarja na Istarsko županijo i kak bi tam trelo reda naprajti. Predi bode Peđa mel sero brado, kak moj vrtni sosed Tonča, nek bode Istra ostala brez županije. Pak si ne grunta Peđa da smo mi Međimorci to popušili? Istina Božek da smo malo na svojo roko, ali tak smo hurmasti brzčas ne! Štel sam još sam pitati kak je naša Lana Remarova došla na listek spod pod soseda Ratkija Čačičovoga? Ona je čuda mlajša i fajneša od Ratkija, ona je v uspono, a on več ide pomalem prema zalazo? Najbrž je i v politiki važno minulo delo.

Kam bodo tekle reke, a kam potoki?

Kak sam vam več rekel minuli tjeden, makar je več hajdi dugo prinas v Lepoj našoj ne bilo dežđa i moglo bi se reči da je tu med nami i mala prtuletna suša, ali “reke i potoki pravice” saki den tečejo. Negdi brže, negdi pomeje, a negdi nikak. Da je ljubičica bela med nami on bi najbrž pak rekel: predi bodo “reke i potoki pravice” tekli nazaj, očem reči, v rikverc nek bode SDP, Moremo, Dalija, Fronta, Kata i Anka Mrak Taritaš pobedili na izboraj!

Naš međimorski “potok pravice” (čitaj: potok Trnava) nema još niti jeno kap pravice, očem reči korito mo je presušilo i to več zdavnja.

Labodoritaši ruon tak imajo svojo pravico

Minule dva tjedne se je i labodoritaška pravica skazala. Nejpredi so Dinamovci pobedili na Poljudo “bele ftiče” i to dva pot za redom. Nejpredi je bilo 1:0 za Dinamo vu prvenstvo, a za tri dni je v Kupo bilo ruon tak 1:0 i to pak za Dinamo. Ne moram vam niti pripovedati, najbrž ste vidli kak so se tribine v Splito ne stepale nek restepale i to tak kaj so posle kurili žnjimi i delali nereda po celomo grado. Nastradali so i auti šteri so ne nikaj krivi. Dinamovci so još ne odišli iz Splita , a fotelje trenera Mislava Karoglana i precednika Lukše Jakobušiča so se več navelikom nuhale i stepale, ali točko na i je dela Reka i to na Rujevici de se je labodoritaška pravica skazala. Očem reči i Reka je pobedila Ajdukovce tak da “beli ftiči” morejo sam sejati kaj bodo, i to posle 20 let, znova prvaki Lepe naše. Kaj bi rekli Dinamo je zmenil precednika Ajduka Lukšo Jakobušiča, a Reka trenera Mislava Karoglana, očem reči, labodoritaška reka pravice se skazala na Rujevici.

Što bo pobedil na izboraj?

Što bode itak pobedil na izboraj? Jeni bodo glase davali, drugi bodo jiv brojili, tretji zbrajali, a četrti oduzimali. I dok se to se dene na kup, dok se se preseja črez ovakše ili pak onakše sito i rešeto pobednik bode on šteri ostane na nogami. Još navek se pripoveda i to saki pot znova kak na izboraj ne odlučivlejo birači nek brojači, pak bode i ovo sredo najbrž tak.

Dok se presejamo kaj nam se vu ove predizborne dneve nudi dojdemo do toga kak nam HDZ-ovci pripovedajo kak smo nigdar ne bole živeli nek ve dok oni hercujejo z Lepom našom, a to kaj nam benzin i nafta saki tjeden ido gori to so ne oni krivi neg je kriv svecki sejam. Čim nam SDP-e oče zeti županijo jiv sam mam del na stran. Milči Pupavac se fali kak je on nejbolši komšija nam sosedima, a jemo pašejo sam naši ojeri ruon tak kak so mo do fčera pasale “ustaške” kune protiv šterih je ratuval, a mi pak bi se šteli Pupija rešiti jerbo nam dela preveč problemov, a sam je nacionalna manjina. Kajtazi oče i dale biti prvi do državne kase za manjine. Oni kaj se Morejo nudijo reda kak so v Zagrebo naprajli, a po Zagrebo morate z maskama hoditi ne zbog korone neg zbog hude duhe. Ak bodemo po istini govorili Domovinski pokret je novi veter šteri je zapuhal na našoj političkoj pozornici, a ve smo mi na redo je li jim bodemo dopustili kaj nam pokažejo kaj morejo i znajo.

Srečno si nam v sredo i prosim vas pamet v glavo i mesto na sejam kaj genete glase davat. Posle se najdemo pre Mitrici na semo!

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE