309[layerslider id=”6″]
Dok je na svetlo dneva dovlečeni ves zmazani veš šteroga je Ivica Todoričov na leta skrival po ormarima Agrokora mam je se drugo palo v drugi plan. Več se nišči niti ne spomina za Mamiča, Bandiča, Sanadera, Vidoševiča, a i Horvatinčič je več nikaj ne kriv. Siromak Nadan Vidoševič se mi nejbole mili, bokček več na leta čeka kaj dojde na red pre socima kaj ga posluhnejo je li je i on tat ak je z našimi penezi kupuval sebi se kaj je štel, a to kaj je kupil je ne kanil nesti z sobom dok bode, jednoga dneva, hmrl nek je to se štel stajti Lepoj našoj. Bole kak Todorič, on je ruon tak se dal nam i Lepoj našoj dok je došel v nevolo i dok je ne mel dosti penez kaj bi povrnul se ono kaj so mo drugi dali ili pak posodili.
Kaj bom rekel, još je Lejpa naša dosti dobro uspela jedino so nam Iveki zglajzali, očem reči, nikak nebrejo biti onakši kak so si drugi ljudi. Neje to bilo tak zdavnja dok je Ivica Račanov vedril i oblačil na ovomo našemo hataro. On je bil prvi čovek još dok smo bili ožejeni z našim sosedima, pak je ne znal kak bi nas otpelal kaj bi došli na svoje i unda je to prepustil Franceko Tuđmanu kaj je jemal vroče kostaje z pečnice. Posle deset let je Ivica Račanov mel popravnoga, ali niti unda mo je ne se išlo od roke i to onak kak bi nam pasalo. Posle je došel Ivo (i on bi bil Ivek, očem reči, Ivica da je ne Dalmatinec) šteri je hajdi toga zahuzal tak da je posle kak je stavil precedničko foteljo stanuval hajdi dugo v Remetinco. Na se zadje nam se je skazal Ivica Todoričov i to tak kaj so Ivica Račanov i Ivo Sanaderov postali mali Ivice. Što bi rekel, z sima smo, kuliko – tuliko, došli na kraj jedino z Ivekima nebremo?
Ako Ivica Todoričov veli da je ne nikaj kriv zakaj mo ne verjemo i zakaj ga je Lejpa naša počela spašavati? Nejpredi Lex Agrokor, a ve i saborsko poverenstvo i to ne bilo kakše nek poverenstvo bractva i jedinstva. To poverenstvo je kak i vatrogasno društvo, zafremano je dok se je ogej več razhical i najgerek kuliko sega bodo oni mogli zvleči vum z ogja. A si znamo da je Vinston Čerčil negda dok je još bil živ, dok je hodal po zemli i dok je još viskija pil, rekel: Ak očeš kaj se nekaj ne bode nigdar rešilo, kaj se za nekaj ne bode nigdar zazvedilo unda zafremaj poverenstvo. Ve znate da bodemo mi zazvedili kak je to se bilo v Agrokoro i kam ga je Ivica dopelal? Nigdar, a mortik niti unda!
Naši državni advokati (DORH) so nam privoščili Den otprti vrati v Klovičevim dvorima. Mogel je saki dojti što je štel videti kaj se skrivle ozaj za zaprtim vratima. Morem vam reči da je jako malo ljudi došlo, a nejveč jif je dobilo nagrado: zabadav so jif otpelali v Remetinec. Morem vam reči da je to pravraprav bilo zabadav jerbo jiv je sodec zviziteral i poslal jif dimo. Se je to zišlo po onoj staroj: stepali so se bregi, pojavil se je miš!
Na Marofo, vu Svetomo Martino, so obnovili i poprajli staroga melina tak da ve pak zgledi kak dečko jedino ga puce nebrejo razgledati znutra da dojdejo. Nebrejo ako ga ne doma svetoga Petra, očem reči, onoga šteri ima ključe. Kaj vam nek rečem, neje lepo dok žene dojdo v melin, donesejo vreče, a mlinara nigdi. Pak se je ne melin zato popravlal i lišpal kaj ga bodemo skrivali? I ne sam to, znate kakše so žene dok jif nema što žegetati?
Ringišpil se još navek vrti v policiji. Još navek so ne sa mesta popujena makar se saki den se vejč toga zna. Verjem da znate, pak to morate znati jerbo to več i vrapci po drevjo popevlejo, kak je Ivek Sokačov nazaj prvi čovek međimorskih policajov. On je posle pet let kak je bil glavni v Priloko, na domovini, došel nazaj v Čakovec de mo je mesto pazil Kruni Gosaričov. Dok se još ringišpil vrti več se zna da bode Zdravko Kolaričov išel nazaj v Prilok, a Radovan Gačal bode hercuval v Štrigovi de se je narodil Sveti Jeronim, a glavni kriminalac bode Danijel Mikulič. Damir Novak, glavni prometni policajec, bode svojega stolca vrnul Siniši Šajnovičo jerbo mo ga je Siniša ionak dal sam na revers na pet let. Kak vidimo se pomalem dojde na svoje. Mortik bi policaji morali meti mandate na deset let kaj se to nej saki pet let hlaparilo i sprevajalo, jeni sem drugi tam, jeni nazaj, drugi znova. Kuliko se šepetuji, i to se glasneše i glasneše, Kruno bode pomagal Iveko Sokačo jerbo je v policiji tak čuda posla kaj to Ivek nebre sam zbavljati. Ak je tak unda je tak! I još nekaj, kuhar v restorano ostaja na svoji mesti. I ova ženica kaj bilege prodavle.
