309[layerslider id=”6″]
Nebre nam v Lepoj našoj nikak biti dosadno, nikak nebre dojti do toga kaj bi hmajikovali i kaj nej meli kaj delati, očem reči, kaj ne bi meli o čemo gruntati. Nebre minoti niti leto dni kaj se pak ne bi nekaj pripetilo o čemo si moramo se znati, si moramo reči kaj o tomo gruntamo i kaj bi naprajli kaj se nej zrušila dvorac od karti šteri se je tak dugo delal, a ve se kani, tobož, sam od sebe vruhnuti. A si znamo da se je nekaj ne samo od sebe naprajlo, a ruon tak se ne bode niti samo od sebe vruhnulo kak nam to „mali Ivica“ oče reči. Verjem da znate o komo i čemo vam pripovedam: dvorac ili kula od karti, kak smo ve na se zadje zazvedili, je Agrokor, a „mali Ivica“ je jegov gazda Todorič. Dok so prinas v Međimorjo odhajale fabrike po riti k meši, očem reči, odišle so nejpredi v stečaj, a posle pak v ropotarnico povjesti, unda smo se o tomo spominali mi Međimorci i tu i tam nešterni resorni minister, a ve dok je Ivica v pitanjo ve so si na nogaj, niti ministri spijo kak treba, a niti pak premijer ima mira, kaj nem spominjal ovo družino z Mosta. Ne sam da so se domače snage na špagi nek dohajajo i stručnjaki za nevole z celoga sveta. I Rusi nemajo mira. Nišči je još, do ve, ne uspel zazvediti kaj bode z „malim Ivicom“ šteri se je zaigral z penezima štere si je posodil, kaj bode z Agrokorom šteri več dugo ima gripo (i to ono nejhujšo) i ne znati je li bode preživel, a ruon tak nišči ne zna kaj bode z težakima? Oni bodo brzčas preživeli, ali ne znati od čega? Ruon tak ne znati kaj bode z dobavljačima sake fele šteri nebrejo nikak do penez za se ono kaj so tobož prodali Ivici i Agrokoro. Ve si znamo da je Ivica bil preveč pošlokjeni i da je kak takši postal nejslabeša karika v Agrokorovom lanco, a ruon tak nam je poznato da je lanec tak jaki kak dugo zdrži nejslabeša karika, Kuliko vidimo tua nejslabeša karika je popustila i se ostale karike so popušile, a lanec je odišel po riti k meši. Dok je Ivica došel do roba provalije unda je ne stal korak napre nek se je obrnul i poiskal pomoč od politike i političarov jerbo oni se znajo, se morejo, a nejvečpot nikaj ne napravijo. Ali Ivica je napre poslal svojega čoveka Zdravkija Mariča kaj bode držal v roki ključe od državne kase kaj bi si tam dale posojaval peneze jerbo tam ga nejveč je, a i ne tre, nejvečpot, vrnuti. Nejgerek sam, jako sam najgerek kaj bode itak z toga zišlo i jeli se bode i dale z te Agrokorove mele kruh jel? Bar kaj bi se našlo kruha za težake i dobavljače? Ivica se je ionak za sebe pobrigal, bar za prvih dvesto let.
Kuliko vidimo ne rušijo sam naši športaši rekorde nek to delamo i mi obični smrtniki. Pred dva tjedne so naši policaji prijeli D. Oršuša šteri je malo švindlal po cesti i dali so mo frulico kaj malo zaigra v jo. Nejpredi je frulica malo duže igrala, a na se zadje je pokazala čisto petico. Gospon Oršuš je bil nejpredi vesel jerbo je tak visoko ocjeno nigdar ne dobil v školi, a unda mo je v pipi vgaslo jerbo so ga policaji otpelali v rešt. I policaji so ne bili ruon sigurni vu frulico, pak so jo dali na kontrolo jerbo se je gospon čistam vredo ponašal, kak da je spil sam par gemišti kak je rekel, ali kontrola je pokazala svoje i Oršošo je ostala ocjena 5,00 štero si je napuhal. Ve vidite, denes je več nikaj ne kak je bilo predi, malo predi smo rekli kak Ivica i Agrokor delajo i živijo z pedeset milijardi duga, a po cesti se vozijo šoferi z pet promila alkohola v krvi. Došla so nekša nova vremena i čistam je čudno kak to naša kugla zemaljska se predrži i dale se pomalem obrača v isti kraj?
Ruon tak je ne moči razmeti kakši smo to ljudi mi Međimorci? Kaj se bole brigamo za smetje kaj ga na vreme preberemo i otpelajo ga komunalci tua de mo je mesto, unda zazvedimo da se dosti smetja reshitavle po senokošaj, smradijo se šumice, grmje, parki, škarpe, bereki, skradnice i kaj ne bodem dale nabrajal. Jen tjeden se falimo kak se brigamo za se ono kaj nam ne treba i to kak smo dva – tri korake napre od sih drugih v Lepoj našoj, a drugi tjeden se seposot okoli nazobači par kamijonov smetja štero smo posijali onak črez oblok auta ili pak z haube v nočnoj šihti. Svojega grunta počistimo, a kaj ono se okoli kak da je ne naše i to lefko smradimo. Tak ne bodemo dauko došli!
