9[layerslider id=”6″]
Minister za zdraviče, Milan Kujundžič, je došel k nam v Međimorje, na te naš „Falačec zemle“, kaj vidi kam smo potrošili peneze štere nam je jegovo Ministarstvo dalo i da, onak usput, poškica kak se naši međimorski doktori brigajo za zdraviče nas Međimorcov. Morem vam reči da je bil jako vesel jerbo je videl da se štima kak po žnorici. Z „jegovih“ penez je napravleno još vejč nek je on planeral, a i doktori se razmejo vu svoj posel, očem reči, davlejo se od sebe kaj bi mi Međimorci čim duže živeli i kaj bi odišli na drugi svet čim zdraveši. Najte me nikaj čudno gledati, pak ne hmirajo sam betežni ljudi, ste pozabili kak so naši stareši govorili dok je nešči hmrl vu visokim letima: dodral se je. Idemo mi nazaj na ministra. Kak sam več rekel, se je v našoj bolnici bilo za pet, makar smo mi Međimorci ne navek tak zadovolni kak je bil minister, ali za tak dobro i tak visoko ocjeno so nejzaslužneše lepe doktorice štere se razmejo vu svoj posel, a i mlade medicinske sestrice štere se držijo pod kontrolom. Morem vam reči, dok sam to prečital dobil sam voljo kaj bi bil bar malo betežen. Več sam si zel uputnico kaj se malo skontroleram. Znate kak se pripoveda: medicina, doktori i sestrice so odišle tak dauko naprej kaj niti jeden čovek, pak unda niti ja, nebre biti kaj nej mel nekšo falingo, očem reči, kaj nej bil bar malo betežen.
Dok smo več na ministrima unda je red kaj nekaj rečemo i o ministro za seljake i poljoprivrednike Tomeko Tolušičo. To je minister šteri nejvečpot dohaja k nam v Međimorje i nigdar ne dojde z praznom rokom i zato ga naši seljaki štimajo. I teca Franca mi je rekla da je to pravi čovek i da zgledi pošteno i kak pravi težak. Još je rekla, ak bode što nekaj dobroga napravil unda bode minister Tomek. Veli, fajni je i pošteno zgledi. To je več dugo niti za jenoga političara ne rekla. Do ve je teca Franca navek mela praf, pak se toplo nadjam da bode i dale tak ostalo.
Ne znati kaj se si čudijo, kaj se je itak pripetilo kaj je čakoski gracki načelnik, Štef Kovačov, odišel poluknuti našega međimorskoga župana Mateka Posavcovoga. Ne znati je li je čudno kak je mogel te tristo metri prejti pešice i kaj si je ne posodil štromčeka ili pak se kani kandiderati za župana i odišel je glet kakši je zrak v zgradi na štero pazi Peter Zrinski. I još nekaj, pak je ne čistam normalno kaj je sabornik Štef, odišel pogledati svoje biračko telo i pitati je li mortik imajo nekše probleme, a štere bi on mogel rešiti v belom Zagreb grado? Nejpredi se čudimo kaj se Štef retko spomina z Matekom, a dok se počnejo spominati unda se čudimo kaj se ve itak spominajo? I zakaj?. Kuliko sam mel za čuti pre čakoski gracki vuri, Štef je Mateko rekel, predi nek je odišel, nek sam ostane tu gde je je, jerbo tu mo je čuda lepše i bole nek v grackoj upravi i nek ostavi jega kaj se bode i dale muočil z grackaj problemaj. Nekaj mo je moral reči, a nekaj i pošepetnoti, pak je ne zabadaf došel. Neje došel v županijo hmajikovat!?
