Rešili smo se Pupovca i jegovih četnika šteri so vedrili i oblačili v Srbo kak 1941. tak i ovo leto sam kaj so mo letos pomagali Stipe Mesičov i Zoran Pusič, a ustaše so ne meli pristupa kak niti pred osemdeset let. Samozvani antifašisti so iskali fašiste, a kak jiv neso našli napravili so derneka sami med sobom , kak i pred osemdeset let i pomalem so se vrnuli z ropotatnice povjesti v dvajstiprvo stoletje. Tak vam bodem napravil i ja, ostavil bom Pupovca i četnike v 41. I odišel bodem v Čakovec na proščeje. Dosta smo rovali po povjesti, a nebi da so vrata na ropotarnici povjesti ne bila otprta.
Znajo si, kak verniki i bogoboječi, tak i oni šteri verjejo da Božek ne postoji i ne delajo stisko v cirkvi, da se prvoga i drugoga augustuša obslužavle glavno čakosko proščeje v starešoj čakoskoj župi svetoga Nikole Biškupa i to Majka Božja anđeoska ili kak to lepo velijo naši sosedi Dalmoši Gospa od anđela. To proščeje se obslužavle v Čakovco i Međimorjo več 360 let otkak je Nikola Zrinski Čakoski dopelal fratre v Čakovec jerbo je žnjimi došla i Gospa. Ovo leto je proščeje bilo obslužavano malo v skrčenom obliko, jer kak znuomo još navek korona vedri i oblači po ovomo našemo falačko zemle med dvemi vodami. I ne sam prinas. Nikak se več, skorom dve leti nebremo rešiti te vuteske, štera je došla, a nišči jo je ne zval. Ovoletošje proščeje, ovoletošje Prcinkulovo, kak mi Čakovčanci i Međimorci od milja zovemo to Marijino proščeje, je ovo leto prvič obslužavala nova gradonačelnica Ljerka Cividini, štero smo zebrali v majušo na Den državnosti. Kak se to proščeje održavalo još pod merama Epidemiologa ono je napravleno, kak nam je rekla gradonačelnica, malo skrčeno, očem reči, takše kakše so mere dopuščale. Ali morem vam reči makar so mere epidemiologov vedrile i oblačile, ali ga na tom našem proščejo bilo sega: hajdi se ljudi zišlo z jene i druge strane, z jene strane ga bilo hajdi oni šteri so nudili sakefele sega, a na drugoj strani ga bilo još vejč ono šteri so to se kupuvali i hasnuvali. Morem vam reči da je i luna park delal srkčeno i da ga ne bilo sega kak pred dve – tri leti, ali, kuliko sam mel za videti, deci je nikaj falilo i neso se dali vum tak dugo dok so japek i mamika ili pak japica i mamica meli kunice v žepo. Bilo je i pevačov i to na stari mesti v jezero staroga grada i to za sakoga što je štel poslušati. Istina Božek trelo je meti viziperte da ste z koronom na ti i nišči šteri je mel vručino se je ne mogel motati okoli Bebeka, Opće opasnosti, klape Iskon ili pak Nine Badrič. A sakefele tamburašov i bandistov ga bilo po celomo Čakovco kuliko ti srce oče. Još i vejč. Teca Franca je bila na glavni meši v pondelek na Prcinkulovo i posle se je z sosedom prešpancerala par pot gori doli i seje spregledala i nejbole joj je išlo na živce to kaj si je, makar dosti slabo čuje, morala i vato vu vuha deti tak so si ti bili glasni. Dobro kaj je of haustor prek cirkve delal pak si je to skrivečki naprajla.
Nekaj ipak moram zameriti čakoskim turističkim težakima. Najme kaj, jako teško se je došlo vu Vinograd. Nebrem razmeti zakaj to? Velijo doktori, Capak i pajdašija, kak je vino lek protiv korone, a vu Vinograd so puščali samo one zdrave šteri so ne meli vručino i šteri so meli viziperta da nikaj nemajo z koronom. Kaj če zdravomo čoveko apoteka, kaj če zdravomo čoveko lekec – to te ja pitam?
