309[layerslider id=”6″]
Počeli so spominki i to se glasneši i glasneši. Nejpredi se sam šepetujilo, unda so se sam vodovodači med sobom spominali, a ve so spominki več i v novine došli. Najme kaj, spominkuju se kak bode voda podražila. I to sam zato kaj so jim cevi porozne i nikak nebrejo dobiti tuliko penez kuliko vode preteče črez glavne vodomjere jerbo se hajdi vode zgubi po cevima. Velijo vodovodači da so jim cevi cusrave. Pak kaj jif ne zamenijo? Nemajo peneze? Pa, kak nemajo peneze, a kupili so veliko MTČ-ejovo hižo i ne sam kaj so so kupili nek so jo i zlišpali, a to je ne koštalo malo. Nemajo peneze, a kupili so još i ono Topoljnjakovo zgrado polek zaobilaznice. Pak so to se ne kupili za gombe. I to je još ne se: mi v Međimorjo več zdavnja imamo si vodovode i pipe z šteri teče voda v saki hiži, a naši vodovodači još navek pobirajo naknado za razvoj (ne znati čega, mortik uprave i upravni zgradi) i to tri kune po kubiko, a vodo plačamo nekaj prek štiri kune. Kaj velite, lepo štibro so nam vudrili i nikak da se toga rešimo. Ali morem vam reči so ne oni krivi nek mi šteri čkomimo i plačamo. Pak so ne bedasti kaj to zemejo vum z računi, ak se tu naberejo lepi penezi. A ve očejo podražiti vodo kaj bodo zamenili cevi v zemli. Nejbole bi bilo kaj bi prodali MTČ-ejovo zgrado pak bi meli dosti penez za se nove cevi, a ne sam one štere so ve cusrave. Još sam pozabil reči kak nam još jemlejo cirka, okoli 35 kuni saki mesec za to kaj so nas prevezali za mrežo štero smo si sami naprajli i to navek makar smo ne potrošili niti kapljo vode. I dok to se skup denemo unda so nam čeki za vodo vekši, i to hajdi, od oni za strujo.
Dok ne znamo zakaj bi nekaj podražili unda velimo da so tak ovi v Briselo rekli, očem reči, da je tak Evropa rekla. Pak kaj Evropo brige počim mi pijemo vodo, počim nam jo naši vodovodači prodavlejo. Nebrem razmeti zakaj bi Evropa gledala v naše lončeke z šterih pijemo vodo, a posle i račune kuliko plačamo, a napriliko ovi v Irski i još nešternaj zemlaj te iste Evrope, imajo vodo zabadaf. Nešči nas pak oče prepelati žejne prek vode i to prek računi za vodo!
A to da so nam cusrave cevi to nek prepovedajo nekomo drugomo. Morejo maloj deci predi nek ido spat, ali to sam ovima v jaslicama jerbo so ovi v zabavišto preveč spametni i ne bodo veruvali. I još nekaj, a zakaj bi mi morali plačati ono vodo štero smo ne potrošili i štera scuri črez lukje na cusravim (?) cevima, pak tua je voda došla vum zemle i sceja se nazaj v zemlo. I kakše stroške imajo tu vodovodači – to vas ja pitam?
Navelikom se pripoveda kak so Bosanci protiv toga kaj bi mi delali Pelješkoga mosta i to na svojemo hataro i v svojemo moro, a blizo Neuma. No, neje to se ruon tak kak se pripoveda, pak so ne Bosanci, kuliko sam uspel zazvediti, protiv Pelješkoga mosta nek so protiv ovoga mosta z Neretve vu šteromo vedrijo i oblačijo Božo Petrov i Nikola Grmoja. Toga, velijo, tre vruhnuti kaj ne bi znova došel na vlast.
Kotač sreče se furt obrče i što je bil gori padne doli, a što je bil gori zdigne se gori. Tak bi se moglo reči i za našega glavnoga policiskoga načelnika. Pred pet let Kruno Gosarič je došel gori, a Ivek Sokačov je moral oditi doli, očem reči, v Prilok, a ve pak je Krunči moral oditi doli, a Ivek se je vrnul z Priloka i pak je na vrho. Brzčas to tak mora biti. Pred pet let so državni policaji zebrali iskustvo, a ve pak so si premislili pak so zebrali mladost. Ili pak ljepoto?
Nekaj se kuha v esdepeovom državnom lonco, i ne da se sam kuha nek i vri. Kuhari ga ne dosti nek prekpreveč. Jeni kuhajo, drugi na ogej mečejo, a Milanka Opačič furt meša tak da ne znati kaj bode z toga zišlo. Velijo da si Gordan Maras furt nekaj grunta i cele dneve premišlavle (niti ne spi, ne vupa niti z okom trepnuti kaj mo nej nekaj pobeglo) kak bode zgledalo bolše zutra Partije. Ne znati na kaj bode to zišlo jerbo je bil na snimanjo glave i nejso mo nikaj našli.