Čakoski gracki načelnik, Štef Kovačov, je položil račune za lanjsko leto. Grad je i dale v minuso kaj bi minister za peneze rekel, potrošil je več nek je mel, nek je zalužil. Minos je ne veliki, nekaj vejč od šest milijonov. Minos kak minos, negda je vekši, negda menši, očem reči, kak se zeme. Znate kak naši Međimorci i Čakovčanci velijo: dug je ne ruon dober pajdaš, ak zemeš zajma ruon tak si dužen i to tak dugo dok ga ne vrneš. Znate kak je to, nebremo se niti mi porezni obvezniki restrgati i v kratkom cajto se zajme vrnuti. Ne smo mi Ivice (Todoriči) kaj bi mogli trošiti čuda vejč nek imamo.
Najte me, prosim vas lepo, krivo razmeti, ali moram pak par reči reči o ovomo našemo nadvožnjako pre Staromo hrasto. Niti policaji nečejo popravljati toga našega „starčeka“ šteromo je več kičma zavijena, ima brzčas osteoporozo, noge mo škljocajo, roke ga bolijo, a o išijaso kaj se nebodemo niti spominali. A znate kaj se je pripetilo? Dok so državni policaji dohajali v Čakovec glet toga našega nadvožnjaka, šteromo treba državna infuzija, došli so z Nedelišča i to prek nadvožnjaka šteri čistam kredno zgledi, očem reči, još je drčen kak dečko v nejjakšim letima, pak so oni mislili da mi iščemo peneze za toga nadvožnjaka. De so si oni mislili da mi v Čakovco imamo dva nadvožnjake, a čakoski načelnik je bil v Saboro, pak jif je ne mogel dočakati pre gracki tabli z nedelske strane. No, kuliko vidimo, čakoski načelnik jim je to zbajal jerbo je „zna se“ na vlasti tak da se mam znalo da ne bode nikaj od toga, očem reči, z te mele se kruh ne bode jel, kak bi teca Franca rekla, od toga posla ne bode nikaj i te naši penezi bodo nekam drugam odišli. Gradonačelnik Štef je pozabil da so prije „Zna se“ bili na vlasti „Kukurikači“ i da smo mi Čakovčari unda meli tam svojega čoveka šteri je pod sobom mel ceste, autobane i nadvožnjake, Veselina Biševca, pak je niti unda ne nadvožnjak došel na red. Kaj bi rekli, Vlada je ne kriva jerbo niti jedna ga je ne štela zeti v posel, unda v nešternomo drugomo grmo leži zajec. Si znamo da je, pred četrdeset let, ondašji „međimorski župan“ Danijel Režek napravil toga nadvožnjaka i brzčas je negdi zahuzal jerbo da je napravil onakšega kakši je v Golobetki, očem reči, pre Nedeliščo unda ga još ne bi morali popravljati. Ili da smo se čuda mejej prek jega vozili ne bi zgledal kak starec i ne bi ga bolele znucane staračke kosti. Makar so to ne nekša visoka leta, bar ne za čoveka.
Ne znati kaj itak očejo te v Čakomo? Kuliko sam mel za čuti očejo nam zaprti cvečaro pre čakoskomo pijaco. Najte me krivo razmeti, pak de bodemo mi unda kupuvali cvetje našaj pucaj i ženaj? Ak cvečara mora negdi biti unda mora biti tu pre pijaco. Ak je tu bila pedeset let unda mora biti i dale. Ovima v Čakomo se je tua cvečara ne splatila pak so jo dali privatnikaj v roke. I ne bodete veruvali, privatniko ona ide od roke i još k tomo plača placarino, a Čakom je ne mogel vum ziti, a neje niti moral placarino, očem reči, najme plačati. I to je još ne se, oni očejo cvečaro zaprti kaj bodo tu otprli blagajno de bodemo mi mogli čeke plačati. Pak ljudi moji, čeki se morejo plačati bilo de, a ne tu polek pijaca. Prešpanceral sam se po čakoskoj varoši i na sakomo korako je nekši plac prazen, a oni bi ruon cvečaro zaprli. Prosil bi lepo se ove v Čakomo, od direktorice pak do Iveka Perhoča, nek si još jempot dobro pregruntajo predi nek cvečaro zaprejo. A i gradonačelnik dosti cvetja podeli!
