[layerslider id=”6″]
Pak je velikoga praha zdigla precednica Kolinda ( a sam se za dobrim kojima praši) dok je rekla kaj bi znova naši dečki , a i zebrane puce štere bodo mele vupeše, išli vo vojsko kaj se nekaj spametnoga navčijo. Nebrem nikak razmeti naše Međimorce, a i sosede z Lejpe naše kaj odma v zrak skačejo ili pak se postavljajo na zadje noge. Ljudi moji, pak kaj oni ne čitajo novine i ne poslušajo kaj pak naši sosedi z onoga hatara de shaja sunce senjajo? Pak so znova Vučiči, Vulini, Dačiči, Nikoliči, Šešelji počeli senjati mejo na negdašjoj Čosičovoj i Slobinoj crti Virovitica – Karlovac – Karlobag. I neje to se. Počeli so dobavljati reoplane z Rusije, Bjelorusije i što još zna šterih svojih pajdašov. A si znamo da jim Rusija drži štajngo, da oni trebajo Rusiji zbogradi svaje z Amerima i da jif oni ruon zato i podržavlejo. I dok to se mi znamo unda nebremo sam doma čuseti i čakati kaj se bode pripetilo, je li bodo oni pak genuli na urlab v Lejpo našo z tenkima kak so to naprajli 1991. leta ili se bodo predomislili i curiknuli. Neje devedesetprva bila tak zdavnja pak se još navek zmislimo kaj so z nas naprajli, kak so nam zeli se oružje i unda so započeli ratuvati protiv nas. Dok Srbi kupuvlejo reoplane i što još zna kakše se oružje za štere mi ne znamo, unda je red da i mi pripravimo našo deco kaj bodo nekaj znali kaj se dotikavle vojske i ratuvanja. No, ne mora biti da bode rat, ali ono kaj čovek ili pak dete zna to mo nebre preškoditi. Bole da se mi prepravimo pak ničega ne bode nego da živimo brez brige, pak se nekaj pripeti. Si mi očemo kaj ne bode pak došlo do rata jerbo znamo kakša je rat nevola i vuteska i kuliko ljudi je dalo svoje živote v minulomo rato i zato se moramo prepravljati tak kaj do rata ne bode došlo. Ali saki od nas mora nekaj doprinesti, pak tak i naša deca morajo malo iti vu vojsko kaj se navčijo ono kaj ne znajo i ono kaj jif mi doma nebremo navčiti. Nikaj jim ne bo, a to kaj se mesec ili dva ne bodo držali mami za kikle, kaj ne bodo na mamikinoj kuhji i kaj ne bodo furt na Fejsbuko, to je nejmenša nevola. Bole da znamo i kaj to ne bodemo nigdar nucali nego da bodemo nucali, a ne bodemo znali!
Na se zadje je i pošta došla na red kaj se i tam red napravi i to tak kaj so postajli redomat tak se ve zna što je da došel, što je da na redo i što kaj od poštari i poštarici nuca. Do ve se je znalo se: de muoči krv dati, de si muoči tlaka zmeriti, de muoči mokračo donesti, de si moreš peneze zdiči, čeke platiti, knige i igračke kupiti, ali de muoči pismo i paketa poslati ili pak zdiči to je bil nejvekši kunšt. Kak i v trafiki, tam se moreš, a nejteži je cajtunge kupiti. Ve bo se i na pošti znalo da šteri šalter dela, da je štera poštarica na pušenjo i pije kavico, štera si nofte lakera, a štera ne puši na poslo i furt dela. Najbrž bode to na pošti čuda fletneše išlo sam bi jif još prosil kaj bi one napuhjene poštarice i nervozni poštari delali sam odvečer dok ja ne dohajam v pošto.