Meni vam je lepo bilo to kaj sam saki den zišel na proščejo našo gradonačelnico. I to par pot. Morem vam reči da je seposot bila: i v glavni vulici i pre Orlo i v Staromo grado i v parko, v peršeciji i pre meši, v prvomo redo, kak je to red. Najte me krivo razmeti, ali gradonačelnico sam videl na ovomo jenomo proščejo vejč pot nek negdašjega gradonačelnika za štiri leti. No, ne znam kak bi vam to rekel, ali neje to ruon lepo kaj je nišči ne pital za Štefa Kovača, kak da je nigdar ne postojal, kak da je ne bil osem let prvi čovek grada Čakovca. Ne bi se štel mešati, ali kakše on to pajdaše ima kaj ga je ne niti jeden pozval na gvirc kak se to šika. Ili pak na pogačo z tikvama, štero je delila naša gradonačelnica
Dok se vu Vatikano zbira novi papa i dok se zbere unda z rafunga ide vum beli dim i čim se pojavi dim mam vest ide, urbi et orbi, vu svet: Habemus papam, očem reči, imamo Papu. Tak bi mi Hrvati mogli ve reči: Habemus Pelješki most – imamo Pelješkoga mosta. Dok so Kinezi dobili toga posla bil sam vesel, jerbo sam znal da Most bode na vreme napravljeni jerbo Kinezima nebrejo sfaliti težaki. Tak je i bilo, mic po moc, i Most ne na svojim nogama. Što oče more iti po njemo, a oni drugi se morejo z šajkama pelati spod pod jim. Hajdi je let trajalo kaj smo morali iti z Lepe naše v Lepo našo prek Neuma, a ve to moremo mimo Neuma da so nam več Neuma komunisti četrdesetpete dali Bosancima (čitaj: BIH) i to gešenk. Nejleži je davati dok imaš kaj i dok je ne tvoje.
Ovo leto se igra lanjska Olimpijada. Ve si morete pregruntati kakša je nesnaga tua korona da je mogla i Olimpijado preseliti kaj so negda ne mogli niti veliki rati. Kak bilo da bilo i Lepa naša ima svoje športaše v Japano. Nejbole nam od roke ide tenis tak da so vu finalo igrale dve reprezentacije Lejpe naše, na jenoj strani mrežice so bili Hrvati Mate Pavič i Nikola Mektič, a na drugoj Hercegovci Ivan Dodig i Marin Čilič. Igralo se oštro i na prvo lopto i morem vam reči da so pobedili Hrvati Mektič i Pavič, a nejso zgubili naši sosedi Hercegovci Čilič i Dodik, niti jeni so ne zgubili jerbo so i jeni i drugi dobili želencije i to kak s šika, Hrvati so dobili zlatno, a Hercegovci srebrno zlatnoga sjaja. Verjem da je bole ne moglo prejti.
Fčera smo preslavili jenoga od nejvekših, ako ne i nejvekšega svetka v Lepoj našoj: Den pobjede, Den domovinske zahvalnosti i Den hrvackih branitelov. Obslužavlemo ga sako leto i to po celoj Lepoj našoj, a glavna fešta je, kak i navek, v Knino, ali bez Tomsona. On je bil dober za vreme rata dok je trelo puško nositi i boriti se, a ve dok tre popevati ve to delajo nekši drugi klinci. To bajam sako leto, a i teci Franci to nikak nejde vu to jeno skorom stoletno glavo. I još nekaj me gvinta sako leto? Zakaj mi Hrvati, šteri smo bili pobedniki v štiriletnomo rato ve moramo pitati i prositi Srbe i četnike, šteri so zgubili rata šteroga so sami započeli i štere smo potukli do zemle, je li moremo slaviti naš Den pobjede?