Kuliko smo mogli čuti pred pajcekima, svijama, prascima i maroscima v Međimorjo so lepši dnevi. Tak so nam bar rekli „Brača Pivac“. Oni kanijo oživeti one velike koce po Međimorjo v šterima so negda rasli pajceki, očem reči, svije. To je nekaj lepoga, ak ne i nejlepšega, i dobroga kaj smo ove dneve čuli. Dok se političari z jedne strane spominajo o izboraj, koalicijaj, izbornaj listekaj, mesarima so pajceki i svije na pameti. Lepo je to čuti, jerbo si znamo kuliko ga prazni velikih koci po Međimorjo i ak bi se znova to napunilo z pajcekima unda bi pak Međimorje cvelo i postalo obečana zemlja za se one šteri očejo delati. A i za pajceke! Ruon tak smo zazvedili kak „Pivci“ nucajo hajdi pajceki i sviji i to čuda vejč nek prinas v Međimorjo more zrasti, očem reči, da bodo si šteri se bodo prijeli toga posla meli komo prodati svoje prasce. I unda več ne bodo ovi pre čakoski gracki vuri pripovedali kak smo potepli Vajdo, a tak dugo smo se štimali žnjom!
Ne znati kaj bode itak z čakoskim nadvožnjakom. Mogel bi reči da ne mine den da se nešči za jega ne spomina. Političari ga nucajo kaj bi prek jega, kak ovi v Metkovičo prek Mosta, dobili izbore, a ljudi šteri se vozijo prek jega ga kunejo kak je grabasti, kak se respada i kak se je teško prek jega prepelati, a još teži pešice prejti. Znate kak je to, pešice nejveč hodajo stareši ljudi, a nadvožnjak je ne tak mali kaj bi to bilo tak lefko naprajti. Stare kosti štere škriplejo, noge štere ne poslušajo, srce štero preskače, tlak šteri je furt na najgi nikak si nebrejo dopustiti luksuza kaj bi čistam lefko prešli prek nadvožnjaka, a spot pod nadvožnjakom ne smeti iti jerbo cugi vozijo, a i Trnava negda teče. Mortik bi trelo složiti nekšo vlečnico štera bi ljude vlekla gori, a za doli bi se več nekak premočili, bar tak dugo dok političari ne spunijo se ono kaj so nadvožnjako i Čakovčancima obečali.
Ve smo zazvedili da i ovi na televiziji lažejo, očem reči, ne govorijo istino jerbo niti priločki gracki oci i gracki težaki nemajo tak velike plače kak so ovi na erteelo rekli, a niti pak čakoski. Ovi v Priloko so nam i pokazali na papero kakše plače dobavlajo, a ovima v Čakovco moramo veruvati na reč. To vam je isto kak da se je Tonča kartal v Osterajho i furt je gubil, a unda je zazvedil kak nišči ne kontrolera karte nek se si kartajo na povereje. Čim je to zazvedil mam je i jega karta krenula i počel je dobavljati. Nekaj slično je i v čakoski gracki upravi. Ne bi znal točno reči kakše so plače, ali znuom da so ne male. Još je ne nišči odišel z gracke uprave šteri je tam hapil delati i si tam čakajo i dočakajo penzijo. Bokci so sigurno ne. A pobunili so se da so ne treči v Lepoj našoj po plačama. Mortik so jif prenisko deli? Ne znati je li so gledali kuliko što dobi v kuvertlino ili pak so plače preračunali po tomo kuliko što ima građanov? Pak nebre isto plačo meti priločki načelnik šteri hercuje z osem jezer ljudi i čakoski načelnik šteri ima dvajstiosem jezer građani. Kuliko bi unda morala biti Bandičova plača ak se plača po glavi stanovnikov?
To je ve, kak zgledi, v modi da se saki novi šteri se prijavi kaj bi štel biti župan fali kak se bode pobrigal kaj bodemo mi Međimorci meli vekše plače. Furt si gruntam i to saki den znova, kak bodo itak to naprajli? Pak mi Međimorci ne dobavlamo plače z županiske kase! Zna se što dobavla županisko plačo i jemo župan more zdiči plačo ak ima viška penez v kasi, a ostali težaki tam dobavlajo plače kam hodajo na posel. I gospon Bunjac je svojo kandidaturo zavezal za plače, a kuliko vidimo i čujemo Matek Posavcov, još navek važeči župan, nikaj takšega ne obečuvle jerbo zna da tu nebre preveč pomoči.
Prvi april je minul i znova je počela sezona lovostaja v Čakovco. Očem reči, ve se je šest meseci ne smeti voziti z beciklinaj po glavnaj čakoskaj vulicaj sam ne znati što bode, i kak, to rekel ovima šteri se i dale vozijo z beciklinima kak da je prvi april ne minul. Istina je, i to prava božja, da so table, makar čistam male, postavlene po vulicaj, ali jif nišči ne gledi. A redarov nigdi? A i što bi ve vupal zastajti ove z beciklinom, a te isti v majušo morejo zebrati gradonačelnika. Ve ti nekoga zastavi, ve ti nekomo psuti gumijo, zemi peneze za kazno, a nucaš glasa? Neje to lefko. Ali nešterne muoči mam videti da so ne z Čakovca, ovi kaj se dopelajo z Prislavca i Svete Jelene, i bar bi te trelo zastajti kaj nej bil tak veliki promet po glavnaj vulicaj. A kud se bodo ve vozili dok se postavijo se terase štere so dobile dozvolo?