Kak sam več rekel, kotač sreče se furt obrče i nigdar se ne zna, bar denes, da bode postal i komo bode kaj v žep porinul. Negda, pred cirka, okoli deset let je finska Patria dala našemo negdašjemo precedniko peneze kaj od jif kupimo oklopnjake za našo vojsko. Unda se je to navlačilo po sodaj i na se zadje se je zazvedilo da se je ne nikaj zazvedilo, očem reči, da se je ne nikaj pripetilo. Najme kaj, finski soci so došli do toga da je jiva Patria dala peneze, a naši soci so, na se zadje, ne uspeli zazvediti komo so dali. Penezi so odišli z Finske v Lejpo našo, tak je bar putni nalog bil napisani, a k nam so ne došli. Morete si vi gruntati kaj očete, ali tu so deli točko na finsko mitologijo, očem reči, mito.
A Mađar Orsago i v jivomo MOL-o je bilo čistam nekak drugač. Oni so 2003. leta kupili našo INO. Zmislite se da so prvoga frtalja prodali Ivek Račanov (Božek v šteroga je ne veruval nek mo da dušici lefko) i jegov financ-minister Slavek Liničov. Mađari so kupili frtalj, a šteli so se gospodariti i hercuvati črez pol. Do toga so i došli, ali to je i koštalo. Zna Slavek kuliko so dobili!? Mađari so ne škrtarili, dali so se kaj so naši poštejaki iskali. Ali minulo je nekaj vejč od deset let, čuda je vode preteklo cpot po Trnavskim mostom i ve se čistam druga pesma popevle ili pak fučka. Najme kaj, naši Uskoki so zazvedili da so Ivo i Ježič dobili ojere z Mađarske, a jivi soci ne priznajo da so Mađari dali mito jerbo penezi nigdi ne falijo. I kaj si ve moremo? Pak se ve ne bomo sfadili z Mađarima ak smo si žjimi zdobra več duže od 500 let, još od Mikule Zrinskoga. Lefko so si oni z nami zdobra ak je se tak kak so oni šteli. No, pak i mi Međimorci smo si navek bili z dobra z Mađerkaj. Ak ne verjete meni pitajte Eržiko, Žužo, Ilonko… A i pajdaši Feri, Dragec i Vinkec bi o temo mogli nekaj reči!
Rred dva tjedne smo preslavili Den međimorskih branitelov i Den oslobođenja Međimorja od četnikov i jugosoldateske. Dok se je to obiležavalo v Čakovco, Grad Čakovec, očem reči, gracki oci so odišli z doma. Vidi se kuliko držijo do naših branitelov, kuliko do onih šteri so svoje živote dali za ovo slobodno i neovisno Lejpo našo. A pol onih šteri so na zido jif je bilo z Čakovca.
Nek to napravijo partizanima, antifama i Zvonkijo Golobo za 6. april ak vupajo. Da to napravijo več nej bili zebrani!
Varaždinci i Zagorci so tjeden dni posle nas preslavili Oslobođenje Varaždina i Den jivih branitelov. Na te den se je jif gradonačelnik Ivek Čehokov pofalil kak se je se v obrani Lejpe naše hapilo vu Varaždino. Ne znati zakaj nas prvi sosedi zamečejo? A si znamo da je 17. septembra se genulo z Čakovca i čakoske kasarne, kak oružje, tak i braniteli. I mi Međimorci smo nejpredi pomogli Zagorcima kaj se i oni rešijo jugo vuteski. Što zna kak bi to se bilo da je ne bilo nas Međimorcov, a sosedi so to več zabili. Ne fletno nego prefletno!
Cirkovljančan, Tonček Mikecov, se je znova javil kak je i obečal. Najme kaj, Tonček je znova respisal natječaja za spametne študente z Međimorja šteri bi šteli završiti visoke škole, a nemajo dosti penez. Verjem da se zmislite kak je gospon Mikec lani dali pedeset stipendiji našim študentima šteri so bili dobri đaki, očem reči, izvrsni i nastajli so študerati. Tonček oče stipenderati one šteri bodo Međimorje naše malo i Lejpo našo vlekli naprej kaj nebomo furt ozadi. Fala gospono Tončeko kaj je tak široke roke i dobroga srca, kaj pomaže dobro deco, a ta deca bodo zutra to vrnula tak kaj bodo Lejpo našo vlekla naprej. Tak bode sima nama bolše. Da ga vejč takših kak je Tonček de bi nam bil kraj? Nebrem nikak zazvediti kak se je Tonček uspel rešiti međimorskoga jala? Brzčas je kak mali odišel z našega hatara!!?
