Velike vručine, vetri, vihori, toča, poplave, suše i korona ima utjecaja i na se nas, naš posel i naše ponašanje. Ve vidite kak to vreme zide dok čovek počne delati Božekovoga posla, očem reči, počne vedriti i oblačiti. Dok je tak kak je je več je nikaj ne kak predi i čovek niti sam sebe ne pozna i nejvečpot dela nekaj, a kaj niti sam ne zna zakaj ruon to dela i zakaj ruon to tak dela kak dela i zakaj je o nekim stvarima počel gruntati nekak čistam drugač nek do ve ili pak nešterne posle dela tak kaj niti sebe ne pozna. Dok nekaj ne znamo unda se zgovarjamo na vreme: vručina, pritisak sparina ili pak na korono štera to se magadi i to več hajdi dugo.
Tak nas je, na priliko, iznenadil i precednik Zoki MIlanovičov, šaka z Pantovčaka, kaj se dotikavle precednika, očem reči, precednice Vrhovnoga soda Lejpe naše, soda ober sih sodov. Več je hajdi dugo na to mesto rival gospo Zlato Đurđevič kaj je ne nikomo pasalo i da smo se si nadjali kak se bode organizerala bitka na brvno izmeđo Zokija , Plenkija i Njonje (čitaj: Jandrokoviča) kaj rešijo što bode ve pet let sedel vu fotelji štero je spraznil do fčerašji vrhovni sodec sih nas Hrvatov i naši Hrvatici, Đurek Sessa. Jeno jutro se je naš precednik Zoki stal na levo nogo i dok se je još pretezal na balkono svoje hiže, a da ga je pravzaprav ne nišči nikaj pital i to onak još v piđami objavil je svekolikomo pučanstvo kak si je on pregruntal (ili pak je senjal) da bi ipak nejbolši, nejspretneši i sima dober za precednika Vrhovnoga soda bil jegov partiski pajdaš i več hajdi let jegova leva roka , glavom i bradom, Orsat Miljenič. Zoki je rekel i hitil je kost Plenkijo i Njonji, nek si ve oni dale o tomo gruntajo. Ne znati kaj se je itak vu toj letnoj noči pripetilo da je Zoki tak naglo prešel z gospe Zlate na gospona Miljeniča. Verjem, očem reči, siguren sam da gej prejd, šteri se med tem održal v Zagrebo nema z tem nikše veze. A niti pak Natalija Prica?
Tak je stiha, nesam siguren je li je bila velika vručina ili je toča curela z velikom plohom, donešem Zakon o civilnim žrtvama minuloga rata. Mi v Lepoj našoj ga zovemo Domovinski rat, oni onkraj meje ga zovejo Građanski i to tak traj več tridesti let i nikak naši braniteli nebrejo zazvediti vu kakšemo so se to rato oni našli i borili. Na se zadje se ne bode niti znalo što se je protiv koga boril? Po tomo novomo Zakono meli bodo i oni četniki, šteri so bili logistika i nejso strelali (???) po nam Hrvatima, pravo na našo hrvacko penzijo. Morem vam reči, a tak velijo i si ovi šteri se bole razmejo v Zakone i paragrafline, da nigdi na sveto ne postoji to kaj mi kak žrtve štere so došli natepat i tirat vum z svojih grunti i hiži ve moramo plačati ove šteri so nas vum tirali i šteri so nam nejpredi postavlali barikade po cestaj, a posle so naše ljude tirali z jivi hiži, a v jimi so stanuvali od stoletja sedmoga. Velijo oni šteri se razmijo, da je toga Zakona na of naš svet donesel i sforseral (premijer v sjeni) Milči Pupovac, jerbo je jegov brat bil, ruon tak, četnik, ali ne svojom krivicom. Odvlekli so ga od hiže, oblekli ga v četnika, na glavo so mo naheznuli četnikušo z kokardom i tak so ga vozili od