Soci Ustavnoga soda so ipak zebrani
Kak god steška, ali ipak je zebrano deset socov Ustavnoga soda i to tak kaj so si naši saborniki nabijali iber štunde i delali so vu soboto da prinas niti trava ne raste. Ne znati zakaj so SDP-ovci tuliko brenzali te izbore i toga so si posla ostavljali za soboto. Na se zadje so ipak vidli da bodo odišli po riti k meši ak soci ne bodo zebrani pak je unda i Zoki prijel zakletvo socov v neradno soboto. Što bi rekel da se bode tuliko praha zdiglo okoli te socov, a več so se zdavnja dospomenuli precednik Zoki i premijer Plenkovič pol-pol i unda je nekomo na pamet palo kak bi mogel tu nekšo huncvutarijo naprajti pak je potegel ručno brenzo. Kak je rekla teca Franca, ipak je pamet, kak god jo malo imamo, došla na svoje i se je prešlo bez, kak se to veli, Ustavne krize. Sa je sreča kaj so si soci predužili mandata (zanjo oni od čega muhe crkajo) i to sam tak dugo dok se ne zberejo novi.
Bole je biti zaprti na psihijatriji nego otprti na patologiji!
Kak sam vam i rekel…
Na velikomo čakoskomo adventskomo venco, pre gracki vuri, je vužgata tretja sveča, a skup žnjom sveti i tretja zvezda petokraka jerbo kak je počelo tak se ide i dale, kak sam vam i rekel, saka sveča ima svojo petokrako. Rečite vi meni, prosim vas lepo, kakše veze ima zvezda petokraka z adventom? Dok se je Isusek narodil vu štalici, ober štalice je zasvetila zvezda repatica, štera je pastirima i Trema kralima kazala pota kaj so znali najti Isuseka. Dobro ste me razmeli, bila je to repatica, a ne petokraka.
Nebrem razmeti kaj smo mi itak tuliko dužni petokraki, a zvezda petokraka je sfondala, posle Drugoga rata, nekaj meje od jezero naših Međimorcov i to tak kaj se je cirka okoli pedeset let ne smelo niti pitati za jiv. A vu zadjemo Domovinskomo rato so četniki ratuvali po Lepoj Našoj i rušili naše cirkve i hiže, streljali naše ljude s zvezdom petokrakom na glavi. Kuliko vidimo se smo joj oprostili i nebremo jo zabiti, niti jo, a niti Jugo. Ne sam da jo nebremo zabiti nek joj se i dale, kaj nem rekel, v rit rivlemo.
Dok piješ pivo pred štacunom unda si pijanec, a dok piješ kuhano vino pred kučicom unda je to advent.
I rotori imajo svoje petokrake
Štere god strane dojdete v grad Čakovec nabasate na rotor, a saki rotor ima svoje zvezde. Ve ne znati je li so one pale z neba pak so se zapičile v zemljo jerbo jim sam tri špice vum strčijo ili pak rastejo vum zemlje. Kak bilo da bilo petokrake so tu. Mam me je zašpotala i ne sam zašpotala nek i za vuho potegla moja teca Franca. Rekla mi je: – Jožek, pak kaj je z tobom, pak da bi te zvezde pale z neba unda nej bile petokrake, pak i sam znaš da zvezde na nebi imajo saka po šest špici. Mam sam razmel kaj mi je teca štela reči i bilo me je sram kaj sam se osramotil, ali mi je teca pravzaprav rekla kak te zvezde rastejo vum zemle. Ne znati što jiv je itak i da posadil v zemljo?
Niti jeden ateist je ne niti ovo leto odbil božičnico!
Predi nek kanite deci povedati što je i kaj je pravzaprav Deda Mraz najte pozabiti da i vi verjete v Čaj za mršavljenje i v Afričko slivo!
Zrinska garda pak dobila smeno
Velijo Čakovčanci i Čakovčanke da Zrinska garda nekaj predstavlja v grado Čakovco jerbo je to grad Zrinski. Najbrž tak velijo oni šteri si tak i gruntajo. Ali ne si. Tak si brščas ne gruntajo čakoski turistički težaki jerbo da bi si tak gruntali i tak delali unda bi pred vrati Turističkoga ureda bili gardisti Zrinske garde, a ne orašari (ili tak nekak). Kuliko vidimo gardisti Zrinske garde so si ne zaslužili kaj bi pazili čakoskoga turističkoga ureda i turističke težake, očem reči, kaj se nej turisti slikali z gardistima. Ne znati de so itak zahuzali?
Stari Latini so več zdavnja rekli: – Živi kak moreš, ak več nebreš onak kak očeš!
De smo itak zahuzali mi Međimorci
Ak se malo prepelate po Čakovco i Međimorjo kaj de bodete našli bagere ili pak dizalice kaj znači da se prinas vu Međimorjo nekaj dela i to, kak veli teca Franca, furt i navek. Dok to vidim čistam mi je lepo i toplo pre srco jerbo i to dokazivle kak je itak Međimorje naše malo lokomotiva napretka vu ovoj Lepoj Našoj. No, kuliko mi je to lepo tuliko sam ne zadovolen jerbo so dizalice i bageri ne naši nek so meštri i težaki došli z one strane Drave. Ne tak zdavnja je bilo kak smo se mi Međimorci štimali kak naši meštri delajo i ziđejo po celoj Lepoj Našoj i dok je nešči štel kaj mo bode nekaj vredo zazidano i napravleno unda je to dal Međimorcima v roke. Kuliko so hoteli, školi, šporcki dvorani, zgradi i kaj ne bodem dale nabrajal, naprajli naši meštri, a ve nam zidajo i delajo drugi. Nam zidajo drugi, a naši meštri morajo kruha iskati negdi drugdi vum z Međimorja. Nebrem veruvati da smo se mi Međimorci tak pohujšali kaj se zidarov, pigerov, tesarov i drugih meštrov dotikavle. Ne tak zdavnja, pred cirka dvajsti let, naši zidari i naši meštri so v belom Zagreb grado zazidali i na noge postajli nejvekšo hižo (čitaj: zgrado) veliko skorom sto metri odzaj za zagrebečkim autobusnim kolodvoro, a pred par let so nam sosedi Zagorci delali Vidikovca v Štrigovi na Mađerkinomo brego šteri je veliki sam tridesti metrov. Nebrem veruvati da so toga vidikovca ne mogli naši meštri na noge postajti. Kak teca Franca veli, a tak bi morali biti i med meštrima, pravi labodoritaši (čitaj: meštri) trenerajo doma i unda morejo vuni pobediti, a kak ve to dojde kaj naši meštri trenerajo na stranjskim igralištima (čiaj: gradilištima) i igrajo po stranjskimk igralištima. Ono kaj vredi se mora nejpredi doma sprobati (tak veli i soseda Barika, a ak smo negda znali se okoli zgradi i zidarije unda to i denes znuomo, pak naša Graditeljska škola još navek škola sakefele meštre. Kak zgledi mi jim denes nekak ne verjemo, a poznato nam je kak naša međimorska pamet rešavle i njemačke probleme!
Kak je to jako lepo rekel Dragec Domjaničov: – Če bi rekel Božičo, kaj želem si ja, rekel bi, naj vsakomo puno srca da!
