Starci slavijo den mladosti – lepo se zmisliti!
Kaj je baba senjala to se je i pripetilo, najme kaj, kak se je pripovedalo tak se je i pripetilo. Na svetoga Urbana mesto kaj bi bar mi Međimorci odhajali od kleti do kleti, od pelnice do pelnice jerbo so kleti i pelnice bile otprte i čakale so nas kaj dojdemo sprobavat vina štera so naši pajdaši vinogradari pobrali z trsja i posprajli v lagve kaj bodo krepila naša tela i razveseljuvala naša srca, hajdi naših pajdašov je odišlo v Kumrovec kaj tam preslavi svoj den mladosti. Si znuomo da so sako leto se stareši, ali još navek sako leto hodajo iskat v Kumrovec leta svoje mladosti. Nebrete veruvati, ali dosti takši stari ljudi se najde v Kumrovco, mašejo z staraj rabljenaj jugo zastavaj i još navek se plačejo kaj je Juga, i to več zdavnja, zanavek prepala i zanavek odišla po riti k meši. Sam je ime ostalo den mladosti, a se ostalo je sako leto se stareše i stareše. Znuom da je negda, negda dok smo bili mladi i zgrabni za sake fele posle bilo se lepše, ali da to nebremo nikak pozabiti, da nebremo fljučnuti vu šake i genuti z poslima napre to nebrem nikak razmeti? A nišči ne bode mesto nas delala, nišči ne bode mesto nas punil hižno kaso i kuliko god mi Božeka molili ne bode se več nigdar vrnul drug Tito šteri nam je srco priprasel i šteromo još navek popevlemo pesme i opraščamo mo se grehe. Kajkaj toga je rekla Evropa, očem reči evropska zajednica štera je lepo prebrojila i napisala što je i kak velike grehe napravil v minulomo stoletjo, što je i kuliko ljudi sfondal z ovoga sveta, što je moral hititi puške v kuruzo jerbo je hodal po krivomo poto i što je sakoga sfondal šteri je drugač mislil nek so to milsli nacisti, fašisti ili pak komunisti, a ostali so sam oni kaj hodajo po jenomo poto šteri je dopuščeni: nema kaj tu prinas hodati čovek levo ili desno nek mora sam ravno kak je to partija napisala i zacrtala. Sam je jeden pravi pot i si ostali so krivi i zmišleni.
Se je točno kaj Evropa veli sam so pre Ljubičici zahuzali
Znuomo da je Evropi trelo dosti cajta kaj je prebrojila što je kuliko ljudi porukel oliti sfondal v minulomo dvadesetomo stoletjo. Nejpredi so brojili kak je to bilo v Rusiji 1917. leta dok je komunizam dohajal v Rusiji, dok so ratuvali ruski boljševiki i menševiki i dok so Marks i Engels dopeljali Lenjina z Švicarske kaj napravi reda v Rusiji, očem reči, dok je trelo boljševike dopelati na vlast kaj je zgledalo kak da so Boljševiki pobedili v Okrobarskoj revoluciji, Znuomo da je Vladek Iličov Lenjin ne dugo trajal i da je posle jega z Rusijom i Sovjeckim Savezom vedrili i oblačil Josip Visarjonovič Đugašvili Staljin. Pravzaprav sam vam štel reči kak naši “kumrovečki mališani”, očem reči starci šteri slavijo den mladosti (i to več duže od četrdedet let) verjejo se Evropi i podržavlejo jo v semo: verjejo kak so Mao Ce Tung i Staljin potukli saki nekaj meje od pedese milijonov ljudi, verjajo i da je Vladek Lenjinov sfondal prek dvajsti milijonov, da je tu još Pol Pot, Fidel Kastro, šef Severne Koreje i kaj nem dale nabrajal ove menše grešnike, očem vam pravzaprav reči da naši “kumrovečki mališani” se priznajo i k srco jemljeo sam nebrejo nikak priznati kak je naša Ljubičica bela potukel cirka šesto jezer Hrvatov posle Drugoga rata. Se ostalo je vredo sam to nebre biti točno makar je po prvomo popiso pučanstava posle drugoga rata 1948. leta falilo prek sedemsto jezer Hrvatov. Priznajo i to da so Hrvati falili, ali nebre biti kaj bi tu mel Ljubičica bela prste jerbo je on bil dober čovek. Bar za sebe.
