Mura pomalem teče prema himni!?

Odnavek je tak bilo kaj je on čavel šteri je visoko štrčel dobil po gopco, pak je tak i denes. Ste čuli kak nas je naša država zaštrofala zato kaj tobož preslabo sorteramo smetje. Oni so rekli preslabo, a jiva je zadja, a mi v Međimorjo smo prvi počeli prebirati i sorterati smetje tak da denes, posle deset let kak to delamo, jako malo smetja ostaja med mešanim otpadom. Ne znati što je to jim rekel kaj je tak ili pak na Međimorce zaštrofajo jerbo znajo da mi bodemo gombali, ali na se zadje bodemo štrofa i platili. Pak neje jim važno što bo kuliko reda med smetjom napravil nek očejo čim vejč penez pobrati. A dok se te penezi naberejo unda bode jim se zgubil saki trag i to tak kaj niti dragi Božek ne zna kam bodo oni odišli i kam se bodo zgubili. Nekaj si gruntam da bi unda Lejpa naša za te peneze resorterala to smetje i kaj sako smetje dojde na svoje. Ali ne, država je rekla kak to mora biti, ali nigdar ne dojde kaj bi pravzaprav vidla kak se to dela i važno je da nam je zela peneze, a posle  je več niti ne važno je li bode smetje resorterano ili pak ne. Kuliko vidimo niti med smetjom ga ne pravice! A mi Međimorci ne sam da štrčimo kaj se smetja dotikavle nek smo i bežali pred rudom. A kuliko vidimo to naša pravna država ne trpi. Moramo biti si jednaki: ili jednako dobri ili jednako hudi, nejvažneše je da smo jednaki. Pak nebremo mi međimorci biti spametneši od države!!??

Saka sličnost z državnom televizijom je čistam slučajna. I teklevizači poberejo peneze (čitaj: pretplato), unda se penezima gubi saki trag, a za te peneze nebremo skorom nikaj gledati na televiziji sam turske serije (Sulejman i Istanbulske neveste), reprize i stare filme. A penez se nabere kaj me je strah povedati. Od teh naših penez nikaj ne dobimo, nikaj ne gledimo, a kak ste pogunuli, penez ga ne. I to več na leta. I nikomo nikaj: pojel je vuk osleka, a hasna nikšega. Jedino je vuk sit, a mi osleki šteri plačamo i dale čakamo i čakamo…, bolše (malo) zutra.

Verjem da smo si gledali labodoritanje v evropski Ligi prvakov, štero ide pomalem krajo, ak smo meli de?  I niti med tem labodoritaškim cvetjem ga ne pravice jerbo oni štero so bili sigurni kaj bodo odišli dale so ostali doma, a dale so odišli oni šteri so se nejmeje nadjali, kaj bi rekli šteri so to niti ne senjali. Pak rečite mi, prosim vas lepo, što se nadjal da bodo „črleni vragi“ z Liverpula pregazili Mesija, Rakitiča i pajdašijo. Naklali so jim štiri komade, a ne so niti z okom trepnuli i to tak na nagloma kaj so i Mesijo suze išle. Da se tomo nišči ne nadjal moglo se je videti na kladionicama, nišči je ne pogunul da bodo Mesi i družina odišli po riti k meši. Kuliko vidimo vrag nigdar ne spi.

Još je huje zišel niskozemski Ajaks. Ajaksi so pobedili Totenhema v Londono i bili so stoprocentno sigurni da bodo išli dale i da bodo prvoga junjuša igrali v Madrido za prvaka Evrope. Kaj reči, se je dobro hapilo i Ajaksi so nejpredi zabili jenoga, a unda pak i drugoga tak kaj so vodili 3:0 i čistam je nekak normalno da so si več gruntali kak je pobjeda v žepo, a z tem i karta za Madrid. Ali još se je jempot pokazalo da je laboda okrogla i da je ne se gotovo dok sodec ne otfučka kraja. Ajaksi so prefletno hitili puške v kuruzo i prefletno so počeli slaviti, a unda so labodoritaši Totenhema zeli stvar (čitaj: labodo) v svoje roke i počeli so igrati kak navijeni. I ne sam igrati nek i gole zabivati. Na krajo se laboda tripot zakoprcala v mreži ajaksovoga golmana tak da ve bodo v Madrid putuvali Englezi, a ne Ajaksi.

