[layerslider id=”6″]
Srbijanec mali Ivica Dačič je nejvekši stručnjak za Jugo povjest, za četnike, partizane i ustaše. On se zna kak da je pofčukal so pamet na ovom hataro negdašje naše države. On zna što je kaj bil, što je z kim tikve sadil, što je bil heroj, a što pak je tamanil se do čega je došel. Od jega moremo zazvediti kak je vođa četnikov i četnički vojvoda, Draža Mihajlovičov, bil narodni heroj i da se je on boril na strani pobjednika v drugomo rato. Je istina je, bil je na strani pobjednika dok so četrdesetpete si skupa (partizani i četniki) dohajali vum z šume, a dok so četrdesetprve, druge išli v šumo unda so išli saki po svojemo poto. No, što je kaj bil od Srbijancov, tu se ne bi štel mešati, ali mali Ivica zna se o našemo nadbiskopo i blaženiko Lojzeko Stepinco, šteroga so komunisti (čitaj: partizani) v rešt zaprli i z kučnoga rešta je odišel k Božeko na račun. On se zna o jemo makar ga je nigdar ne videl jerbo je Lojzek več zdavnja bil pokojni dok se mali Ivica dobečal na of svet. On zna se ono kaj se pripoveda, negdi je nekaj malo prečital (i to je čital sam ono kaj mo paše) ili pak mo je Vojo Šešeljov o tomo nekaj pripovedal, ali ono kaj pišejo ljudi šteri so Lojzeka poznali i šteri so znali kaj je on delal, kak se ponašal i da je za maloga čoveka drukal, to jega, brzčas, ne zanima preveč. Lani je zišla kniga o tomo kaj so Gestapo i Ozna zapisali o Lojzeko i da je mali Ivica štel nekaj pravzaprav znati o nadbiskopo i jegovomo poslo, predi, za vreme i posle Drugoga rata unda bi si on o tomo i prečital, a ne kaj vjutro pripoveda ono kaj je v noči senjal i to po ono staroj pučkoj: kaj se babi snilo to se je i pripetilo. Lani je mali Ivica napunil pedeset let, pak bi mo se nekša pamet več i šikala.
Da bi mali Ivica štel pravzaprav nekaj znati i da bi si mogel nekaj pregruntati vu toj svojoj četničkoj glavici mogel si je v roke zeti popise pučanstva v negdašjoj i predratnoj Kraljevini SHS (Srbov,Hrvatov i Slovencov), a i one šteri so napravleni na istomo hataro kratek cajt posle rata i unda bi znal kuliko je Srbov sfondano v Jasenovco ili pak negdi drugdi za vreme Drugoga rata, a i kuliko je prvoslavcov Lojzek Stepincov dal prekrstiti. Po zadjemo popiso predi nek je rat buknul, a šteri je bil napravleni 1931. leta je v Kraljevini SHS bilo 6.785.499 pravoslavcov i 6.085.482 katolikov, a prvipot posle rata so pučanstvo popišuvali 1948. leta i unda so našli 7.783.046 pravoslavcov i 5.199.770 katolikov. To se več od 1948. leta zna i mali Ivica je ne trebal završiti nikše velike škole kaj bi si mogel zrečunati da je posle Drugoga rata bilo nekaj malo meje od milijon pravoslavcov vejč, a skorom devecto jezer katolikov meje. Neje tre biti preveč spameten kaj bi si čovek v pamet zel što je bil sfondani v rato, a šterih ga vejč došlo vum z šume nek jif je odišlo v šumo. Čistam lefko se more zrečunati kuliko jif je pravzapraf sfondano v Jasenovco i tu je Stipe Mesičov rekel istino, ak je da rekel, kak je v Jasenovco bil radni logor i da so tam nucali logoraše kaj so delali, a ne kaj bi jif sfondali i na drugi svet pošiljali. Ak bi državna Udba dala papere štere so poharačili (čitaj: zamračili) v Jasenovco unda bi se došlo na svetlo dneva i se bi se zazvedilo, ali se to nigdar ne bo pripetilo jerbo je drug Ljubičica plava tak to naredil. Ruon tak se z ovih brojki da prečitati kuliko so ljudi partizani potamanili posle drugoga rata i što je nastradal v Križnomo poto i po grabama od Blajburga, Dravograda, Kočevskoga roga, Hude Jame, Laškoga, Celja, Maribora, tezna, Macelja, Lepe Bukve, Jazovke, pak se do Hergcegovine i Makedonije.
Kak navek, tak so nam i predi minulih izborov političari obečuvali da ak oni dojdo na vlast bodo zmenšali plače sabornikaj šteri redovito ne hodajo v sabornico unda kaj bodo za to čim meje plačeni. To so nam nejbole obečuvali ovi z Mosta i Živoga zida. Kuliko znamo ovi z Mosta so se bole kcoj držali i ve, skupa z Hadezejom, držijo vu svojaj slabaj rokaj cugle državne vlasti. Nebrem reči da so ne održali reč: predložili so kaj bi se zmenšale plače sabornikov, ali je te Zakon ne prešel jerbo je v sabornici ne bilo dosti sabornikov kaj bi ga bili zglasali. Kaj ne bo unda nešči rekel da ga ne bilo dobre vole za to zmenšanje naprajti. Brzčas so oni, šterima se je trebala plača zmenšati, pak ne došli. Znajo oni od čega muhe crkajo!
