Z Očenašom so započeli adventa
Znate več kakši so političari kaj se medija dotikavle, se bi dali sam kaj bi jiv mi obični smrtniki, očem reči, biračko telo vidli kak na televiziji tak i bilo de drugdi. Čakoska gracka načelnica Ljerka Cividini je najbrž mela voljo i željo kaj bi bila na televiziji, ali verjem da joj je zadja želja bila kaj bi bila pre Zorano Šprajco, očem reči, Jovanovičo. A kak si je to zaslužila? V čakoski gracki upravi je mela konferencijo za novinare kaj Čakovčankama i Čakovčancima lepo reče kaj jim je v Čakovco prepravleno za ovoletošji advent, očem reči, vreme Došašča. Kak je žnjom na konferenciji bil i čakoski gvardjan i župnik fra-pater Filip konferencija je započela z molitvom Očenaša, a to se je Zokijo Šprajco ne dopalo jerbo je on več hajdi dugo na svojoj RTL televiziji i još je nigdar ne počel svojo emisijo z molitvom. Ne bi se štel mešati je li je to bilo vredo ili pak ne, ali se je Zoki z toga norca napravil. Mi znuomo, ali ne znati je li to Šprajc znua da je Čakovec Grad Zrinskih, a da je jeden od nejpoznateših Zrinski, posle Nikole Šubiča, junaka Sigeta, ruon tak Nikola, ali Čakovečki. On je bil hrvatski ban i pjesnik i hajdi toga je napravil za nas Hrvate, a i za naše Međimorje. On je 1659. leta dopelal fratre v Međimorje i saki den je svojega radnoga dneva započinjal z molitvom i z mešom vu svojoj kapelici vu Staromo grado. Pak ak je on tak na leta delal unda i denešji “gazdi” v Čakovco morejo nešterne posle započinjati z molitvom, očem reči, Očenašom vidlo se to Šprajco ili pak ne!
Dragi Božek je obečal moškima da bodo mogli dobre i poslušne žene najti na sakomo voglo, a unda pak je stvoril okroglo Zemljo!
Kaj zvezda dela na adventski sveči?
Več sam rekel da je molitva predi vekšega ili pak glavnešega dela ne nikši greh ili pak nevola, ali mi nikak nejde v glavo kaj dela zvezda, i to ne ona z neba nek petokraka, na adventski sveči? Za ve je na venco vužgata jena sveča i pod jom blešči jena petokraka, a čim bodo se vužigale i druge sveče saka bode mela svojo petokrako. Ne verjem ruon da advent ima bilo kakše veze s zvezdom petokrakom i da so se unda dok je zvezda petokraka vedrila i oblačila na ovomo našemo hataro vužigale adventske sveče? Kuliko se zmislim, a dosti dugo se več poteplem po ovomo našemo sveto, nigdar se je ne svetkuval advent, a niti pak Božič i nigdar so se ne vužigale sveče v ono vreme dok smo mi Hrvati ne meli svojo državo. Sveče so se počele vužigati dok so naši braniteli pretirali četnike i zafremali ovu našo samostalnu i neovisnu Lepo Našo. Po zadjemo popiso pučanstva v Lepoj Našoj prinas v Međimorjo se je prek osemdeset procentov Međimorcov izjasnilo da so krščani i to katolici i da verjejo kak dragi Božek postoji, a si znuomo da zvezda petokraka nema nikaj z katolicima kak niti oni žnjom, pak zato nebrem razmeti zakaj sikam rivlemo te petokrake? Ak očemo videti zvezde moremo zdiči glave i vidli bodemo da jiv je nebo puno. No, ove na nebi so ne petokrake!
Preljubljena moja ženica, dok ja hmerjem je li se bodeš ti venodjala z drugim moškima? Preštimoni možek, zbog radi toga ne moraš hmirati!
I v Starom grado hercuvle zvezda petokraka
Genul sam od čakoske gracke vure prema Staromo grado kaj poglednem kaj nam “Starina” nudi za ovoletošji advent. Prešel sam polek Nikolinoga “Orla”, polek štrigoskoga Svetoga Remoša (čitaj: Jeronima) prešel sam prek novoga drvenoga mosta Katarine Zrinski šteroga je postavil Damir Klaić Ključ, a v promet so ga pustili gardisti Zrinske garde Čakovec i več sam bil pre Staromo grado šteri nam je osvetleni z sake fele svetlima. Se je to bilo vredo dok sam ne došel v atrij Staroga grada, a tam sam na vratima videl ono čemo sam se ne nadjal. Na vratima, črez štera se ide v multimedijalno dvorano se šepuri dosta velika zvezda petokraka. Nebrem razmeti kaj itak zvezda petokraka dela v Staromo grado, očem reči, v Grado Zrinskih jerbo sam još nigdi ne čul, a niti pak prečital da so Zrinski negdi meli i nekaj delali s zvezdom petokrakom. Ne znam kaj nas to vleče kaj seposot mečemo to zvezdo petokrako, a si znuomo kuliko je zla zvezda petokraka naprajla nam Međimorcaj, nam Hrvatima i celomo sveto. Mesto kaj bi ono kaj je dobro napre rivali i štimali se z tem, ne mi se nebremo genuti od zvezde petokrake štera nam je donesla sam nevole?
Zakaj je petek črni? Zato kaj je radna sobota!
Splicka bura otpuhnula Dinamovce
Dugo so se prepravlali zagrebečki dečki (čitaj: Dinamovci) i splicki bili (čitaj: Hajdukovci) kaj odigrajo derbi utakmico naše Hrvacke labodoritaške lige i to v Splito. Dinamovci so se nadjali da bodo pobjedili i tak došli na prvenstvenoj lojtrici čistam blizo Hajdukovcima, a Hajdukovci so senjali čistam nekaj drugo, a to je da bodo oni pobedili i ostajli Dinamovce kaj jim bodo gledali v rit, očem reči, v hrbet. Bole so prešli Hajdukovci jerbo se je pripetilo ono kaj so senjali i ve so na prvomo mesti i imajo sedem bodi fora tak da se morejo nadjati da bodo ipak ovo sezono prvaki Lepe Naše v labodoritanjo. Moram reči da so zadji pot bili prvaki pred dvajsti let, to sam vam več rekel, dok se je narodil moj nejstareši vnuk, a on je več na fakulteto. Moram i to reči jerbo je to rekel trener Dinamovcov, Neno Bjelica, kak je veter Hajdukovcima pomogel kaj pobedijo šteri jim je celo drugo poluvreme puhal v hrbet. Nebrete veruvati da je “plavi” trener opče ne primetil kak je celo prvo poluvreme tiral Dinamovce, ali jim je to ne bilo dosti kaj bi bar jempot labodo vritnuli v Hajdukov gol. Još nekaj, utakmico je fučkal naš međimorski sodec Patrik Kolarič z Strahoninca. Oni šteri ga bole poznajo velijo da je Hajdukovec, ali se je to ne v nedelo primetilo. Jedino dok je dal Markijo Rogo črlenoga kartona, unda mo je malo roka drhtala.
Prekopal sam celo labodoritaško arhivo i zazvedil sam kak je Hajduk ne zgubil niti jeno utakmico v Ligi prvaka duže od dvajsti let!