Kak god nemam rad Engleze moram priznati da oni nejbole ričejo labodo jerbo vu finalo Lige prvakov igralo Liverpul i Totenhem. No, to je još ne se jerbo vu finalo Evropske lige ruon tak igrajo Englezi, očem reči, engleski klubi Arsenal i Čelzi. Več hajdi let je engleska labodoritaška reprezentacija nikaj ne naprajla niti na evropskom, a niti pak na sveckomo prvenstvo, negda so niti ne došli na prvenstvo jerbo so bili preslabi, a klubi vedrijo i oblačijo po Evropi. Kaj vam to govori? Kaj? Da v engleskim klubima igra nejmeje Englezov! Moremo jim mi v Lepoj našoj biti jalni za tua finala kak so oni bili nam lani dok so Luka Modrič i pajdašija igrali finale Sveckoga prvenstva v Moskvi i donesli k nam v Lejpo našo srebrne želencije.

Minuli je mesec napisal drug Robert Bajruši kak pop šteri nema kaj delati i jariče krsti i z tom starom narodnom izrekom se obrušil na nas Međimorce i na našo Zrinsko gardo dok je zazvedil kaj Garda oče kaj bi i reka Mura tekla črez našo državno himno „Lejpa naša“. Ne znati kaj ga je to tak pehnulo v oko, a mortik niti ne zna de je naša Mura i da ona več hajdi stoletja teče i dela mejo Lejpe naše z Evropom. Si mi znamo da se ne rivle reka Mura v himno zbogradi Mure nek zbog nas Međimorcov. Si znamo da je ovo leto minulo sto let otkak smo mi Međimorci rekli vekovečno zbogom Mađarima i došli smo nazaj svojo mamici Lepoj našoj šteroj smo odnavek pripadali. Garda i mi Međimorci bi šteli kaj bi nas naši sosedi Hrvati, očem reči, Lejpa naša priznala i kaj bi, na se zadje i mi našli svoje mesto pod hrvackim suncom i to tak kaj bi si znali da je Lejpa naša do Mure, a ne sam do Drave kak smo to hajdi pot mogli čuti i v zadjih tridesti let. A zakaj smo si mi Međimorci to zaslužili? Si znamo da dok se dojde z Evrope nejpredi nabasamo na reko Muro. Jo tre nejpredi pregaziti ak očemo dojti v Međimorje, očem reči, v Lejpo našo, pak bi unda bil red kaj bi bila i v himni. Poznato je sima da smo mi več od dvjesto let bili pod Mađarima, a predi još duže pod Ugarskom, i da smo se sa tua leta borili kaj dojdemo nazaj dimo. I došli smo, kak sam več rekel, pred točno sto let tak da bi to bila prilika kaj nam Lejpa naša to prizna i dene naše Međimorje, našo Muro v himno.

No, neje to se. Rekel sam vam kak smo dugo, ne na leta nek črez stoletja smo trpeli ljuckoga (čitaj: mađarskoga) jarma, ali smo uspeli, očem reči, naši dedeki, pradedeki, mamice i pramamice, kaj smo mi, a i Međimorje, ostali i dale hrvacki. Tulikša leta smo trpeli mađarskoga jarma, ali v Međimorjo ga ne niti jenoga mađarskoga sela, nega niti jene mađarske familije i vu celomo Međimorjo se govori hrvatski, očem reči, kajkavski, kaj je to ne dosti kaj bi nas Lejpa naša priznala i kaj bi nam našo Muro dela v himno. Vidite, a to kakši smo mi Međimorci, kak smo ne dali kaj bi nas sosedi Mađari pomađarili nek smo navek i vekovečno ostali Hrvati, to drug Bajruši mortik ne zna. No, kaj se himne dotikavle tu zadjo reč ima Hrvacki sabor i saborniki tak da bodemo mi Međimorci čuli dok bode v Saboro bič počil kaj se Mure dotikavle.

Si naši župani, gradonačelniki i načelniki se falijo kak so čuda penez povlekli z EU kase, a na se zadje je došlo na svetlo dneva to kak smo čuda meje potegli nek je tam ostalo. Mi smo čuda dovlekli, a štiri pot vejč je tam ostalo. Nebrem razmeti kaj čakamo, penezi nas čakajo, a mi prinas doma, v Lepoj našoj, dremlemo.

Ne znati što bode od naših Međimorcov itak odišel v EU parlament? Je li to bode Matija, šteri je prvi na listeko ili to bode Mladen, šteri je zadji. A mortik bode to Sunčana štera je v zlatnoj sredini (de je navek bilo najlepše), a i Branimir se pomalem ravna v Brisel. Kuliko sam mel za čuti več si je kupil i novoga kufra. Ne znati što bode itak išel ili bodo, na se zadje, kak i navek, si ostali doma? A zakaj bi ruon naši doma ostali? Zato kaj je doma nejlepše!!!?

Ostavi komentar