Lepo je to Vjeran Vrbancov, naš međimorec šteri je kak gastarbajter v belom Zagreb grado, rekel kak smo mi Međimorci za posel od jutra do zutra, od zipke do grobja i mi ga to čistam lepo razmemo, ali na jemo je kaj to i ovima v Zagrebo reče i pokaže. Mortik je to ne tak teško dokazati i pokazati Purgerima, ali čuda teži ide z Dalmošima jerbo naši sosedi i zemljaki z debele vode se svoje navike nosijo z sobom i prodavlejo jif sima okoli sebe, a čuda teži dopuščajo sima okoli sebe kaj bi jim prodali svoje makar so nejvečpot čuda bolše. Vjeran zna da je čuda naših Međimorcov v Zagrebo, imajo i tam svoje Zavičajno društo, dosti je onih šteri so v Zagrebo na dobromo glaso (Mikec, Režek, Pevec, Madić, Kolarić, Berljak, Deban, Andročeci, Sobočan, Smrtić, Sokač, Trstenjak), ali je još čuda vejč onih šteri so pozabili otkod so došli i od jif Međimorje naše malo, te naš Hrvatski cvetnjak od teh nema nikšega hasna. Bilo bi jako lejpo da bi to Vjeran uspel spremeniti i kaj bi se več jempot i mi Međimorci skup držali kak Dalmoši ili pak Hercegovci, makar ne nosimo bele štonfe. Brzčas bi se si mi morali rešiti našega međimorskoga jala, delati i spominati se brez fige v žepo. Vjeran je dobro genol, mladi je i zna kaj se tre, tak da bi mogel od nas Međimorcov v Zagrebo naprajti takšo škvadro štero bi si poštuvali.
Nega mira med tem našim međimorskim cvetjom niti po zimi dok je zemla zmržjena i dok zobi cvokočejo. Par meseci je minulo otkak je doktor Robi Grudičov došel za gazdo v bolnici i furt mo cepanice pod noge podmečemo mesto kaj bi mo, si skupa, pomogli kaj neka napravi od te naše bolnice kaj bode bolša, kaj se več ne bodemo strahom pred niti jenim betegom. Ve so pak počeli na red pobirati doktora Grudiča kaj je svojega kuma postavil za šefa? Pak ljudi moji, koga bode postavil ak ne bode kuma? Prosim vas lejpo, denite roko na srce i priznajte: koga si vi zbirate za kuma? Bar je to čistam lefko pitanje, pak navek si zbiramo sam nejbolše! No, pak tak je i doktor Grudić zebral sebi za kuma dobroga pajdaša i nejbolšega kirurga, doktora Kozjaka, i unda ne vidim nikaj hudoga v temo kaj ga je ve i postavil za šefa. Pak čim je došel za ravnatelja bolnice lepo je rekel da bode postavlal za šefe sam nejbolše i ve je to napravil pak nam niti to ne paše. Nesmo niti mi Međimorci ruon takši poštejaki kak se držimo. Poglednite, napriliko, pak čakoski gracki načelnik, Štef Kovačov, si je zel svojega kuma Maria Medveda za svojega zamjenika i to nikomo ne smeta jerbo so oni političari, oni se smejo i morejo, a doktori to nesmejo. Ruon tak imamo i pre našaj komunalcaj kaj glavna direktorica spi z tehničkim direktorom. I to sako noč, ali to je ne nikaj jerbo so to gracki političari blagoslovili. Mi Međimorci čim dojdemo do politike, mam se curiknemo i hitimo puške v kuruzo. Pak je i doktora Grudiča politika postajla, ali si je svojega kuma on sam postavil i tu unda smeti bajati i gombati. Ne bi nikomo štel nikšo nevolo, a niti pak betega, ali ak vas, ipak, nevola, očem reči, beteg ili pak škliska vulica, donese v bolnico i ak dojdete pod pelecin doktora Kozjaka unda bodete vidli kuliko on zna i zakaj si ga je doktor Grudić zebral za kuma, očem reči, šefa!
