309[layerslider id=”6″]
Mrak je ipak ne zavladal Zagrebom, očem reči, Anka Mrak Taritaš je ne uspela zeti večnomo, bole rečeno doživotnomo, Bandičo šestoga mandata tak da Milči i dale sedi v nejglavnešoj fotelji belog Zagreb grada i kak je rekel mam v nedelo navečer si projektlini idejo dale kaj znači da se bode po Zagrebo delalo nejmeje još jeno deset – petnaest vodoskoki jerbo turisti dohajajo v Zagreb i zbog radi vodoskokov. Pak ne muoči tirati turizma brez vodoskoki, pak kakša je to metropola brez fontani. Ne znam je li ste vidli kak je zgledal Bandič v nedelo navečer dok je zazvedil da so se zagrebečki purgeri odlučili za svetlo, a ne za Mrak? Bil je zmočeni jerbo je jegova predizborna kampanja trajala dva tjedne duže i to je žnjega zvleklo i zadje atome snage. No, drugi den vjutro je več počel, očem reči, nastavil delati kak da se je v nedelo ne nikaj važnoga pripetilo, kak da je ne niti prestal. Verjem da so Milčija žene znova zebrale jerbo kuliko je pušleki črleni roži podelil bil je i red!
Anki Mrak so bajali i zamerili kak je obnavlala Gunjo kak ministrica: posla so dobila poduzeča štera so mela dva do tri zaposlene težake i to po 1700 ojerov kvadratlin, a te pak so posla dali poduzečima štera so bila malo vekša, ali so morala biti v jenoj ili pak v „narodnoj“ cukor – piksi i ona so mogla zaračunati po jezero ojerov, a da bi na se zadje posla oddelali proizvođači tak da so te hiže unda tam koštale po 600 ojerov kvadratlin kaj je bila i prava cena. Oni šteri so još nekaj znali, gombali so kak so v Gunji bile drage i zahodske grabe i to po deset jezer ojerov. Da je to fal neje, ali to je tu negdi kak Bandičovi vodoskoki sam kaj se vodoskoki vidijo i čuda lepše zgledijo kak ove drek-grabe. Najbrž je Ankičin projektlin Gunja ipak odnesel jeden lepi pušlek glasov i ruon tuliko joj je falilo kaj bi Milana poslala v ropotarnico povjesti ili pak još dale.
V Splito se još navek brojijo glasi jerbo Kerumov Željkec ne verje da je on mogel zgubiti i da ga je pobedil Andro Krstulovič Opara. Najme kaj, kak je Željkec mogel zgubiti, a jega so potprli i esdepeovci, mladi i več od pol naprednih Dalmatincov, a prebrojili so mo meje glasov. Ne znati je li je Željkec tak jaki kaj bi se te listeki tak dugo brojili kaj se nabroji kuliko jemo treba? Niti je Željkec ne bil nigdar kak druga deca, a niti pak so to bili Spličani. Čim brojanje završi mam se bode znalo što bode prvi čovek Splita, a znate i sami kak so zišle Kaštelanke štere so se falile da so lepše nek Spličanke!?
Ne znam kaj mi je bilo kaj sam odišel tijam v Split, a tu pre sosedima, Varaždincima i Zagorcima, smo meli, ruon tak, velike promene: ne bi vam znal reči zakaj se je to pripetilo, ali tu so si listeki prebrojeni i Ratko Čačič je znova zagorski župan. Najbrž so Zagorci pozabili da je zadjipot bil tak dober kaj so ga zmenili na pol mandata. Ili so pozabili ili pak računajo da se je popravil i da je kak vino, kaj je stareši to je bolši i vredneši. Kaj se ja tu muočim, oni so si ga zebrali i jif bode. I Varaždinci so vrnuli svojega negdašjega grackoga načelnika Iveka Čehoka. Ve vam ne bil znal reči je li so ne meli nikoga drugoga zebrati ili pak so ga vrnuli kaj pospravi ove vreče z smetjom štere so se počele kupčati za jegovoga zadjega mandata. Najbrž so Varaždinci i Zagorci, sam tak, očem reči, onak gešenk dali Iveko još jedno šanso. Najgerek sam, jako sam najgerek kak bode to itak zišlo i je li bodo Dorh i Uskok Iveko se ono šenkali kaj so mo zamerili predi i posle otkak je odišel z glavne gracke fotelje.
