V sredo, 22. juljuša je zafremani novi deseti naš Hrvatski sabor. Došli so skorom si zebrani saborniki i za novoga precednika Sabora so zebrali staroga Gordana Jandrokovića i tak je Gordan postal prvi sabornik v Lepoj Našoj štrei je dvapot bil zebrani za precednika. Jempot nekomo mora biti prvi pot i Gordan je bil te sreče. Kuliko vidimo Jandrokovičovo političko sunce još navek sveti i to saki den se bole i bole. Ne znati kak mo je to pre Plenkijo uspelo? Teca Franca je rekla da to mora biti v pitanjo nekša tajna veza. Si znamo da je Jadrokovičov japa Zvonko bil rokometaš, a Plenkijov japa (a niti pak mama) se je ne bavil športom tak da je stoprocentno sigurno da je ne v pitanjo šporcka veza.
Za potprecednike so zebrani hadezeovci akademik Željko Reiner i Dalmoš Ante Sanader, istarski Talijan Furio Radin, esdepeovec Rajko Ostojić, a malo je zaškripalo pre precedniko Demokratskoga pokreta Mirijo Škorijo, ali je posle maloga odmora se došlo na svoje i Škoro je postal potprecednik Sabora. Kak smo se i nadjali mam prvi den je se zebrano kaj smo nucali i precednik i potprecedniki. Kuliko sam mel za čuti pre čakoski gracki vuri nejbole so gombali protiv ustaše Škorija i „talijana“ Furio Radina. Za Furia prepovedajo kak je došel v Sabor več po deseti pot i to sam z jenim glasom i to svojim. Do ve je navek bil sam sabornik na vlasti, jerbo so manjinci navek za ove na vlasti i to čim bliže državnoj kasi, a ovo leto, jubilarno trideseto, so dobili i potprecednika.
Ak je Škoro kriv kaj je z Pantovčakom zagospodaril Zoran Zoki Milanovič mesto Kolinde, a HDZ-eovci velijo da je kriv, unda, ruon tak, HDZ-eovci morajo zafaliti Škorijo kaj so pobedili na ovim zadjim izborima za sabornike. Najme kaj, ljudi (čitaj: biračko telo) so ne šteli kaj bi komunisti došli znova na vlast pak so svoje glase dali HDZ-eovcima. Biračko telo je znalo kaj oče, očem reči, neso šteli kaj bi na vlasti bili Škorijovi ustaše, neso šteli komuniste pak so svoje glase dali nejmenšemo zlu, a to so hadezeovci. Tak je to, dok jenomo presveti sonce (hadezeovcima i Plenkijo), drugima padne mrak na oči (esdepejo, Berijo i Restartačima).
Kak se je šepetujilo gospodar Pantovčaka Zoki Milanovičov je ne došel na zafremanje novoga Hrvackoga sabora, jemo je to ispod časti jerbo je on ne zebrani za sabornika nego za precednika i on nejbole zna kam mo se ide, a kam ne. On je pozval sabornike na sesijo i neje došel jerbo je jemo to prezaron v deseti vuri ak si znamo da se čovek staja okoli polneva. Pak ne bode on zbogradi zafremanja novoga Sabora menjal svoj dnevni raspored kaj mo bioritam ne odide po riti k meši.
Skorom si saborniki so došli na sesijo v maskama tak da ga med jimi bilo i onih šteri so ne zebrani v prvomo krugo nek so svoje mandate dobili v sudačkoj nadoknadi. A z maskom je teško prespodobiti čoveka. Ve vidite kaj korona dela z nas i naših političarov. Nešterni saborniki so ne šteli nositi maske jerbo je korona ne ušla v Sabor, neje prešla prag kak niti Mirando Mrsić, šteri ne podnaša branitele, a niti ustaše. Nejbole žilava je bila, kaj se antikorona maske dotikavle Karolina Vidovič Krišto, ali je i precednik Jadrokovič bil žilavi kak vrag i neje se dal. Rekel je: ak rat protiv korone traje unda rat vredi za se i moramo nositi oružje štero so nam naredili Vili Beroš, Kruno Capak i Davor Božinovič, očem reči, državni antikorona stožer.
Još jempot se je pokazalo i dokazalo da ono kaj nišči nebre politika to more. Neje zabadav negda nešči rekel da je politika „umijeće nemogučega“. Tak je bilo i v sredo na prvoj sesiji novoga 10. Sabora. Posle precednika i potpreprecedniki zbirani so nešterni važni odbori i tak so saborniki v Odbor za ljucka prava zebrali ustašo Zlatka Hasanbegoviča i četnika Milorada Pupovca i oni so to članstvo zeli na sebe i prisegnuli so pred sabornikima i celim biračkim telom Lepe naše da bodo mogli skup delati na dobro sih građanov i građanki Lepe naše. Ve vidite kaj se politika more??!
Prisegnul je i čakoski gracki načelnik Štef Kovačov i to na svoj drugi mandat. I posle toga je rekel ničim izazvan: „ Čeka nas izazovno razdoblje, a jamčim vam da ću i dalje štititi interese svih građana, a posebno ću se zalagati za razvoj i projekte od interesa Čakovca, Međimurja i cijele III izborne jedinice. Moja vrata uvijek su vam otvorena, bit ću vaš glas u Parlamentu!“ a nešči je nadodal: – Tako mi pomogel več skorom dve leti zaprti čakoski nadvožnjak! Sa je sreča kaj je biračko telo znova zebralo Štefa za sabornika kaj bodo došli na red i oni šteri več na leta čakajo na spominek z gradonačelnikom i sabornikom. Istina bog, jegova vrata so furt otprta sam ga ne nikoga nutri.
Korona nam je donesla još jeno nevolo, čakoski gracki oci i turistički težaki so morali hititi puške v kuruzo i otkazati ovoletošje Prcinkulovo kaj se nej kaj pohabilo v čakoskoj i međimorkoj sliki kaj se dotikavle betežnikov od korone. Več hajdi dugo nemamo niti jenoga betežnika, pak ne bi šteli kaj nam nešči zvuna dovleče na te naš „Falaček zemle med dvemi vodami“ toga virusa šteri još navek hercuje, očem reči, vedri i oblači po celomo sveto.
Si znamo da je naš državni stožer izdal depešo da se morajo nositi maske furt, navek i seposod, a mi Međimorci se toga pridržavlemo. Ali kak i navek naši ljudi so več i z maskama počeli tirati vodo na svoj melin. Najme kaj, nebre čovek i nesme dojti niti v jeden štacun brez maske pak so to skoristili tati i oni dohajajo v štacune z maskama i odhajajo z maskama, ali pod pazduhom si odnesejo ono kaj so si zebrali i to tak kaj ne platijo, očem reči, kradejo. Nišči jim nikaj nebre, pod maskama smo si jednaki i zabadav imate video kamere jerbo tam se vidi čovek pod maskom. Najgerek sam, jako sam najgerek kuliko bode kvara šteroga bodo naprajli te prefriganci pod maskama? Do ve so krali kaj so te v oči gledali, a ne kaj nej ve dok morejo prejti polek štacunarov kak polek turskoga grobja i nišči jiv nesme nikaj pitati jerbo imajo maske!?
