309[layerslider id=”6″]
Još navek nebremo do kraja zazvediti zakaj so Drašek Plenkovič i Lejpa naša zeli Agrokora Ivici Todoričo i zakaj smo zmišluvali Lex Agrokor posle Lex Perkoviča šteri je ionak odišel po riti k meši. Jeni velijo da je Lex Agrokor zmišleni sam zato kaj nej Rusi, prek Sber banke, postali gazdi v Agrokoro, dok drugi velijo da smo tak morali sam kaj se Ameri i jif lešinarski fond namiri i to prek se mere. Črez bogme, je rekla teca Franca. Na se zadje se kaže kak je to mafijaški posel i kak se bode vum z Agrokora zvleklo vejč penez nek je to Ivica napravil z svojimi sinekima, svojom familijom i svojimi ljubavnicami. Vrag bi ga znal jerbo „stečajni“ v Agrokoro, Tonček Ramljakov, je, tak bar velijo, čovek opasnih namjera, a i poverenik Amera, očem reči, jivoga lešinarskoga Knighthead fonda i zato brzčas skrivle Agrokorove papere kak zmija noge. No, a kaj ve mi mali ljudi moremo tu pomoči? Nikaj! Moremo se sam spominati dok nemamo drugoga posla i ak očemo kaj pofratimo vreme jerbo ionak nemamo nikaj drugo za trošiti.
Što je itak te Tonček Ramljakov? Zagonetka štero je ne tak lefko rešiti! Jeni velijo da je vuteska, drugi velijo da je lebudikaj, a tretji (to so oni kaj so ga postajli) ga furt falijo. Očem reči, teško je tu biti spameten. Čovek čistam kredno zgledi, a posel šteroga dela jenima (Amerima) paše, drugima (Rusima) ne paše, a tretje (nas Hrvate) nišči nikaj ne pita. I Ivica Todorič nema lepo reč za Tončeka. Što bi znal v čiji rog (čitaj: trubento) on puše i što bode dosti toga hasnuval v Agrokoro, a što bode (osim nas poreznih obveznikov) odišel po riti k meši?
Ak me je dobro izvestil moj specijalni izveštač kaj se dotikavle pota precednice Kolinde v Rusijo, k Vladeko Putino, teca Franca, unda so Rusi hitili puške v kuruzo kaj se dotikavle Agrokora i milijarde štero so posodili Todoričo. Najme kaj, Rusi se nekak preveč ne brigajo za to milijardo jerbo kanijo kupiti našo INO. Nejso uspeli prek Agrokora dojti v Lepo našo, mortik bi bilo čuda bole da so ga oni zeli nek Ramljak i američki lešinarski fond, a ve bodo brzčas došli k nam ak znamo da INO ne prodavlemo mi nek naši sosedi Mađari. Verjem da ste čuli kak je sod presodil da so Mađari ne dali mito Sanadero i da je se čisto kaj se dotikavle MOL_a i jegovoga hercuvanja vu našoj INI. Ne znati kak je to zišlo, MOL je ne dal peneze, a Sanader i Ježič so jif dobili. Najbrž je v pitanjo bil nekši Ded mraz šteri je niti ne znal kaj je vu torbi mel i štomfe vu šterima je bilo po 5 milijonov ojeri, a na štomfama so bile napisane Sanaderove i Ježičove adrese. Još navek ga je ljudi, a ne sam deca, šteri se veslijo darima Deda Mraza. Dobiš dare, ne moraš nigdi potpisati i priznati da si to dobil, a posle si (pak i ti) pozabijo da si to dobil.
Ne ve točno znati što bo zrušil Hadezeja? Jeni velijo da bodo ga zrušili sami Hadezejovci znutra jerbo saki vleče na svojo strano, drugi velijo da to bode Todorič, ali ve se je tu znova pojavil Ivek Vrdoljakov, šteri je pred par meseci spasil HDZ i Plenkijovo Vlado z svojimi rokicami vu Saboro, a ve pak se bode vrnol na „mesto zločina“ i nešči bo moral to platiti. Velijo oni kaj se bole od mene razmejo vu to visoko politiko (med jimi je i teca Franca) da bode to se platil HDZ-e Kaj se bodemo mi obični smrtniki i večni porezni obvezniki sekerali, mi si ne moramo nikaj gruntati nek moramo biti stiha i čakati kaj nam bodo poslali čeke kaj platimo duge štere so naprajli Todoriči (predi) i Tonček Ramljakov z Amerima (posle). A što bo posle držal cugle vlasti vu svojimi političkimi rokami premazani sim maščama, nam je sejeno, je li to bode Drašek, je li bode Brkič, Šeks ili pak bode zastavo nosil Ivek Vrdoljakov? A kaj mi znamo, niti teca Franca ne zna, mortik je brzčas ve Živi zid na redo?