Od da so prestale akcije „Nikaj nas nebre i nesme iznenaditi“, zima nas iznenadi sako leto i to ne tuliko nas kuliko naše cestare. Tak nas je i ovo leto iznenadilo to kaj voda po zimi zmrzavle, a pred mesec dni smo se smijali z Dalmošov kak so se čudili kaj jim je zmrzla voda v cevima. Prinas pak je zmzel dežd na zemli i ne sam kaj je zmrzel nek se je pretvoril v led i to v on škliski, tak da so doktori meli pune roke posla, a i potrošilo se je par sto kil gipsa. Kaj reči, kak auti morajo po zimi meti zimske gume isto tak moramo i mi na svojim šolcima meti gumejake ak nečemo pasti po ledo. I ne sam to, ak več moramo hodati po vuni dok je led, unda tre hodati kak po jejcima ak očemo kaj nam jejci, noge, roke i glave ostanejo cele. To se mi si znamo sam se toga ne držimo, ali po zimi je sila teža nekša jakša, pak se čudapot pripeti kaj smo mi na hrpto, a noge v zrako. Žene znajo kak se unda tre priložiti, ali zato mi moški nejvečpot završimo v gipso.
Pripoveda se i to navelikom kak se bode gospa Melanija Trump, naša soseda z Dežele, rezišla od svojega moža, a čim se o temo počelo šepetujiti sosedi Janezi so mam počeli delati računico. Oni kakši so več je, bodo od Amerike, prek arbitraže, iskali pol Amerike. Ak gospon Trump oče znati kakši so Janezi zahrptni delavci nek pita nas, prve sosede. Zmislite se sam kak smo mi ostali brez Raskrižja , Svete Gere, (Štrigovo još navek senjajo), kak smo na arbitraži za naš Piranski zaljev, a i još se ne zna čije so ribe v našemo Jadrano? Našlo se je par sto ribi štere govorijo slovenski i ve te ribe vučijo druge, a unda se pe na referendum, očem reči, arbitražo i Janezi bodo si odvlekli se one štere govorijo slovenski. A i vodo nas bodo terjali. Ne znati je li je gospon Trump to se znal predi nek je prisegel za gospo Melanijo?
Još je dosti velika megla na međimorskomo političkomo nebi jerbo se još navek ne zna kam bode prevagnulo županovo srce, je li mo več vredijo Međimorke (i Međimorci) ili pak Čakovčanke (i Čakovčanci). Saki den ga se meje cajta, saki den je den D se bliže, ali još predi nek se rezidejo ove zimske megle bode se se vidlo i znalo!
Emteče je došel do svojega kraja. Več duže od deset let so nas sam hale zmišluvale da je tu v centro Čakovca, polek čakoskoga parka negda živela i delala tekstilna fabrika v štero so još negda zafremali brača Graner i v šteroj je, ne tak zdavnja, delalo i kruheka služilo cirka trijezere ženi i od je živelo isto tuliko, ak ne i vejč, familiji. Kuliko vidimo, hiže se rušijo, pogonov ga več ne, a zutra bode gospon Đurkin tu zazidal nekaj čistam drugo. Istina Božek, neje niti fabriki mesto pre glavnomo grackom trgo, ali je dosti emtečejovi fabriki bilo vum Čakovca, od Golobetke, prek Središča, Preloga do Kotoribe, ali so se odišle po riti k meši. A još ne tak zdavnja so se Ameri i jive žene šepurili v emtečejovaj gačaj, spavačicaj a i štomfaj. Kuliko vidimo vremena se mejajo, ali na huje. Bar za nas Međimorce!
Maškori so več počeli hercuvati na ovomo našemo „Falačko zemle med dvemi vodami“ i prvi so se zbudili z zimskoga sna ovi v Poturno. Makar so si Turenčani shodili kaj jim je v maškore došel i novi američki precednik Trump, ali je se to još navek ne moglo minuti brez Titija i jegovih pionirov. Kaša je god bil, kakša nevola, ali nikak ga nebremo zabiti!?
