[layerslider id=”6″]
Če duže dale se vejč naši ljudi, očem reči, Međimorcov znova odhaja prek meje iskat posla ili kak so to negda, tam šezdesetih i sedemdesetih, odhajali z praznim želocom za belim kruhom. Pak so tu z nami teška vremena gde je čuda posla, ali ne za se tak da mladi ljudi nemajo strpleja, pak unda odhajajo vum jerbo tam leži dohajao do posla i do svojega kruha i sam tak morejo planerati bolšo i lepšo budučnost. Negdi sam čul kak so nešterni spametni davali naputke mladima: deca, vučite se ak očete nekaj meti i nekaj vrediti, jer Nemci, Švicarci, Šveđani, Irci, a i si drugi po celom belom sveto nucajo školano deco. Dok se tak ljudi spominajo i dok pomalem iščejo posla, a furt gledijo prek meje, unda se navek zmislim one pesme prečanskog srba z Mostara, Alekse Šantiča, v šteroj je on otprilike ovak „popeval“: Ostanite tu, doma! Sonce ljuckoga neba nebo vas grelo tak kak ovo naše greje, žohki so tam falački kruha gde nemaš nikoga svojega, de nemaš niti brata, sestro, mamo… I kaj se nebom dale zmišluval. To smo pesmo negda „popevali“ našima dok so odhajali v Kanado, Australijo…, a posle je naših bregov listek, Zvonkec Klemenčičov, napisal i našo domačo pesmo v šteroj ovak veli: Međimorci dragi, najte hoditi preveč v stranjski svet, bodite doma, tu tak je lepo, živeli Međimorci , jezero let! Se je to lepo i dobro, kakši smo mi Međimorci, pak mi bi nejrajši živeli tu na ovomo „falačko zemle med dvemi vodami“, vu tomo našemo i horvackomo cvetnjako sam da bi meli kaj delati i da bi od svojega dela mogli kak-tak živeti. Si znajo da ne iščemo preveč, sam posla i kruha, ali da ga niti toga tu doma ne unda se nekam tre obrnuti jerbo od čakanja se nebre živeti, a znate kak je deci štera saki den morajo štečiti od svojih japeki i mamiki kune za sok, piviko, gemišt…, a znajo da i starci nemajo preveč. Nadjam se da bode i tomo jempot došel kraj jerbo je teško razmeti kak naša deca, naši ljudi odhajajo vum, a stranjski dohajajo delat k nam vu of naš „Cvetnjak“. Tre to posložiti jerbo se bodemo mi Međimorci rezišli po celom sveto, a tu na ovomo našemo „Falačko“ bodo hercuvali nekši drugi klinci šteri so se sem dotepli, a nemajo tu svoje koreje. Kaj bodo nam rekli naši japice i mamice od šterih smo si posodili ovoga našega „Cvetnjaka“ da bodo čuli kaj smo ga zahuzali. A kak je pesnik Zvonkec rekel: …to je falaček zemle nejlepši na sveto, kak raj je lepi, med Murom i Dravom leži, tu čuješ ftičjo nejlepšo popevko, Međimorje to je – tu domaš boš ti! Nikaj tu ni tre reči kcoj, Zvonkec je se rekel, sam mi moramo nejpredi iskati posla doma, a ne sam leteti vum de za šako ojerov pozabimo se: japo, mamo, brata, sestro, pajdašijo i črez deset – dvajsti let Međimorci bodo seposot sam ga jiv v Međimorjo nebo!?