Vukovara, prek Lipika, Šibenika, do Dubrovnika tak da se bode i on ve mogel prijaviti za penzijo v Lepoj našoj i dobavlati ustaške kune, štere niti jeden četnik ne mrzi pak niti Milči Pupovac. Velijo da se bodo mogli prijaviti i ovi šteri so betežnike vozili z vukovarske bolnice na Ovčaro, oni so, ruon tak, civilne žrtve jerbo so tobož morali delati ono kaj so ne šteli. Ak ve malo bole pročitate to kaj se piše po Srbiji i Pupovcove Novosti zazvedili bodete da so protiv nas v Domovinskomo rato ratuvali sam šoferi, kuhari i medicinski brati i si protiv svoje vole i te kakši so nesposobni več bili so nam potukli cirka 16 jezer naših mladih branitelov.. Nigdar nej rekel da so protiv nas ratuvali kuhari i šoferi i da nam je trelo štiri leti kaj jim pokažemo što je jakši.Ne znati što je unda itak nosil puške, bombe, granate, što je vozil tenke i reoplane negdašje jugosoldateske, štera nam je delala nereda po Lepoj našoj i rušila se do čega je došla? Te smo još niti posle tridesti let ne našli.
Verjem da se zmislite, bar vi stareši da ste čuli ili čitali kak so zišli oni šteri so ne ratuvali v Drugomo rato i šteri so ne, kak se to veli, okrvavili roke, a bežali so pred Partizanima, Rusima, Bugarima i Četnikima, šteri so se skompali kaj oslobodijo, očem reči, počistijo Lepo našo od ustaša. Dok so partizani i drugovi genuli prema Lepoj našoj i prema Zagrebo si so se otprajli od hiži kak jiv ne zahačila roka (čitaj: nož ili metek) oslobodioca. Pobeči so uspeli, ali živote so ne uspeli spasiti tak da je 1945. odišlo pod pažo cirka šesto jezer Hrvata (Križni pot) i to sam zato kaj so bili Hrvati i nikaj jim je to ne pomoglo kaj so ne ratuvali, kaj so se ne borili i kaj so ne okrvavili roke.
Se isto 1995. Kak i 1945. Samo na drugoj strani, a ve bodo ovi četniki, šteri so sam drukali, a „neso strelali“ ili pak z bajonetom mahali meli pravo na penzije. I to naše, štere jim bodemo služili mi Hrvateki protiv šteri so se borili. Da bi reč rekel. I kaj se unda čudimo kaj ga takši norci ne nigdi drugdi na sveto?!
Vručine, vetri, voda i korona so nam još nekaj donesli. Obezglavili so Domovinskoga pokreta. Najme kaj, jenoga lepoga dneva dok je v belom Zagreb grado fest dežđ curel v Škorijo se je nekaj ftrglo i podnesel je ostavko. On, šteri je bil glavni osnivač, glavni kotač šteri je vlekel toga pokreta napre najempot je se to hitil v kuruzo i rekel je dosta. Brzčas je to moralo biti nekaj velikoga da je Škoro to napravil prek noči? Velijo oni šteri so ostali da oni ido dale i da ne bode došlo do nikšega stresa v temo jivomo pokreto, ali ne verjem? Mortik so puce i dečki z Domovinskoga pokreta šteli dojti bliže HDZ-ejo, ali je Škoro brenzal ili pak je Milči Pupovac ne štel Škorija, pak se je unda Škoro vugnol. No, ne verjem da je tu mel prste Milči jerbo ak Škorijovi zastupniki prejdejo na drugo (Plenkijovo) strano unda Plenki i Njonjo ne bodo nucali Pupija. Kak bilo da bilo nesmo još zabili kak so prešli Lesarovi saborniki dok so se jega rešili, a još friškeši nam je Živi zid dok so odišli na svoje i dok so počeli svojega kruha jesti odišli so po riti k meši. Nesam siguren je li ovi Škorijovi znajo kaj jiv čaka?
