Biračko telo je svoje naprajlo, a brez spominkov ne bode išlo!
Kaj god bodemo rekli, ali na se zadje izbori so ne nikaj pokazali. Najme kaj, zazvedili smo što bode štiri leti sedel vu Saboro, ali smo ne zazvedili što bode vedril i oblačil z Lepom našo, očem reči, što bode držal državno kaso? Kak god poglednemo te minuli izbori so bili malo čudni: prvič smo hodali glase davat v sredo, a ne v nedelo, v predizbornoj kampanji političari so sam hitali blato jedni na druge i vum z strožoka se je zvlačil zmazani veš i ak je bil bole zmazani duže se je o jemo pripovedalo i spominalo, a nišči je ne nikaj pravzaprav spametnoga nudil i kaj bi v tem bil bolši od drugih i kaj bi ga zbog radi toga nešči zebral v Sabor.
Na se zadje so na temaj izboraj si pobedili: pobedil je nejpredi HDZ-e, šteri je napakeral 61 mandata, a mam za jim so dotekle pobedničke reke i potoki pravice z 42 mandata, kaj nam spominjal Mosta z 11 i Moremo z 10 mandatlinov, Ak moremo nekomo priznati da je pobedil unda je to Ivek Penava i jegov Domovinski pokret. Oni so napakerali 14 mandatlinov i brez jiv Hadezeovci ne bodo mogli zafremati Vlado. Najbrž so oni to i šteli, ali so se brzčas nadjali da bodo meli vejč zastupnikov v sabornici. To još moremo razmeti da Penava i družina feštajo jerbo so vum z sabornice hitili Socijaldemokrate, šteri so do ve meli 18 mandatlinov, ali ne razmem zakaj so se utrašali i zakaj so feštali oni šteri se Morejo, a kola jim ido se niže i niže posle kak hercuje s Zagrebom. A tam jim ide kak muhaj v močjako.
Reke pravice, a i potoki još navek tečejo
Ne bodete veruvali, ali reke pravice, a i potoki još navek tečejo makar so presušile još sredo navečer. Ne znati je li so Milanovič, Peđa i družina još ne zazvedili kaj se je pripetilo ili pak se oni nadjajo da bode sako novo jutro nekaj spremenilo. Si smo vidli kak so reke pravice presušile, ali ako i dale tečejo unda morejo teči sam doli z brega, a to je ne ono zbog radi čega so jiv zafremali i zbog radi čega so počele teči. Verjem da znate da je nigdar ne pobedil na izborima on šteri je prvi došel doli z brega nek on šteri je prvi došel na breg. I Mađerka, čijega brega hasnujejo Štrigovčanci je najrajši mela one šteri so nejbole i nejglobleše rivali pod breg, očem reči, breščajek kak napriliko na ovim zadjim izborima Ava Karabatič. Ali niti se ono kaj je Ava Karabatič nudila je ne bilo dosti za bar jeno saborsko foteljo!
Kam pravzaprav tečejo reke pravice?
Kaj so to reke pravice i kam one tečejo? Reke pravice (čitaj: pravde) so zafremane v zadji čas, par tjednov predi izborov i nišči je ne pital otkod so došle k nam v Lepo našo? Dok sam videl kak so prešle reke pravice na izboraj, očem reči, kak so presušile predi nek so se nadjali oni šteri so jiv zafremali, najgerek sam kam itak tečejo te reke, te potoki? Najbrž na prečistač kak negda čakoski Črni potok? A si znuomo zakaj je čakoski Črni potok tekel na prečistač? Kaj se počisti, kaj z kalnoga i črnoga potoka, posle prečistača, teče čista i bistra voda. Gruntam si, več hajdi dugo si gruntam, što je itak te prečistač šteri bode prečistil kalne reke pravice kaj žjiv napravi čistoga i bistroga potoka? Ovo leto je te prečistač bilo biračko telo, ali so tu “reke” ne prešle nek presušile.
Kak smo prešli mi Međimorci?
Kaj reči na to? Nebrem reči, dok smo vidli listeke na šterima so bili naši Međimorci da smo se mogli nečemo preveč nadjati. Župan Matija Posavec je z svojim listekom osvojil dve fotelje vu Saboro, ali se ve točno ne zna što bode jega zamenil vu Saboro jerbo on nebre v isto vreme biti i župan i sabornik. Kak i navek i tu se pripoveda čuda sega, jeni pripovedajo kak bodo jeno saborsko foteljo popunili Zagorci, a jeno naši Međimorci ili pak Međimorke, dok oni drugi pripovedajo čistam nekaj drugo. Tre malo počakati dok spominki dojdo do kraja, dok se zafrema nova Vlada unda se bode vidlo što bode kam išel, što bode jahal na kojima, a što pak bode hodal polek kojov z cuglama vu rokami. Znuomo da so dva mandatlini treba i jenima i drugima, i levima i desnima ak očejo dojti na kojima v Banske dvore. Makar je Matija sima rekel kak on hoda na posel navek po levoj strani vulice, ali zebre so seposot i more prejti i na drugo strano vulice ak ga tam čaka nekša cukor piksa?
Znova se političari vučijo brojiti do 76…?
Nebre čovek veruvati dok vidi ozbiljne ili pak stareše ljude kak se vučijo brojiti do 76? A čim se je zazvedilo što je se priskrbel, prek biračkoga tela, saborske fotelje mam se je počelo brojiti do 76 jerbo što prvi nabroji 76 te bode mogel zafremati novo Vlado i te bode premijer štiri leti. A znate zakaj si očejo biti premijeri? Zato kaj premijer ima ključe od državne kase i gospodari z našim penezima. A de so penezi tam je i nejvekša stiska. Kak god gledimo, ali čudna je tau brojka 76, Ne mortik tua brojka nek poti kak dojti do je. Si znuomo kak je v Sabor zebrani 151 zastupnik i kak je 76 zastupnikov tre kaj bode nešči premijer i kaj te zafrema novo vlado. To si znauomo, ali nebrem razmeti kak štiri premijeri brojijo do 76 i saki nabroji dosti i saki od jiv se nadja kak bode ruon te šteri bode vedril i oblačil z Banskih dvorov. Drašek Plenkovičov se nadja kak so Banski dvori jegovi, Zoki MIlanovič još navek seja kak bode jeden den hodal na posel v Banske dvore, a drugi den na Pantovčak, mesec nam je svedok kak Peđa Grbinov, kak nejvekši političar Lepe naše još navek seja kak je jegovo mesto v Banskim dvorima. Zagrebečki gracki načelnik oče sima reči kak je jegova Sandra Benčič hodala 18 let na fakultet sam zato kaj bode precednica Vlade v Lepoj našoj.. Ve vidite kaj politika dela od ljudi i tak bode se dok jenoga dneva ne prestanejo teči reke pravice štere so presušile v sredo navečet!