Minuli tjeden so međimorski šporcki težaki zbirali nejbolše med sobom. Verjem da ste čuli, prečitali kak je naš „konjanik“ Filip Ude još navek nejbolši športaš na ovomo našemo „Falačko zemle“, a za nejbolšo športašico je zebrana Paula Posavec, strahoninčarka štera kak „gastarbajter“ igra v ženskomo rokometnomo klubo Zrinski z Čakovca. Ona nejbole igra, nejveč golov zabivle, igra i za reprezentacijo Lejpe naše i to več par let. Nek se Fičo ne srdi, ali ona mi je čuda lepša od jega. Šporcki težaki so dali i nagrado za „Fer-plej“, a to je ono da nešterni športaši napravi nekaj kaj je lejpo i dobro, a neje moral. Ovo leto je to nagrado dobil, Buzovčar, Ivek Pataftov, šteri je za zeta v Strahoninco. On beži, ali ne od žene i hiže, neg kak negdašji športaš, očem reči, labodoritaš, beži onak za svojo dušo (i telo) kaj ne zahrđavi doma. Tak vam je on bežal po Golobetki sakipot dok so ga zvali i osvojil je brončano medaljo, ali dok jo je dobil dal jo je Drageco Pintaričo, Kotoripčano šteri je osvojil štrto mesto. Ivek je rekel da je Dragec bolši trkač od jega, ali je bil malo bleserani, pak je ne sakipot mogel dati se od sebe. Saka čast Iveko, on je napravil ono kaj mo je srce šepetujilo, a Buzuvčari i Strahoninčari se jako štimajo žnjim. A kaj jegovo familijo nebomo spominjali.
Ve vidite, da so naši sosedi Janezi, očem reči, jivi rokometaši na Sveckomo prvenstvo vu Francuskoj dali svojo brončano želencijo našim rokometašima jerbo naši čuda bole igrajo i bolši so rokometaši od jif sam so ne meli srečo i zabili so sam jenoga gola meje od Janezov, unda bi i Janezi bili dobili nagrado za „Fer plej“. Nek jim ve bode žal, a meli so priliko.
Dok je naš dugoletni političar, šteri je premazani z sim političkim maščama, Vladek Šeks, videl kak so vum z Sabornice nesli sabornika Ivija Pernarovoga potožil se je svojemo pajdašo Franceko Gregoričo kak mo je jako žal kaj je to ne predi postala šega v Saboro kaj neporedne i zmočene sabornike nosijo vum. Zbajal je: dok je mene trelo nesti unda ga nikoga ne bilo blizo!
Se si nekaj gruntam kaj bi trelo naprajti prinas v Lepoj našoj kaj bi se mi Međimorci, a i naši sosedi odnavek, očem reči, od stoletja sedmog, nazaj vrnuli na zemle kak smo se vrnuli v šume. Što bi rekel da mi imamo tak spametne političare, z jenim potezom nalivpera so rešili problem z šumaj: podražili so plina, zmenšali plače težakaj tak da ve nemajo za plin, pak se morajo greti na drva. To je grdo rečeno morajo, očem reči, morejo se ak imajo šumo. A šume so seposot okoli nas, a od negda je to nam ostalo v glavama, se kaj vidimo to je naše. Šumi ga čuda, ali ga ne dosti za se, tak da ve drva imajo sam oni nejfletneši. To več znate, oni šteri nemajo svojo šumo hodajo na mamičino, a mamičino vam je ono de ga navek je. Tak delajo to oni zakajeni šteri se na leta grejejo na drva, a nemajo niti klafter šume, a ruon tak na grunto imajo kuružnjaka, šteri je sako leto pun, a nemajo niti klafter zemle. Došlo je do problema, očem reči, do svaje dok se je v šumi našlo čuda vejč težakov z motornaj žagaj nek ga v šumi je drv. A gazdi šumi se nejvečpot grejejo na plin, a z jivaj drvaj nešči drugi kuri. Znate kak mi moški šparamo z drvima? Saki den hodamo v krčmo k Štefici i tam se grejemo, pasemo oči i trosimo gemištece, ali ne znati kaj bodemo z ženami naprajli? Pak se ženama ne šika kaj bodo saki den v krčmi kak god dober bil konobar za šankom! No, nejso šume sam za na ogej metati, zelene šume obnavljajo i zraka, pak kaj ste pozabili kak v šumi pluča dojdejo na svoje. Teca Franca veli: šumi ga se meje, zraka ga se meje i zato nam političari dišejo na škrge. A sam zdravi i zadovolni političari more nekaj spametnoga preštunderati. Kak je počelo najbrž bodemo pod drevima našli političare kaj bodo premišlavali i gruntali kaj je za nas nejbole. Za sebe so znali i predi nek so genuli v politiko!