Nebrem veruvati kak ovi v Evropi znajo za Mađerko i jeni breščajek v Štrigovi? A znajo jerbo da ne znajo najbrž nej dali peneze kaj se on zlišpa. Ve vidite, dok vam pripovedam kak je Mađerka bila na dobromo glaso, da je bila dobrostoječa i dobro držeča, unda se vi smejete z mene. No, v ono vreme dok se je Mađerka klatarila po ovomo sveto, dok je išla z kolena na koleno, unda so se ljudi ne spominali o Mađerkinomo brego (čitaj: breščajko) neg o Mađerkinoj grabici, očem reči, jenoj jačkici. Denes bi mogli reči da so se ne spominali o međogorjo nego o međonožjo. Dok si počnem gruntati o onomo kaj sam čul za Mađerko, unda navek dojdem na to da je bila prekprokleto lepa, dobra, frčna, vroča i sima je dala šteri so jo lepo prosili. Velijo žene z čehare, da je saki on šteri je išel z Mađerkom na jeni breg svršil vu jenoj grabi, očem reči, jački. I šteri je jempot išel sploh je silili nazaj. Pak je ne ona kriva kaj je bila napravlena od takšega materjala šteroga je trelo saki den obdelavati ili kak so naši stari rekli, hoblati. V Mađerkino vreme se je nišči ne o tomo nikaj spominal, si so se znali i si so bili stiha i sam so se na smeh držali dok je Mađerka (i jena jačkica) bila na dnevnomo redo. Kak oni kaj so več tam bili tak i oni kaj so na red čakali. Unda ga ne bilo jalnošov jerbo ga v Mađerkinom rudniko bilo dosti posla za se šteri so šteli delati. Ve dok znamo kak je Mađerka bila na dobromo glaso i kuliko je pomogla Štrigovčancima, brzčas bodo štrigoski turistički težaki postajli nekšo spomen-tabljo kaj se Mađerka i jena dobra dela, na razveseljuvanjo moških, ne pozabijo. Nek vnuki znajo kam so jim japice hodali na okrepo: jeden den v klet, jeden den v Mađerkin rudnik!
Nigdar je ne kesno kaj čovek (ili pak žena) doživi ono očemo so senjali. Naši stareši so odnegda, od stoletja sedmog, senjali Lejpo našo, a mi smo jo doživeli. No, ne onakšo kakšo so oni senjali, ali jo ve imamo onakšo kakšo smo si znali naprajti. Tak je i prislavčarka, Mirjana Hudin, na leta senjala kak bi popevala na televiziji. Božek joj je dal glasa šteroga je ona rabila sam v svoji hiži, na svojemo grunto i za pajdašijo, a unda so joj se ostvarile senje. Ali ne v Lepoj našoj nek je morala iti tijam v Beograd popevat kaj se jeni glas bode čul i po Međimorjo. Kak bilo da bilo, ona je svoje spopevala i to jako kredno, tak da se nadjam da joj je to ne zadjipot kaj je popevala na televiziji. Kaj reči, jako je lepo dok se čoveko senje ostvarijo, tak sam vam ja senjal, pred par dni, kak bode plin podražil i fčera sam dobil čeka i to hajdi vekšega nek minuli mesec. I kaj se bodem ve bunil, pak sam to senjal!
Tak vam i moj sosed z druge strane vulice hajdipot senja zvezdo i to ono petokraka i još k tomo črleno. I z tem se fali dok dojde v krčmo. Ne sam uspel zazvediti kaj on oče od te zvezde i zakaj jo senja? Prtuletje je več prešlo prek poceka i počelo je glavice vum rivati i prtuletno cvetje. Fčera mi je sosed nekaj mrmlal o jegovim senjama, jegovoj črlenoj zvezdi i plavoj ljubičici štero je v roki držal. Morem vam reči da sam da čistam nikaj ne razmel!
