[layerslider id=”6″]
Kaj bi malo pozabili na Istanbulsko konvencijo, mi obični smrtniki, političari so nam pustili za goler drugo vuš, a to so avijoni za našo vojsko. Poverenstvo za kupuvanje avijonov je došlo do toga da je bole kupiti stare sprobane avijone nek one glanc nove vu šterima se je još ne nišči nigdar pelal. Rekli so: nejso novi avijoni navek nejbolši jerbo so ovi stareši več hajdipot sprobani, pak se unda zna se kaj morejo. Tak vam je nekak bilo i z sosedom Barikom, to mi je ona sama pripovedala dok smo skupa krampose čakali, dok je prvič podlegla neje niti znala kaj se zna i more, bilo je to tak kaj se posel zbavi i kaj se želja vgasne, a ve dok ima več hajdilet staža vu venodjanjo, dok je rezlaufana kak tre, ve je to čistam nekaj drugo. I ve ne pušča čoveka doli dok je joj ne dosti i kak veli, ne nuca ona nikšo konvencijo nek dobroga moškoga. Nekak mi denes nejde, pak sam počel z avijonima, a odišel sam na sosedo Bariko, mortik to zato kaj je Barika dobra kak avion.
Nešči je odnekod spuknul vest, očem reči, odnekod je zazvedil da so te židoski avijoni trebali iti na servis, pak so si ovi prefrigani Židovi pregruntali da jim je čuda bole da te avijone prodajo drago takše kakši so je i prešparajo peneze za servis, a z onima šteri so jif kupili bodo več nekak na kraj došli. Ili pak se, na se zadje, posvadijo do ovi platijo. A avijoni so ne tak hudi kaj nej tak dugo leteli dok penezi ne dojdejo. Teca Franca mi je pošepetnola, Jožek, to ti je po onoj staroj: drži vodo dok majstori ne odidejo! Što zna mortik teca ima praf, ali to kaj avijoni morajo iti na servi to je rafangerač Tonča prvi pripovedal na sam sveti Vuzem i to posle kak se je šunke najal tak da mo to ruon nebremo zeti zdravo za gotovo. Znate kakši je Tonča, on nebre biti žejen dok se naje, a unda Božek pomori!
Težaki na burzi, makar jif je se meje i meje, so posle božičnice dobili i uskrsnico, očem reči, vuzmenko. Na se zadje se je Vuzem itak izboril za svoje mesto pod suncom tak kaj se bokcima ili točneše rečeno, onima šteri nejmeje imajo i nejmeje dobavlajo, da nekša pomoč. Nejso to nekši veliki penezi, ali čoveka šteri nema jega i to veseli. Ne znati vi šteri ste nigdar ne bili vu takšemo dreko kak saka kuna more k hiži donesti veselje. Malo sam zglajzal, na sam Vuzem so si težaki z burze morali dojti po vuzmenko ak so jo šteli dobiti. I ve mi bode nešči rekel kak je to ne nameščeno, najbrž je bilo tak kaj so oni šteri imajo na burzi sosede, rodbino, strica, ljubavnice, ljubavnike te so zazvedili za to, pak so posle i dobili, a si drugi šteri so ne došli ve se morejo slika. I to o svojemo stroško. Pak vam furt pripovedam da ga ni med cvetjom ne pravice.
Za sam sveti Vuzem je na svetlo dneva zišel priločki list „Pikač“ šteri več skorom osemdeset let pika Priločance. Negda meje, negda bole, negda slabeše, ali ipak pika. Morem vam reči da je to jedini list v Lepoj našoj šteroga financera gracka vlast i unda se ovi kaj pišejo žnje delajo norca. Pak nešči mora z ljudi delati norca na prvi april ak so ljudi več zgubili voljo kaj bi jeni z drugi „hrmake“ delali.
Probajte vi v Čakovco takše nekše novine napisati štere bi se norca delale z čakoske gracke vlasti pak bodete vidli de bode završili. I vi i novine najbrž bodete, črez kratek cajt, završili v Totovco na smetliščo i to v onomo nesorteranomo smetjo. Saka varoš ima svojega huncvuta sam nešterni se vupa pokazati, a nešterni se sam z sobnom spomina pred špiglinom v šekreto.