Da mi je to što god drugi rekel, a ne moj, naš i vaš glavni urednik, gospon Dejan, ne bi veruval da je i Rumunjska postala za Hrvate, a i nas Međimorce, obečana zemla. Naši ljudi so počeli i tua hodat delat. Nevola Božeka ne moli, tak so govorili i naši stari, a ve je i na to došlo, dok prazen želodec kroli jemo je sejeno de ga bodemo napunili. Kak god nam je to teško priznati, ali tak je. Nejte me krivo razmeti, ali jako sam najgerek kak to bode z Rumunjskom i Rumunima zišlo? Kuliko sam mel za čuti, naši so počeli hodati k jim delat, a jivi k nam! Kaj ne bo zišlo na to da dok napravimo inventuro, črez cirka deset let, kaj bodemo zazvedili da naši tam delajo i dimo dohajajo ojere trošit i deco delat, a jivi tu ostajajo, tu peneze trošijo i tu deco delajo!!?? I unda se bodemo čudili, kak picek glisti, kak je pak vejč zakajenih neg beli?
Za razliko od želoca glava se ne oglasi dok je prazna!
Pak je došlo na svetlo dneva to da je Fašnik kriv za se i zato smo ga likviderali: em smo ga obesili, em smo ga skurili. Fiškali i soci so ne niti okom trepnuli makar je prinas v Lepoj našoj ukinuta smrtna kazna. Fašnik je Amerima kriv za Trumpa makar so ga sami zebrali, Fašnik je kriv za jegovo fizuro, Fašnik je kriv i za našo sosedo Melani jerbo se i ona nekaj počela motati okoli Piranskoga zaljeva, Fašnik je kriv za se one Muslimane šteri so došli na košto Angeli Merkel, zazvedili smo da je i Fašnik kriv kaj so nas Janezi pobedili v rokometo, ruon tak je i Fašnik dosudil penala za Dinamo vu Vinkovcima, a i Fašnik je nagovoril Plenkoviča kaj koalera z Mostovcima. Fašnik je kriv i za se putne naloge štere je Tomek Sauča napisal, potpisal, a peneze je podelili kak mo je Fašnik naredil. Fašnik je kriv i za četnike, a i za to kaj bodo naša deca pak morala iti vu vojsko. Fašnik je kriv i za to kaj je Koraj ne direktor Plina. Fašnika smo skurili za se kaj smo mo zbajali, a i za se ono kaj je kriv, a ne smo se mogli zmisliti. Zmislila me teca Franca da je najbrž Fašnik kriv i za Kikija Baloga šteri je na Opčinskomo vječo v Pupinom seli puščal cajke. Kaj bi ja da nemam teco?
Predi nek smo išli maškore glet v Čakovec si je žena išla glavo prat i frizuro delat. I si so jo prepoznali. Kaj ji je to trelo?
Kaj se Dinamo muoči i „kupuvle soce“ kaj pobeđuvle, kak to Torcida i Armada velijo, a i Bed Blu Bojsi so ne dauko, mesto kaj bi se dospomenuli da soci zemejo na zob Reko i kaj bo Reka počela gubiti. Unda bode publika kričala na druge, a Dinamo bode sigurno prvi. Ili još bole, nek Dinamo furt pobeđuvle pet – šest nula i unda jeden penal, jeden ofsajd ili pak jeden gol ne bode nikomo važen.
Ne bodete veruvali, ali v Selnici još postojijo Reformisti. Nesam niti ja veruval, ali sam jif videl na sliki i to ne sam v novinaj!