Ve so se mlade doktorice počele z tem baviti kuliko venodjanja (čitaj:seksa) nucajo žene, a kuliko moški. I još nekaj kcoj, kulikopot je venodjanje na dnevnomo (ili pak nočnomo) redo pre onima ožejenima, a kulikopot pre onima drugima šteri to ne morajo delati, ali očejo. Mlade doktorice nikaj ne pripovedajo o tomo kaj tre naprajti dok ženo boli glava i unda nikak nebre rešititi noge. Nebrem to nikak razmeti, očem reči, to z tom bolečom glavom. Velijo stareši doktori i žene v nejjakšaj letaj da žene bolijo glave zato kaj portir preretko lufta doljnja vrata, kak bi teca Franca rekla, nega rafangerača kaj bi to pečko rezroštal. Očem reči, boli jif glava, a nečejo si zeti lekeca. Čudapot ne muoči razmeti te naše žene.
Znate kak je to bilo dok so Štef i Bara zaspali, a nejso se nikaj zaigrali, pak se je Bara okoli dve vure v noči zbudila i steple Štefa, pak mo veli, i to onak kak sam ona zna dok nekaj oče i dok jo nekaj srbi: Štef, ja bi se venodjala… A, Štef, hiti oko na vuro, pak joj otpove: Kaj ne vidiš kuliko je vur, pak de bom ti ve koga našel?
Nebrem razmeti kaj se naši županijski čelniki čudijo kak so jim projekti na čakanjo v kišticaj hadezeove Vlade, a dok si je župan iskal pajdaše v Županijski skupštini unda si je mesto hadezeja zel esdepeja. A odnavek je bilo kaj saki ftič leti k svojemo jato, a ruon tak i stareši ftiči (Vlada i ministri) so navek hranili mlade i slabeše ftiče, očem reči, županije, grade i opčine. Da ste da što ljuckoga friča hrani?
Naši, očem reči, međimorski poduzetniki so lani jako dobro delali. Čuda so penez zaslužili, se so stroške poplatili i još jim je hajdi dobička ostalo. Morem vam reči da je lani delalo prinas v Međimorjo nekaj malo meje od 28 jezeri težakov, a oni so zalužili nekaj meje od 13 milijardi kuni. Ve vidite, tuliko kuliko so naši poduzetniki i jivi težaki zaslužili tuliko Todoričo fali kaj bi pokril se one luknje štere je napravil. On je to sam napravil, no ne ruon sam, pomagala mo je familija, a prinas je trelo tak čuda težakov kaj so tulikše peneze na kup nanosili. Ali on je ne nosil na kup, on je reznašal. Navek je leži bilo zahuzati nek zaslužiti. Kak bilo da bilo, naši poduzetniki dobro delajo, a verjem da bodo ovo leto još malo vejč zaslužili tak kaj bodo i težaki nekaj vejč vu svoje žepe dobili. Takše kak so naši težaki ne muoči nigdi najti, to znajo i naši poduzetniki i zato morajo jako paziti kaj ne bodo ostali brez jif. Dok so dobri igrači (čitaj: težaki) unda se dobro igra i dobri so rezultati. Ruon tak znamo da ekipa štera pobeđuvle se ne meja, a ak očeš zadržati dobre igrače unda jif tre i dobro platiti.
Dok so naši međimorski vodovodači uvodili naknado na ceno vode unda se je reklo, i to jasno i glasno, da se bode z te naknade platila kanalizacija v Dravskomo bazeno. I tak je bilo, a za to so i gracki večniki zdigli roke. Kanalizacija napravlena, kanalizacija plačena, kanalizacija dela, a penezi se i dale pobirajo. I ve dok se hajdi penez na kupu ostalo ve to tre negdi potrošiti. Penezi so se davali za jeno, a ve se bode trošilo za drugo. Je, dečki, to tak nejde! Ak so se penezi davali za Dravski bazen unda to tre tam potrošiti, a ak smo preveč dali unda peneze nazaj. Nejte biti kak porezniki, oni dok jempot zemejo moreš se oprostiti od jif. A kaj se cusravi cevi dotikavle za to se penezi pobirajo z cene vode i to se zove amortizacija. Tam poglednite i tam bi moral biti čistam lepi kupček penez!
Kaj se dotikavle labodoritašov, pak imajo srečo. Dobili smo Grkljane kaj prek jif dojdemo na Svecko prvenstvo v Rusijo. Nikaj ležeše, jerbo znate zakaj so stari Grkljani ne ritali labodo? Zato kaj so bili stari! No, i ak mi ve ne bodemo te Grkljane pobedili unda bode se ovo kaj smo do ve naprajli zabadaf!
