Kaj se nam je itak politika zamerila?
Najte me krivo razmeti, ali ja vam tu nikaj ne razmem, ne sam da ja nikaj ne razmem, niti teca Franca je ne bolše sreče. Znate kuliko je vur da je teca došla mene pitat kaj je to z našim ljudima, z našim Međimorcima, kaj se je još nišči ne prijavil za župana, a sam je dva mesece do novoga davanja naših glasov i to za naše lokalne (neje od glagola lokati) močnike, očem reči, zbirali bodemo selske (čitaj: opčinske), gracke i županiske heze. Nišči se je ne preveč niti prijavil za (grado)načelnike, a mi kak biračko telo jedva čakamo kaj nas naši domaći političari počnejo nagovarjati, kaj počnejo deliti jabuke, pomaranđe, pive, gulaša, bograča, klobase ili pak obečavati brege i grabe. Kaj se našega župana dotikavle si čakajo kaj bode Matek napravil? Najme kaj, jeni pripovedajo kak bode Matek išel znova za župana, a drugi pak kak velijo kak oče več jempot biti saborski zastupnik tak da bode išel za čakoskoga varoškoga načelnika pak bode spraznil foteljo župana. Teca Franca mi je rekla da Matek čaka kak bode zišel of jegov sod v Zagrebo pak si bode unda zebral kam bode išel. Nesam znal kaj teci reči, ali sam bil najgerek što je itak to teci rekel, ali mi je ne štela reči. Znuom sam da je v zadje vreme vejčpot postal na žganički sosed Tonča, šteri ne trpi Trampa, ali on joj je to ne mogel reči jerbo se nikaj ne razme v politiko. Najbrž je to čula v zadrugi jerbo si je parpot sama išla po kruha i piviko. No, kak bilo da bilo, ali pitam vas de so itak te naši političari šteri bi šteli biti župani? Znuom da bodo se predi ili pak posle prijavili, ali nebrem razmeti kaj tak dugo čakajo. Nebremo se niti mi kak biračko telo restrgati, pak moramo bar dva mesece predi znati komo bodemo mogli glase dati i što nam kaj nudi i kaj nam bode što obečal. Pak ne bodemo išli glase davat kak goske štere idejo v meglo?
Thompson je čovek od reči
Dok je Marko Perkovičov zvani Thompson bil v Čakovco – grado Zrinskih, a došel je snimati spota za svojo novo pesmo Nepročitano pismo, a štero je napisal po pismo našega i hrvackoga mučenika i velikana Petra Zrinskoga štero je grof Peter napisal svoje ženi Katici z rešta v Bečkomo Novigrado večer predi nek so mo odsekli glavo. Marko je došel do toga pisma i strašno mo se dopalo, a unda je zazvedil kak je to pismo, štero je nam poznato pod naslovom „Moje drago serce”, nigdar ne došlo do Katice pak je unda z toga pisma napisal pesmo „Nepročitano pismo”. Pred tri tjedne je bil v Čakovco kaj v spot dene i mesto de se grof Petar oprostil od svoje ženice Katice predi nek je genul prema Bečo. Štel sam vam pravzaprav reči kak je ne minulo niti pune tri tjedne, a Thompson je več zgotovil spota i pustil ga je skupa z pesmom. Morete ga videti i pesmo čuti na Youtubeu. Ak bodete pogledali unda bodete vidli i Zrinsko gardo štera je Thompsono pomagala snimati spota i kaj mo je spot mam lepši. Verjem da znate kak so si dečki v Zrinskoj gardi fest i fajni? A pesma vam ovak ide:
Pišem ti pismo, voljena Kato, nemoj dok čitaš plakati zato, ne brini, nije me strah. U zoru me vode, tako su rekli, u desetom satu glavu bi sjekli, i sa mnom ide ti brat. Javljaju nam večernja zvona da prolazi dan, čeka nas krvnik i posljednja zora, ni milost ni spas več naoštren mač čeka nas. Putujem, Kato, bez tebe, bez konja, sablje srebrne, lako ću ja, a kako ćeš ti? Putujem, Kato, bez tebe, gazit ću staze nebeske, pismo je to nepročitano!
A se dale bodete čuli i vidli na interneto. Zato ga imamo…
Probal sam, ali mi nikak nejde
V zadje vreme sam se dosti motal okoli našega „Staroga grada”, očem reči, okoli restorana vu Starom grado ili pak kafiča „Bedem” črez šteri se ide v našo Riznico Međimorja. Mel sam na oko ove težake šteri so delali parkinga polek Staroga grada i nikak mi je ne išlo v glavo kak morejo tak mudno delati. Tak so mi se dopali kaj sam stoprocentno siguren da bodem jiv poslal po smrt i ak se oni bodo toga posla prijeli unda bodem živel večno kak i si kibici Hajduka. No, kak i saki posel ima svojega kraja tak so i težaki v Muzejo dočakali kaj morejo znova parkerati svoje aute na staromo parkingo, ali ve na novim tlakovcima. No, najte me krivo razmeti, nesam vam se štel potožiti na težake šteli so postavljali tlakovce nek mi nekaj drugo nejde v glavo: probal sam, ali nikak nejde. Najme kaj, težaki (čitaj: kustosi) v našemo Muzejo se falijo kak imajo nejveč posjetiteljov v celoj Lepoj Našoj i kak se nadjajo da jiv bode ovo leto čuda vejč, očem reči, jempot vejč. Najbrž bode tak jerbo sakoga šteri dojde prebrojijo i zapišejo. Kak je i red. Ali zato ne razmem zakaj je unda novi parking plac na pol menši nek je bil stari, a stari je dosti pot bil pre mali. Najgerek sam, jako sam najgerek de bodo se itak ve parkirali si turisti štere čakamo ak je of novi parking dosti sam za težake Muzeja i za nešterne panziče šteri se skrivečki sparketajo polek staroga grada kaj ne morajo platiti parkinga – to te ja pitam?
Što bi se tomo nadjal?
Štiri leti so čakoski gracki večniki glumili finočo i se kaj so meli med sobom so rešavali spominkom, očem reči, v rokavicami da bi ve na krajo, na zadjoj sesiji, se došlo na svoje. Najme kaj, večniki so si zeli doli rokavice, maske so pale, a kuliko čujemo ne sam maske jerbo so se prcali bez milosti. A kuliko je meni poznato za prcanje se tre preprajti kak jeni tak i drugi, a i kakše je to prcanje ak so igrači oblečeni? Ak sam ja to dobro razmel, saki večnik si je zel oduška i to kak oni doli tak i oni gori, očem reči, kak ovi na vlasti tak i ovi v opoziciji. Jedino kaj se je ne zazvedilo što je itak prvi počel, a što pak je del točko na i? Čuda bi bilo interesantneše, bar za nas publiko, ak bi se mesto metanja ročke na i (čitaj: sakomo reči kaj ga ide) i rivalo v točko. Mortik so nešterni i to meli na pameti ali ga ne bilo igračov i igračici šteri bi meli vupeše odigrati i to točko. Kak bilo da bilo ipak je bič počil na krajo jerbo brzčas se več nigdar ne bodo zišli vu takšem sastavu kak je bil of. Ili kak je teca Franca rekla: neje to četrti razred pučke škole pak kaj bi se unda najesen zišli si skupa v petomo. Dok ti jempot mandat mine ropotarnica povijesti čaka, malo je onih šteri bodo meli priliko ponavljati razreda (čitaj: mandata).