Si se ve grablejo za Toplice i Sveti Martin. Najme kaj, v Tolicaj so se prepravljali labodoritaši Reke i pobedili so Dinamovce vu finalo Kupa, pak je ve došla i naša državna labodoritaška reprezentacija kaj si tu zeme friškoga zraka i kaj se skople v našoj domačoj vodi predi nek gene na Island i v jive toplice. Još negda je moja pokojna mamica, Božek joj nek oprosti grehe, rekla kak je voda vu Vučkovco jako zdrava, vum zvleče se betege i čoveko davle snago za se ono kaj ga još čaka. Ve mi se je stopram presvetila žarulica, pak zato je mamica japico pošiljala v Toplice! Več v nedelo bodemo zazvedili je li je voda z Vučkovca još navek bolša od muške vode?
Haenesovci ne znajo je li bi potprli precednika Plenkija ili ne bi? Jeden den so protiv, drugi den so za, kakše je da vreme i kakši je pritisak v zrako. Neje lefko tu spameten biti, ipak Drašek nudi tri ministarske fotelje i još dosti toga kcoj, a to se sam tak ne odbija i ne raste na vrbi. Dok bodete vi čitali ovo moje premišlavanje več bodemo znali je li bodo haenesovci spasili Lejpo našo od novih izborov ili pak bodemo hodali još jempot glase davat. Mi, biračko telo, smo kak foringaški koj, fletno se na se prifčimo.
Dok so labodoritaši trenerali i nabirali zraka v Svetomo Martino došli so na martinski hatar i sakefele mediji i novinari. Nešterni so spituvali što je itak na vlasti vu toj opčini štera je po svojaj Toplicaj i po svojemo zrako poznata skorom po celomo sveto. Dok so jim domaći turistički težaki otpovedali da tu cugle vlasti, furt i navek, drži HSLS unda so zapitali: Pak kaj tua stranka još navek postoji? Kuliko vidimo prinas v Međimorjo so još navek živi, imajo načelnika pre Martino, precednika Grackoga veča v Središčo na Muri i zamjenika župana. Da so pak došli v Istro, Primorje i Dalmacijo tam pak ne znajo za HNS! Saki kraj ima svojo stranko?
Pred nami je proščeje na čakoskomo Jugo. Jug, to vam je lepši i mlajši del Čakovca (prvo selo polek Buzovca), a za proščeje na tomo hataro bode v Čakovco na labodoritaškomo igrališčo popeval Đorđe (teca Franca je rekla da je to po naški Đura) Balaševičov. Ne znati zakaj Đura ne popevle na Jugo pak i oni imajo labodoritaško igrališče? Ali kaj bodo ovi z Čakovca išli v Buzovec ili pak Pustakovec na koncertlin. Ak bi se to pripetilo unda morajo iti prek štreke. Rečite, prosim vas lepo, kuliko ga poncertlini v Buzovco i Pustakovco dok je Prcinkulovo v Čakovco? Pred deset dni je naš popevač, Žiga Međimorski, mel koncertlina v Zagrebo i to v Lisinskomo i dvorana je bila puna, ali on je dober za popevati v Zagrebo, ali je preslab za Čakovec i Međimorje. Kuliko vidimo Đura je tu čuda jakši!?
Genulo se je nekaj v Agrokoro i počeli so prodavati se ono kaj je Ivica, kak hrček, navlekel, ali ne znati kaj bode to pomoglo? Premalo ima. Ak se tua jegova jahta, helikopter ili pak avion, kaj več ima, i dvorac proda po kakšoj takšoj ceni, očem reči, dosti kredno, ne bode dosti kaj se povrne niti jeden procent dugov kuliko je Agrokor (čitaj: Todorič) zahuzal!
