Nikaj bez fige v žepo
Kaj vam bodem rekel, nesam kanil nikaj reči na ove zadje izbore za naše lokalne močnike, ali me je teca Franca na red pobrala i rekla mi je kak bi to bila špot sramota da nikaj ne rečem, očem reči, da nikaj ne napišem. Kak god gledim, kak god da si premišlavlem, ipak so naši Međimorci jako čudni ljudi. Nikaj mi je ne hasnilo to kaj sam hodal okoli politički štandi jerbo sam se nikaj ne navčil. Nikaj spametnoga. Neje to nikaj novoga kaj so mi si tvrdili kak bodo ruon oni stoprocentno pobedili, a si znuomo da to nebre biti pak so niti v labodoritanjo ne si bili prvaki Lepe naše. Čistam je drugo kaj si oni šteri hodajo na izbore kanijo i pobediti makar ga je bilo i oni šteri so molili Božeka kaj nej pobedili jerbo ak bi pobedili posle izbora ne bi znali kaj naprajti z tom pobjedom. To vam je kak moj dugoletni pajdaš Feri šteri se furt mota okoli puce (meje) i okoli ženi (vejč) jerbo ak bi mo nešterna puca popustila ne bi znal kaj žnjom napraviti, ali se zato žene, tak bar on veli, sami preložijo i zemejo si od nas moških ono kaj nucajo. Kaj reči, ima Francek praf. A tak vam je i v politiki jerbo si mi svoje glase davlemo onima za štere si gruntamo da so vredo, ali to jeli so prav zaprav vredo to bodemo zazvedili stopram unda ak cugle vlasti dojdo vu jive roke.
Poglednite si kak je to zišlo, moglo bi se reči dok se potegne crta posle izborov da je, na sed zadje, v Međimorjo pobedil HDZ, a tuliko smo jamrali protiv jega. Najme kaj, nejveč načelniki i gradonačelniki so dali Hadezeovci ili pak one stranjke štere so naslojene na Hadezeovce, a dok unda idete malo dale do župana i jegovoga zamjenika unda tam dojdete do komunistov, očem reči, SDP-ovcov. Tak vam dojdemo do toga da naši ljudi, naši Međimorci hodajo glase davat z figom v žepo, očem reči, nejpredi si zberejo svojega nejbolšega čoveka za načelnika i to HDZ-ovca, a unda denejo roko z figom v žep i na drugom listeko zaokružijo Matijo z Platforme za župana i esdepeovca Medveda za jegovoga zamjenika. Kaj reči, zememo pušlek listeki na šterima se davlejo glasi i sam v dve minote zaokružimo načelnika na desnoj strani, a župana i zamjenika na levoj i niti z okom ne trepnemo. Kak da smo mi Međimorci završile visoke političke škole.
Žalil se je, napriliko, Dragec Glavinov, županijski političar z Priloka, kak je ve jegov HNS ispal z županiske političke križaljke? Ne razmem kak to ve jemo nejde v glavo? Hajdi let je HNS bil glaven prinas v Međimorjo, unda je došla Platforma i zavzela je mesto narodnjakov, a v tak maloj županiji kak je naša ga ne mesta za dve tak velike stranke pak so jegovi narodnjaki odišli po riti k meši. Očem reči da se i on mora dobro držati ak oče ostati v politiki jerbo mesta so ograničena i podelena. Nekaj si gruntam da je došlo vreme kaj se Dragec počine posle tulikši let v politiki. On si je zaslužil, politika isto, a mlajši čakajo!
Kaj se je to itak kuhalo v prislaskomo političkomo lonco?
