[layerslider id=”6″]
Fala dragomo Božeko kaj mi v Čakovco imamo Zrinsko gardo i kaj se oni furt i navek brigajo za to kaj se ne pozabi što so bili Zrinski, kak so dugo hercuvali v Međimorjo i kaj so naprajli za nas Međimorce, za naše Međimorje malo, a i za Lejpo našo. Minuli petek i soboto Zrinska garda je organizerala, več po peti pot, znanstveni skup na šteromo je na kup dopelala 12 spametnih glavi štero so sima onima šteri so došli govorili ono o Zrinskima kaj još ne znamo, a verjem da si znajo kak je grad Čakovec – grad Zrinskih, a ruon tak je i naša Međimorska županija – županija Zrinskih. Ak ste to ne znali ili pak ste pozabili, prosil bi vas lepo kaj bi to ve zapamtili kaj vam o tomo več ne bodem moral govoriti. Morem vam reči dosti se je ljudi zišlo šteri o Zrinskima očejo znati vejč nek znajo, a svoje izaslanike je poslala precednica Kolinda, prvi naš Sabornik, Gordan Jandrokovič, precednik Plenkovič, a svoje izaslanike je poslal i minister obrane Damir Krstičevič i to jenoga generala v Čakovec, a drugoga v Sisak. Očem vam reči da so jeden den navuki bili v Čakovco, a drugi den v Sisko pre biskupo Košičo. A zakaj v Sisko? V Sisačko županijo i Sisačko biskupijo spada grad Zrin v šteromo so Zrinski hercuvali dvesto let, a jiv je bil i dok so se preselili v Čakovec. V Zrino se je rodil i Nikola Šubič Zrinski (1508.) šteri je posle junačke bitke i pogibije pre Sigeto dobil i cono Sigecki. Si šteri so bili na znanstvenomo skupo dopolne v Sisko so odvečer, posle obeda, obišli Zrina. Tam ga još ve ne nikoga jerbo so partizani 1943. leta potamanili se Hrvate, a komunisti so i zabranili jivoj rodbini da se vrne nazaj na svoj hatar i na svoje grunte. I tak je ostalo prazno do denes. Hiže so je, a ljudi nigdi. Denes je to jedina župa v Lepoj našoj, a mortik i na celomo sveto štera nema niti jednoga vernika. Kak bilo da bilo, fala Zrinskoj gardi kaj smo se pak nekaj novoga navčili, a gardisti so nam obečali da bodo nas i dale vučili ono kaj ne znamo o Zrinskima i to tak dugo dok se ne navčimo bar tuliko kaj bodemo sima onima šteri dojdo v Čakovec i v Međimorje mogli sprepovedati dosti toga o Zrinskima, a ne kaj se bodemo sam falili kak je Čakovec grad, a naša županija Županija Zrinskih. Još sam nekaj, ve se moremo pofaliti kak vređuvlemo i lišpamo Staroga grada kaj bode tak lepi kak ga je zlišpal Mikula Zrinski Čakoski, ali bi morali i nekaj naprajti z Mauzelojem – grobnicom Zrinskih v Svetoj Jeleni kaj se ne bodemo morali črleniti dok nešči oče pogledati grobnico v štero je zakopani sigecki junak, a ve zgledi kak sto let star parmič.
Si oni kaj so došli na znanstveni skup o Zrinskima ve so čuda spametneši, a najgerek sam, jako sam najgerek, kuliko obični ljudi znajo o Zrinskima? Kuliko se naša deca v školama vučijo o Zrinskima? V nešternaj knigaj z povjesti je napisano štiri rede o Zrinskima i zato profesori nejvečpot Zrinske preskočijo, pak đakima nikaj ne velijo o tomo. Čuda vejč je napisano o Napoleono, Mariji Tereziji, Baruno Trenko ili pak I srpskomo ustanko, a o Zrinskima čistam malo. Ve mi je palo na pamet, pak zato niti međimorski profesori povjesti ne hodajo na znanstvene skupove o Zrinskima, ne hodajo na Spomendan o Zrinskima jerbo to unda nemajo komo reči. A komo čovek more reči ono kaj ne zna? Imamo cirka tridesti pučki školi, imamo sedem sredji školi, imamo Pučko učilište, imamo fakulteta, imamo Veleučilište untig dosti mesti de moremo govoriti i širiti istino o semo onomo kaj so Zrinski značili za Međimorje, ali kak bodemo to delali ak ne znamo. Oni šteri znajo si najdejo cajta kaj to prenesejo dale. Još nekaj, kak bodo drugi poštuvali Zrinske ak jif mi v Čakovco i Međimorjo ne poštujemo. Nekaj bi se brzčas morali navčiti, ak kanimo turiste meti.
