309[layerslider id=”6″]
Posle dugoga i teškoga betega (22 leti je minulo otkak je završil rat na ovomo našemo hataro) soci v Hago so donesli presudo srpskomo generalo Ratkijo Mladičo šteri je držal cugle rata vu svojimi krvavimi četničkimi rokami. To kaj bode on v rešto do kraja svojega živleja nam v Lepoj Našoj nikaj ne vredi jerbo je ne rešta dobil zbog naše Škabrnje, de si je nejpredi zakrvavil roke, nego zbog sega onoga kaj je delal po Bosni. Kak da se v Lepoj Našoj nikaj niti ne pripetilo? Kak da so soci v Hago i Srbi na istoj valnoj dužini. Na se zadje bo došlo do onoga kaj govorijo četniki, a podržavlejo naši antifašisti, da je rat v Lepoj Našoj bil građanski. I na jednoj i na drugoj strani so ratuvali građani, sam so jedni bili z Lejpe Naše, a drugi (četniki) so došli z Srbije. Ali koga to več denes interesera jerbo je od rata več minulo hajdi cajta.
Kakšo god presudo donesejo soci v Hago Srbi to nikaj ne priznajo. Za jif je i Ratko Mladič bil heroj makar so za jim ležale stotine i hiljade mrtvih. On je branil srpsko zemljo od neprijatelov i to seposod kud je išel. Očem reči, da si mi v Lepoj Našoj moramo kupiti reoplane, tenke, haubice jerbo Srbi so još navek ne prestali senjati Veliko Srbijo oliti mejo na liniji Virovitica – Karlovac – Karlobag.
Dvajstidve leti je minulo od zadjega Domovinskoga rata, a mi smo još niti ne završili onoga Drugoga rata v šteromo so ratuvali partizani protiv sih drugih. Otprla se je Vojna arhiva v Beogrado pak so paperi pokazali kak se je v majušo 1945.leta po Deželi se do Baljburga motalo 536 833 zarobljenikov kaj vojnikov – ustaša, domobrana, Nemcov, Crnogorcov, civilov, žena i dece i da so se partizani jako kcoj držali kaj jif čim vejč sfondajo. A kak so se držali kcoj k tomo poslo nam govori i to da je Križnoga pota ne preživelo niti deset posto zarobljenikov. Dežela je čuda vekše grobje Hrvatov, kuliko ve vidimo, nek je bil Jasenovac za Srbe!
Pred dva tjedne smo obiležili dvjastišesto obljetnico od pada Vukovara. Si znamo da je to bilo 18.novembra 1991. leta. Pred sedem let, 2010. leta je naša državna televizija spituvala študente na Filozofskomo fakulteto v Zagrebo je li znajo kaj se je pripetilo na te den v Lepoj Našoj. Nebudete veruvali, ali niti jeden študent je ne mel pojma kaj se je pripetilo 18.novembra 1991. leta. Pitam se pitam, kak sebe tak i vas, kaj delajo te profesori na Filozofskomo ( Ivo Goldštajn, Hrvoje Klasič, Tvrtko Jakovina) i kaj vučijo našo deco ak jif nikaj ne navčijo o Domovinskomo rato na čijim fondošima je zrasla Lejpa Naša. Brzčas oni imajo nekšo svojo povjest ili pak još ratujejo protiv „ustaša“? Najbrž se znova bavijo z Oktobarskom revolucijom v Rusiji?
Zadjipot sam pisal o Tesli kaj je on bil i kakši je bil. Rekli smo da je bil genij jerbo se je ne oženil i neje se motal okoli ženi. No, kaj ne bode zišlo kak so žene nejvekša nevola ovoga sveta, moram vam reči kak je Tesla ipak ne završil fakulteta i zakaj ga je ne završil. Študeral je v Graco i prve dve lete je bil nejbolši i naprej od sih za kakšega Teslo i mi znamo, a unda je na tretjemo leto ostal brez vojne štipendije i počel je malo vejčpot hoditi v krčmo. I ne sam kaj je vejčpot odhajal nek je i duže ostajal, kak bi teca Franca rekla počel je lumpati, tak da so predavanja, ispiti i fakultet ostali v drugomo plano. Tesla, kakšega ga ne poznamo, je počel piti, pušiti, igral je šah, biljaril se i na se zadje je završil za kartaškim stolom. To je ne moglo dugo trajati, dok je mel peneze se je potepal, a kak so ga karte ne baš išle dok je zgubil se kaj je mel odišel je z Graca, fakulteta i krčme. No, to kaj je ne mel fakulteta ga je ne nikaj posle smetalo kaj se posvetil znanosti i kaj je zmislil čuda sega kaj mi denes nucamo, a još dosti toga kaj se bode zutra nucalo.