Kak zgledi, na se zadje, smo i mi ipak uspeli prodati jedno sopunico Englezima, a ne kaj bodo oni, i dale, sam prodavali nam. To je soponica v jeno 100 nastavki (nejmeje): „Borba Ivice Todoriča protiv korupcije v Lepoj našoj!“ Ne bodete veruvali, ali režiser te soponice, Ivica Todorič, je moral Englezima dati garancijo od sto jezeri funti kaj jif je privolil kaj jo bodo gledali. Kaj nek vam rečem, pak so Englezi navek bili čudni ljudi i nigdar so ne bili kak druga deca!
Posle Mesiča pred Poverenstvo za Agrokor je došel i nejstareši svedok Jožek Manoličov. Nejstareši poštejak. Malo, malo, pak je rekel: ne čujem dobro. A da mo je Poverenstvo kupilo nove baterije za služno školjkico se bi to čuda predi bilo gotovo i čuda vejč toga bi se bilo zazvedilo. Najme kaj, dok mo je ne pasalo kaj so ga pitali, mam je rekel: ne čujem dobro…
Kak zgledi v Agrokoro se prepravlja nekše veliko, da prostite, sranje. Najme kaj, v Konzumo je sfalil šekret paper!
Ipak ide nekaj na bole v toj Lepoj našoj. Kuliko sam mel za čuti ipak bode, na se zadje, Marko Perkovič z conom zvani Tomson popeval v Areni i to pred kraj ovoga meseca studenščaka. Si mi znamo kak dugo se več Tomson svadi z ovim z Pule kaj so ga ne pustili v Areno, ali je Marko obrnul pločo tak da bode ipak popeval v Areni, ali v ovoj novoj, Varaždinskoj. Arena je arena i neje važno de je, nejglavneše je da publika dojde! A došli bodemo mi Međimorci, a i sosedi Zagorci. Najgerek sam je li bode, ipak, došel nešči z Pule?
Tri loša, hmanja i pijana (Matija Marčec, Bruno Hančič, Deni Pikl) ubiše Miloša (Tomicu Pergara). Sod je odlučil da so krivi jerbo so ovi tri na mrtvo pretukli Tomico, a što zna kak bi bil prešel jegov pajdaš da je ne pobegel. Sod je nikak ne mogel zazvediti što je nejveč kriv, što je prvi počel, pak je sima odrezal jednako kaznu, sakomo po tri leti i osem meseci rešta. A kaj to znači da ga Tomice nega?
Čakoski gracki načelnik pozivle k sebi sam one vredneše i nejvredneše tak da je jako teško kaj bi sosed Pišta i ja igda došli na red. Rečite mi, prosim vas lejpo, je li sosed Pišta i ja nikaj ne vredimo, a več prek četrdeset let plačamo se čeke štere nam grad pošila i još smo nigdar ne zahuzali, očem reči, nigdar smo ne zakesnili i niti jen ček je ne ostal kaj ga nej platili. I ve bode gradonačelnik rekel da mi nikaj ne vredimo?
Brzčas nekaj bode od Draškoske dvorane? Več so napravleni parking-placi de se bodo igrači i publika parkerali, a ve još sam dvorana fali. Kak velijo Draškovčanci, dvorana bode zutra, a nejkesneše, malo zutra!
Kuliko čujem gripa bode ipak došla na hatar naše Međimorske županije. Ne znati je li joj se splati dojti k nam ak se zna kak smo mi Međimorci, a i naši težaki, nejslabeše plačeni v celoj Lepoj našoj. Čuda joj se bole splati da odide nekam drugam, v nekšo bogatešo županijo. Dok čovek (ili pak žena) ima vejč penez čuda leži premagadi se nevole. Pak i gripo.
Prepoveda se po Štrigoskomo hataro i Mađerkinomo brego kak so se jeden den stelile dve krave v Robadjo. Kuliko sam uspel zazvediti to se je pripetilo uz pomoč Evropskih fondova.
Daje se na znaje: Si šteri se nekaj malo (ne preveč) razmejo v labodoritanje, a imajo pisanoga časa kaj ne znajo kaj z sobom, nek se javijo v Split na burzo dela. Hajduk išče trenera. Ne tre mejati prebivalište jerbo je v pitanjo sezonski posel. Traje nekaj malo duže od branja hmelja, šparugi ili pak košenja partizanke. Jedino kaj tre znati da je laboda okrogla i da se kotač sreče (i nesreče) još navek obrača! Požurite se, što prvi jegova je dekla!