V Kotoribi cug mašina fučnula, saka svega dva-tripot (nejmeje) je kušnula, tak veli pesma, a tak je bilo i vu ove Dneve šibe i ribe šteri so bili ovo leto (kak i sako do ve) za ne pozabiti. Kotoripčani, i jif načelnik, Ljubo Grgec z svojom ekipom i turističkimi težaki, je to ne složil sam za svoje Kotoripčane nek za se Međimorce i nešterne Podravce i Zagorce. Zakaj nešterne, sam za one šteri so šteli dojti. Najme kaj, Grgec je zrihtal cuga za se šteri očejo dojti v Kotoribo i to zabadaf tak da saki šteri je štel dojti v Međimorje je to mogel naprajti i nema zgovora kak ga je ne mel što pelati. Tak se to dela, kak je lepo v Kotoribi čovek dobi želo kaj bi se mam tua preselil, ali i domaći so žilavi, otkak so opčinari zlišpali selo nišči se več vum ne da i nišči neče hižo prodati. Tak i tre, to je posel i unda opčinari ne štrpčejo do zadje sekunde je li bodo dobili novoga mandatlina?
Glavni međimorski hadezeovec Darko Horvatov je zgubil izbore vu svoji seli, očem reči, opčini. Do ve je v opčini hercuval hadezeovec Dražen Miserov, a ve ga je v drugomo krugo ili kak bi labodoritaši rekli, u sucovoj nadoknadi, pobedil haenesovec ( ne znam je li je obični ili pak reformerani) Marijan Vargov, šteri je i negda držal cugle vlasti v Dobravi. Biračko telo je tak reklo. Brzčas so Darkija i jegovoga Dražena ne prepoznali. Furt prepovedam da je Dobrava ruon tak kak i naša državna vlast, tam se hadezeovci spominajo (?) i dogovrajao, a unda se dospomenejo ili pak se ne dospomenejo. Da so se Darko i Marijan dospomenuli, mortik bi unda čuda leži to naprajli Plenki i Vrdoljak, a ovak je Darko zgubil načelnika, a Vrdoljak je kak precenik Narodnjaka odišel po riti k meši. I unda bo nešči rekel, kak napriliko moja teca Franca, da je politika ne kruh z sedem kori?
I mi Međimorci smo ve dobili koja za trko i to čim se k nam doselil Nebojša Božič. Nebojša je lojsal po celomo sveto, prešel ga je gori – doli i nazaj, a unda si je za tretjo (i zadji del živleja) životno dob zebral Međimorje naše malo, to „Sveto zemlo“ i raj na zemli, kak je rekel. On je došel sam, a se kaj se je v živlejo navčil je donesel sobom, tak da ve prinas raste i kulen, kulenova seka, pancete, pršut, meso z tiblice, oblizeki od divje marhe i kaj nam dale nabrajal, se na jenomo mesti, Slavonija i Dalmacija, se to v Međimorjo, v Robadjo spot pod Mađerkinim bregecom. A da bi si čovek tu namiril i dušo i telo unda mora znati da je na Mađerkinomo brego friški zrak, otod se vidijo se štiri strane sveta, a tu i rastejo gorice od šterih se pije nejbolše vino. Kuliko vidimo, znal je Nebojša kam je došel.
Minulo nedelo so Međimorci, šteri so gastarbajteri v belom Zagreb grado več osemdeset let, preslavili svoje proščeje. I to ne stiha, ne sam za sebe nek za se Međimurce i Hrvate po celomo sveto jerbo je proščejarsko mešo prenosila i državna televizija. Mešo je služil monsinjor Jura Kolaričov, Kovačov Đurek z Dolnjega Hraščana, a pomagali so mo pater Tonič Trstenjak, Kotoripčan i monsinjor Matija Berljak, Cirkovljančan, a da bi to se zgledalo onak kak Međimorci to znajo naprajti i kak naš dragi Božek zapoveda, pobrigala se Zrinska garda, pjevački zbor i udruga Sv. Rok z Draškovec, KUD i tamburaši Vinkija Horvata z Kotoribe, međimorsko himno je spopeval Imbra Švenda – Žiga. Pozabil sam vam reči da je meša bila v katedrali kak se to šika Međimorcima. Naši Međimorci, Danijel Režek, Tonček Mikec, doktor Bergovec, gospon Šoltič, mladi Matija Kikelj so pokazali kuliko Međimorci vredijo vu Zagrebo. Fešto je uveličal i župan Matek Posavcov. Bil bi došel i zagrebečki gradonačelnik Milan Bandič, ali on je igral v drugomo krugo izborov, pak je ne ftegnul. Ipak smo mi Međimorci ne kaj god!