Dok je Ivica Todoričov podržal poverenstvo za istraživanje Agrokora unda so ga Drašek Plenkovič, Vlada i Sabor ukinuli. Vidite, i Ivica je bil najgerek i on je štel zazvediti zakaj je jegov Agrokor došel v takšo žabokrečino i de je fuljal? Ali ve smo poverenstvo zaprli i nigdar se ne bode zazvedilo v čemo je bil Ivičin veliki greh. Teca Franca je rekla: Martin v Zagreb, Martin Zagreba, kaj bi rekli bili smo v Rimo, a Papo vidli nesmo. Poverenstvo nemamo, a i ne znamo što je kral, a što pak je vrečo držal? Ruon tak se ne zna što je vgasnol svetlo dok so se vreče z penezi nosile vum z Agrokora? Nikaj se ne zna, očem reči, sam se zna da je Agrokor v riti, a da pak vu tom poslo si računajo na naše cusrave i prazne žepe. A Todoričo nikaj ne fali, se ima i čim mo vejč jemlejo vejč ima. To je te naš perpetum mobile za šteroga nišči nebre reči kak dela i što ga tira. Negda so naši stareši rekli: živleje je ringišpil, a tirajo ga cigani! No, verjem da denes to ne vredi, očem reči, ne tirajo ga cigani nego ciganija. Nešči je podel nogo Todoričo i Agrokoro, Janezi so svojega Merkatora odvlekli nazaj v Deželo, Srbi so privatizerali svojega Konzuma, tak da ve Kaufland i Lidl morejo po Lepoj Našoj delati se kaj očejo. A kaj delajo, zobačijo naše peneze i nosijo jif k sebi. Ameri i Rusi, prek naših političarov, se svadijo čiji bode Agrokor, a Švabi trgujejo i sam se stiha smejejo. Ne znati što je vužgal ogja pod Todoričovaj petaj, ali kuliko vidimo Švabi se nej bole grejejo!
Saka varoš v Lepoj Našoj ima svojega Lera, a nesam znal da se si ti Leriji motajo okoli smetja. Si znamo, a još dendenes se vidijo vreče pune smetja vum z Varaždina jerbo se naši sosedi Zagorci nebrejo dospomenuti što bode držal kaso kaj se smetja dotikavle, očem reči, što se bode delil dobička. Čim Zagorci to rešijo mam bode predelala fabrika za pospravlanje smetja štera je napravlena pred deset let sam se čaka kaj počne laufati. A nebre se hapiti predi nek politika da svoj blagoslov. A, si znamo kuliko košta blagoslov politike, očem reči, političarov. Kak teca Franca veli: politka je zabadav, ali političari koštajo!
Pred mesec, dva je na svetlo dneva došla istina kak naši komunalci mešetarijo z smetjom. No, ne ruon z smetjom nek z kamijonima šteri vozijo i odvažajo smetje. Kupuvali so kajkakše aute, a na se zadje i hibridne, a unda so jif predelavali na plin sam kaj bi se smetje čim faleše vozilo. Ali neje se ruon tak zišlo kak se babi snilo… Na se zadje so tua predelavanja koštala čuda vejč nek je trebalo, ali i čuda vejč nek vredi. Negdi tuliko kak farbanje tunela Sveti Rok na ličkomo autobano.
Dok je Mladen Jozinovič došel za direktora na smetlišče Piškornica štero pobira smetje z štiri županije neje znal je da mo je sekirka pala v med. Njepredi je zasukal rukave i počel je delati kaj se je i očekivalo do jega, pak je nekaj i moral delati za 18 jezeri kuni na mesec. Kak je vreme išlo, politika mo je prevzela pol posla, a i kum je nekaj pripomogel, tak da so črveki v Mladenovoj glavi počeli frfljati i on si je počel gruntati kak bi čim vejč penez z kupčeka šteri ostaja spravil vu svoje žepe. Znate kak je to, dok čovek saki den vidi „ničije“ peneze unda mo vrag neda mira i sploh ga nekaj v kvar vleče. Ne znati što je Mladena vpotil kaj je sam sebi dal nagrado? I to ne bilo kakšo, nek milijon kuni. Pak ak je več porinul roko v ljucko kaso unda to nek bode za hasen. Brzčas čovek ima praf, jednako bi se kričalo da je zel na pol meje kak se i ve kriči. No, ne znati kam je to čovek itak potrošil? Mortik je nosil v kockarnico? Ali v kockarnici sam gazda navek dobavla, a si drugi kak-tak. A kak mi je rekel sosed Tonča, ljubavnice so jako drage. Ne bi rekel da je Mladen mel ljubavnico, on je bole na Teslo. A to mi je i kum potvrdil.
Kuliko sam mel za čuti, neje te milijonček se kaj je Mladen zvlekel z Piškornice. Revizori so našli da se je Mladen doškoloval črez celoživotno školovanje pak je potrošil nekaj vejč od dva milijone na intelektualne usluge. Rekel sam vam več, teško je gledati ljucke peneze šteri so vam polek roke. Malo, malo pak vam roka podleti. Ve mi znamo zakaj nam naši komunalci tak čuda penez jemlejo kaj nam to malo smetja otpelajo od hiže. Saki, čovek, saki šrajf, saki auto košta, a i kumi nekaj vredijo?
Nebrem veruvati da je Ivek Perhočov odbil mesto direktora v Piškornici? Pak da je tam se vredo nej ga niti zvali, nej došel na red, ve ga zovejo kaj reda napravi, a on to zna. Neje štel iti kaj znači da bode i dale čakal na red kaj se sprazni prinas mesto za direktora. Vidite, kak je on zišel, odišel je za župana i mesto direktora se je popunilo. Najgerek sam, jako sam najgerek je li je mesto župana tuliko vredilo, očem reči, je li je vejč dobil ili pak je čuda vejč zgubil. On to zna, ali mi je ne štel reči. Mortik drugoč!