Katarina Zrinska, mi bi v Međimorjo rekli Katica, se je znova vrnula v Čakovec i to vu svojo vulico. Kaj ne bi vi mislili kak je jena bista nekam odišla ili pak jo je nešči fkral, ne, sam smo jo ve pak mi spazili i zazvedili da jo imamo čim so slastičari i cukopekari zaprli i posprajli svoje suncobrane. Katica je pak došla na videc i do zraka. Čuda leži diše, a i muoči jo je videti.
Naša i hrvacka precednica Kolinda je posvojila kujseka, očem reči, kujso Kiko. Kuliko se novinarov, pošteneše i točneše rečeno, novinarčičov dela žnje norca i to sam zato kaj si je dopelala Kiko na Pantovčak. Z tem je pokazala da ima rada živad i pese i da joj se je Kika premilila dok jo je prvič spazila v azilo. Bila je to ljubezen na prvi pogled. Da nema rada pese nej mela rada niti ljude jerbo je pes nejbolši čovekov prijatel i nej mogla magaditi i se te novinarčiče šteri jemlejo nalivpero v roke i delajo se norca, ne tuliko z kujseka kuliko z Kolinde. Čuda je leži delati se norca z nekoga nek nekaj spametno napisati. Za nekaj spametno napisati tre meti pamet i tre znati (spametno) pisati.
Bilo je to ne tak zdavnja dok je Milanka Opačič, ministrica vu Vladi Zokija Milanoviča hodala na posel z kujsekom i nišči je ne vupal nikaj o tomo pisati, a nedaj Božek kaj bi del v novine jeno sliko kak je navlačila kujseka po čakoskim vulicama i kak so si, gradonačelnik, župan i si drugi, čakali dok je kujsek zaleval hiže po čakoskoj glavnoj vulici. O Milankinomo kujseko se nikaj ne smelo pisati jerbo je ona z esdepeja, a jim je se dopuščeno, čim nešči z hadezeja dopela kujseka unda je sim dopuščeno kaj na jega hičejo drevje i kameje i blatijo ga. To je tua demokracija štera je za se ista, za se šteri imajo jednake črlene knigice. Teško je tu reči što je tu nori, što je zbešeni, a što pak normalni?
Za precednico Kolinda more saka šuša napisati kaj oče jerbo glas naroda more se reči. Probajte vi nekaj takšega napisati za čakoskoga gradonačelnika (on ima tri pese) pak bodete vidli kak bodete zišli? Ak ne verjete meni pitajte grackoga večnika z Miholjan, Predraga Kočilo. Mi smo si jednaki pred zakonom, ali je zakon ne jednaki za se!
Dobil sam sms-a z posla: Jožek, nej par dni hodati na posel jerbo so se pajdašice z posla zbile zbogradi toga štero boš prvo pelal na kavo (a si znamo kuliko je dece napravleno posle kak se je spila kava) i to tak kaj so obedve ostale na bolovanjo. Ostani doma kaj se situacija smiri, kaj ne bo nišči nikaj pital i kaj se prah slegne. Tvoj cimer z posla, Vaso!
Pelal sam vnuke v naše međimorske toplice v Sveti Martin kaj se malo skaljužajo i to v nedelo odvečer. Na cesti nigdi nikoga i pelal sam se malo fletneše, a sam najempot, pre Svetomo Đurđo, z grma je skočil policajec z pištolom štera meri brzino. Kak god sam se kredno pelal, ali je bilo vejč nek je na znako pisalo. Dal sam mo papere štere je iskal i pital me je kam se žurim? Pokazal sam mo vnuke na zadjemo sico i lepo sam mo rekel da me furt tirajo kaj se tak pomalem pelam jerbo se nebrejo fčakati da bodemo došli do toplic. Ali je ne bogal, neje mel srca, jegov pištolj je bil svedok da sam prešel granico. Znašel sam se, pak sam mo rekel da sam več hajdi let ne nikaj zgrešil. V prometo. Zel je tužibabo v roke i zval je nekoga. Dok je došel nazaj donesel mi je ceduljo z opomenom. Lepo sam mo rekel, pak me je mogel i opomenuti v štiri joke, a ne kaj se je moral muočiti pisati. Neje pomoglo. Do toplic so vnuki pazili kaj nem prešel prek onoga kaj je znako pisalo, ali je sa sreča kaj so to pozabili več dok smo dimo išli. Kaj bom vam rekel, dimo sam se kredneše pelal!