Pikač piše kak je priločko Gracko veče doneslo uredbo da se sme piti vino. Velijo oni da se vino pije sam dok je čovek žejen i dok je ne žejen. Dok si čovek malo bole pregrunta to je po Istanbulskoj konvenciji jerbo, velijo naši stareši, vino je kak žena i tak se prem jemo tre obnašati. Ne ga smeti bantuvati dok je ne dobre vole, ne ga smeti v roke jemati ak ne misliš nekaj žnjim naprajti i kaj nam dale nabrajal i ve z toga zide da je bole haklik, očem reči, šegavo nek žena, a mi moški ga ipak rajši i gosteše jemlemo v roke od ženi. Zakaj? Nigdar se ne buni i nigdar nikaj ne gomba ak mo je ne nekaj po voli. I još nekaj, najbrž je to ne po Istanbulskoj konveciji, to je brzčas v pitanjo Urbanska konvencija. Čim žene zazvedijo da se vino pije po toj našoj domačoj Urbanskoj konvenciji bodete vidli da se bodo i one bole rivale kcoj sam kaj i jif zrivlemo vu to našo moško konvencijo i to sam zato kaj bi jif saki den v roke jemali, očem reči, rabili! I to večpot!
Furt i seposod se pripoveda kak tua nezerenska Istanbulska konvencija oče kaj mi moški ne bodemo i dale delali nasilje nad ženami, očem reči, kaj jif ne bodemo bili i grdo se žnjim spominali. Prosim vas lejpo dopelajte mi čoveka šteri to vupa doma naprajti. I to dok je trezen? Pak minula so tua vremena dok je moški bil zakon pre hiži, očem reči, dok se je jegova reč posluhnula. Denes je to čistam drugač i ve još konvencija oče kaj ženama zabetonera glavno i prvo mesto v hiži. Vi znate da se odnegda jezik z šterim govorimo zval materinji jezik, a tak se i denes zove, i to sam zato kaj so još negda ne japeki mogli dojti do reči. Prosim vas lejpo, je li je to nasilje nad ženami dok se venodjamo tak kaj sam ja gori, a žena doli. Ona je još nigdar ne gombala, nejvečpot me niti doli ne pusti dok očem oditi predi nek dvapot ne napravim posla. Dvapot je dvapot. A ovi v konvenciji velijo da je to nasilje. Ak je do toga došlo unda si bodem ja svoje veša sam pral na roke, kaj nem završil v rešto po toj konvenciji.
Rečite mi, prosim vas lejpo, da nek perem posodo i peglam veša, a kaj se moja pajdašija ne bode z mene norca delala, kaj bode ženica zadovolna, a kaj bodem tu i tam ftegnul dojti na tankštel k Juliki v alkoholno radijonico? Sam mi to rešite i več nigdar ne bodem nikaj pital!
Najte me krivo razmeti, ali kaj nam furt mašejo pred očima z tom Istanbulskom konvencijom, a Turki so jo još ne niti potpisali. I se si gruntam da Turki doma perejo posodo i peglajo? Kaj ne vidite kaj delajo po temaj serijaj. Sam lojsajo! I dok to se vidim, čujem i čitam, ne znam kaj bi bil: Nori (lud), zbešeni (zbunjeni) ili pak spameten (normalan)?
Na sam Vuzem so na čakosko Hitno dopelali čoveka z Nedelišča z črnim jajcima. Kak so rekli, nešči mo je pofarbal jajca na črno dok je on spal, a ve ga to jako boli. Mlada i fajna doktorica se je podsukala i zela stvari vu svoje ženske roke (mimo konvencije) i se se je zbudilo i zazvedilo. Gospon je malo predugo ostal na vuzmenki i neje ruon bil nejbole pri sebi tak da se je niti ne zmislil što ga je i da, med noge vritnul!