Na se zadje došli so si labodoritaši na svoje
Labodoritaško prvenstvo Lepe naše je došlo svojemo krajo. Kak i navek, jeni so zadovoljni, a drugi so se nadjali bolšemo. Kaj reči, Dinamovci so pak prvaki i to več 25- peti pot otkak ima svojo državo, slobodno i neovisno Lepo našo i otkak imamo svoje labodoritaško prvenstvo. Ne bi bil pošten ak ne bi priznal kak so se ovo leto si nadjali kak bode Hajduk prvi presekel vrpco na krajo prvenstva, ali so Hajdukovci i jivi gazdi Torcida vpešali na pol pota. Na pol pota so još navek bili prvi, još so navek kupuvali noveše i bolše labodoritaše, ali se to je ne nikaj pomoglo jerbo jim je v pipi vgaslo dok so jiv Dinamovci dvapot za redom sam v štiri dni pobedili i mam je odišla baba z kolači kak z ovima kaj se prvenstva dotikavle tak i z ovima kaj so se pekli za pobjednike kupa. Na se zadje je ruon tak zišlo: dok so Dinamovci potepli Evropo unda so se brnuli prema domačemo prvenstvu i domačemo kupo tak da je i jeno i drugo završilo v Maksimiro vu maksimirski hiži trofejov. Nesam vam rekel kak je i Reka zadji mesec dni vpešala pak so Dinamovci sami ostali na vrho, a žnjimi je bil sam novi precednik kluba Velimir Zajec brez staroga precednika Barišiča i več pomalem pozablenoga Zdravkeca Mamiča šteri je još navek na hodočaščo v Međugorjo i Dinamovci igrajo brez jega, ali ipak pobeđuvlejo kak i unda dok je on vedril i oblačil ne sam z Maksimirom, maksimirskom slačionicom nek i labodoritanjem Lepe naše.
Pelnice so bile otprte, lagvi na pipaj, a nas pijancov nigdi?
Kak i navek, kak je to red i ovo leto smo preslavili Urbanovo brežni svetek naših vinarov, vinogradorov, a i našega zaštitnika grozdja (dobroga i zdravoga), pelnici, lagvov i vina. Bila je fešta vu štrigoskomo Domo kulture i dobroga vina jeno soboto, a drugo soboto so naši vrli i nejbolši vinari otprli svoje pelnice. Pilo se je nejbolše vino kak ona štera so dobila sakefele želencije ili pak dekandere tak i ona druga štera je Božek dal kaj bodo krepila naša tela i razveseljuvala srca. Vina ga bilo sakefele, ali ga nas ne bilo seposot kak je to na leta znalo biti. Kaj vam bodem rekel, vina so bila vredo, ali so i cene bile još bole vredo. Moramo priznati kuliko je prava cena vina? Točno tuliko kuliko smo mi “pijanci” spremni platiti za jega. Ili pak kuliko penez imamo v žepo. Tak je ovo leto bilo, spili smo vino za se peneze štere smo meli v žepo, kaj so nam žene dale za te svetek, a ntit so vinari ne bili zadovoljni, a niti pak mi kaj nebom rekel pijanci nek “degustatori”. Zakaj? Jerbo nam so ostali prazni žepi, a vinarima lagvi na pol puni. Kaj vam to govori. Mi bi bili spili još jerbo smo navek pili kuliko moremo, ali ga ne bilo vejč ojerov v žepo. A to vam govori da so naša vina predraga za nas ak očemo i dale biti “pijanci” kak smo do ve navek bili!