Nišči se je tomo ne nadjal kaj bode tak gosto vu Prislavco, vu Pupini seli i kaj bodo se nejmeje tripot morali brojiti listeki kak bi se zazvedilo što je ipak pobedil. Dok so se prvič prebrojili listeki i glasi unda je bil pobjednik David Dodlek, a posle drugoga brojanja je bilo nerešeno. Kak to nebre biti, rekli so ovi v biračkomo odboro i počelo se je znova brojiti listeke i glase. Kak se pripoveda, nešči je donesel devet listekov iz zadje hiže i te devet so prevagnoli na strano Matije Ladiča, a de so se ti listeki pravzaprav skrivali do tretjega kruga brojanja (i zakaj) to brzčas nišči ne zna, a on šteri jiv je donesel neče nikomo reči. Oni šteri so pobedili velijo kak je bilo se po zakono, a oni šteri so zgubili se bunijo i žalijo. A de je pravica to bode v Pupini seli jako teško zazvediti? No, nigdar je ne znati!
A ve hercuje mesec maj
Odnavek se je hajdi sega pripetilo v meseco majo. Več prvoga maja svetkujemo praznik dela sam kaj smo negda meli dva dni fraj, a ve sam jeden. Prvoga majoša vam je još jeden vekši svetek od praznika dela jerbo mi, Jožeki radniki, imam svoje godovno. A godovna se nesmejeo zapuščati i prekakati tak da moja pajdašija i ja to navek obslužavlemo. Posle vam dojde Den oslobođenja Zagreba, pak Den pobjede okoli šterih se nikak nebremo dospomenuti kaj so teh dnevov partizani napravili v Zagrebo, Bleiburgo, na Križnomo poto, Hudoj jami de je po riti k meši odišlo par sto jezer Hrvatov jerbo so bili ustaše. A teca Franca veli da so ustaše mele tuliko borcov, tuliko vojnikov kuliko so partizani potukli do dneva denešjega nej zgubili rata. Nadjam se da se to bode rešilo predi nek Domovinski rat dojde na red. Mi Međimorci još nekaj imamo v majušo, a to je Urbanovo. Kaj bom vam rekel kanil sam iti ili na Urbanovo v Štrigovo ili pak na otprte pelnice štere delajo non – stop vu te dneve vina. Ali kaj vam bodem rekel tu se je zmešala naša policija. Nebrem vam reči kakši je to jal teh naši policajov kontra nas Međimorcov šteri smo, kak i naša međimorska zemla, dobri kak kruh. Bil sam vam, par dni pred Urbanovo vu Štrigovi de se je narodil naš svetec sveti Jeronim i de so naštampali novoga rečnika štrigoskoga hatara. Se je bilo jako lepo, se nam je profesor i doktor Đurek Blažekov lepo pojasnil, a unda je štrigoski načelnik Stanko Rebernik, z conom zvani Rebus, potvrdil kak je to se točno tak da smo mogli prejti na spominke po štrigoski i na štrigosko nejbolšo pijačo. A to je vino z štrigoskih goric. Se je bilo vredo dok sam se ne dimo pelal i v Brezjo so me policaji poslikali z svojo vuličnom kamerom i poslali so mi dimo sliko z štrofom od 60 ojerov. Kaj vam rečem, platil sam jerbo se z policaji nesme i nebre svaditi, ali je moje Urbanovo odišlo v policijsko kaso. Rekla je žena, svoje si potrošil i ve se doma moreš slikati. I tak je bilo. Nesam vupal porinuti roko v zadji žep de imam črnoga fonda i oditi na Urbanovo jerbo bi žena mam znala da imam črnoga fonda. A to mi je ne trelo.
Zadja vest
Kibici Hajduka, očem reči, Torcida si more odehnuti, ne morajo več biti napeti kak strune jerbo je Reka prvak Lepe naše, a Ajdukovci so i posle dvajsti let odišli po riti k meši. Poslal mi je Vlado novo tablico: Reka – prva, Ivan Pavao drugi, Hajduk treči. Nemam nikaj protiv Reke jerbo so furt dobro igrali, ali jiv precednik Damir Mišković je lepo rekel kak oni ne kanijo biti prvi ovo leto, a to isto je i Zvonen Boban ponovil z Dinamove strane tak da so se Hajdukovci i Torcida do zadje minote nadjali kak bodo itak to oni. Ali dok je bič počil, v nedelo se je došlo na svoje. Ne trpim lažlivce rekel je Hajdukovec Koki!