Ne bi se štel zameriti Serjančaraj, ali nebrem jif nekak razmeti. Cugi tak retko hodajo črez Središče, sam dvapot na den, i Serjančari se ne ftegnejo vugnuti z štreke, a negda so cugi saki čas išli črez Središče i Serjančari so čuda bole pazili, a ve se sam pelajo, pak kak bode bode. Kak na ruskomo roleto. A si znamo da je cug navek fletneši. Sa je sreča kaj je ve zadjipot dok so se zišli cug i auto na štreki nišči ne poginul.
Dok sam premišlaval o Serjančarima na pamet mi je pal naš negdašji glumac Zvonkec Rogoz šteri je napravil dete v devedeset i petomo leti. On je štrumfal svojo mlajšo (ne bi vam znal reči štero več po redo) ženico i gruntal si je kak on ne mora paziti jerbo je jegov materijal preslab kaj bi nekaj zafremal, ali je ne bilo tak. Zišlo je kak i v Središčo de je došel cug kak strela z vedroga neba, tak je i Zvonkec dete napravil. Kaj reči, Zvonkec je več bil prestari kaj bi bil ljubosumen, pak je dete priznal, a i dok je mali zgovoril prvo reč ona je bila: tata. A si znamo da deca nigdar ne lažejo! Teca Franca mi je pošepetnula. Zvonkec je pazil, ali so drugi ne!
Pesma štero si naš župan, Matek Posavcov, več mesec dni popevle je ona sima nam nejlepša dok malo kesneše dimo dohajamo: Levo, desno, nigdi mojega stana, oj vulico alaj si mi… Nikak nebre zazvediti je li bi rajši i dale sedel v lepoj i lopošnatoj županovoj fotelji ili pak bi mo se bole šikala ova znucana i bole vroča gracka. Kuliko sam mel za čuti, bil je i pre babi coprnici, i to dvapot, ali jempot je zišlo ovak, a drugipot onak. I soseda mo je šlogala na soc od kave, ali kotaček sreče se jen cajt vrti v jeno, a drugoč v drugo strano. Več jeno tripot, dok smo se zišli, sam mel priliko videti kak saki čas v zrak hiče medeka. Neje to zamjenik čakoskoga gradonačelnika, šteri je gradonačelničko foteljo poklonil pajdašo i kumo Štefo, nek je to skupni pet kuni. Nesam uspel zazvediti na šteri strani je grad, a na šteroj pak županija. Korizma je blizo i Matek bode moral sima nama reči po šteroj kalvariji bode križa nosil.
Kuliko vidimo Prilok je nejbolša varoš na ovomo našemo“Falačko zemle med dvemi vodami“ i tam ga nejveč oni šteri bi šteli sedeti v gradonačelničkoj fotelji. Znova bi Miškec Hreščov štel biti prvi čovek Priloka. On je to negda bil, a ve pak si je nekak pregruntal da bi to štel i mogel još jempot. Saka sličnost z mojom sosedom Barikom je čistam slučajna jerbo i ona bi štela drugoč, ali meni je jempot čistam dosti. Isto tak, kuliko sam mel za čuti, Drageco Glavini je nekak dosadno doma kak penzionero, pak ga žena tira nek ide nekaj delat, a kaj bo čovek delal nek ono kaj nejbole zna, tak da se bode, najbrž, i on zaputil v trko za nejvrednešom gracko foteljom. Dok sam bil v Priloko na dvajstiletnici otkak je Prilok postal grad, nesam ruon primetil da se je Ljubek zmuočil i da bode gradonačelničke puške hitil v kuruzo, tak da bode te maraton za priločkoga načelnika dosti interesanten i najbrž bode dosti trkačov jerbo se je i na Valentinovo vidlo da priločki esdepeovci, ruon tak, nekaj gruntajo. Ne bi se štel mešati, ali posle Mimija so furt sam sveče nosili.
No, neje sam v Priloko tak. Kuliko sam mel za čuti i v Doljnji Dobravi se nekaj šepetuji kak se gospon Marijan Varga isto ravna nazaj v načelničko foteljo. Dobravčani ga nagovarjajo jerbo je on bil nejbolši do ve, pak bi trelo još jempot sprobati je li je ne pozabil kak se to v opčini dobro dela. Sam kaj ne bo i za to moja soseda Barika zazvedila kak i gospon Varga more drugipot, unda sam zgorel zanavek.
Kaj se izborov dotikavle nejmirneše je v hadezejo. Tam ga ne nikaj novoga, još navek spijo zimski san. Brzčas nejspametneše, vuni je još dosti zima, a na cug za opozicijo navek ftegnejo dojti.
Zadnjipot sam pisal o novomo ravnatelo bolnice, Robijo Grudičo, i jegovomo kumo šteroga je postavil na šefovsko mesto. Lejpo sam rekel, saka čast Robijo, to je stara bečka i katolička škola i Robi zna de je kumo mesto. No, kak zgledi, Robijov kum je bil tua kapljica v kupici strpleja štera je prelijala kupico strpleja v bolnici. Si šteri so ne ruon za Robijo so skočili, postajli so se na zadnje noge i ne znam kaj se još ne delajo, a dok je zadji sanaciski ravnatel ili pak upravitel (nejte me loviti za reč), Štef Korajov, dal posla svojoj familiji, rodbini, svojim pajdašima za saki den, a i svojim partiskim pajdašima i istomišlenikima, unda je to bilo vredo jerbo je i dale mirno tekla Trnava pod trnavskim mostima kak da se nikaj ne pripetilo. A ve dok nešči preseli svojega kuma sam za jedno štengo više, več je to smrtni greh. Kuliko vidimo nega pravice niti med doktorskim cvetjem jerbo kaj je jenima dopuščeno to je drugima ne. Bar za ve!
