Nebodete veruvali, ali našemo nejdugovečnešemo političaro Joži Manoličo so počele suze teči dok sam ga zapital je li se mortik zmisli da so itak Beli ftiči (čitaj: Hajdukovci) bili zadji pot prvaki Lepe naše v labodoritanjo. Jedva sam uspel čoveka zmiriti. A pitam sam sebe i vas jerbo se je nekaj pripetilo pak so se ve si zdigli, a ne sam Torcida, protiv Dinama i pod silom očejo kaj bode ovo leto Hajduk prvi ftrgel ciljno trakico i postal prvak Lepe naše. Si dobro znuomo da so ona deca, štera so se narodila dok so zadji pot Hajdukovci bili prvaki več po fakultetaj, nešterni so več i ožejeni, a li to ne opravdavle labodoritaške soce kaj i oni drukajo za „Bile“ i sodijo po dvaelvere na sakoj utakmici. Kak smo vidli protiv Reke so ne dosti bili niti dva elveri za jeden bod jerbo je glavni beli topnik, Marko Livaja, ne uspel obedva zabiti. Mortik bi sodec bil i tretjega dosodil v sučevoj (svojoj) nadoknadi, ali so Hajdukovci ne vejčpot od dva pot došli pred Rekin gol i Reka je z sobom odnesla se tri bode z Poljuda na Kantrido, očem reči, na Rujevico. Ak bodo Hajdukovci i dale tak potepali bode kak so se hapili na ovo prtuletje teško bodo postali prvaki, makar so niti Dinamovci ne počeli preveč skrbno. Rekel sam vam več zadji pot da nekši čudni veter puše i v Maksimiro. Si znuomo, si smo zazvedili kak so i Dinamovci i Hajdukovci resprodali svoje nejbolše igrače i ve bi šteli biti tak dobri kak so bili i do fčera, ato nejde jerbo si klubi v Prvoj ligi znajo igrati nogomet i drago prodavlejo „svojo kožo“.
Hajdukovci ovo prvenstvo imajo vejč dosojenih penalov nek košarkaši Splita sloodnih hitanja!!
Što sto let pije te jako dugo živi i na pravomo je poto kaj nadživi i Jožo Manoliča.
Što itak brenza tuo obnovo Banovine
Si znajo i neje to nikaj novoga kak nešči brenza, nešči v Lepoj našoj, tuo obnovo Banovine i Petrinje. Od potresa na Banovini je minulo vejč od dve leti, Evropa se fali kak je dala hajdi penez, a precednik Vlade Andrej Drašek Plenkovičov je za to vreme zmenil vejč ministrov nek je popravil hiži. A nejveč pot je menjal one šteri so morali popravljati zrušene hiže. Ve je več ne mel koga deti pak je izbor opal na ne nejstarešega, ali nejiskusnešega hadezeovca Brankeca Bačičovoga. Kuliko sam mel za čuti nese niti on nadjal da ga bode jegov precednik hitil na prvo linijo fronte, ali dok precednik nekaj veli unda se nikaj ne pita , pak je tak napravil i Brankec: spakeral je kufre i pravac Pretrinja, pravac Sisak, Pravac Banovina. Dok je putuval od Zagreba do Banovine hajdi toga je obečal, kak nam tak i ljudima šteri stanuvlejo na Banovini, očem reči, vu podrtaj hižicaj ili pak kontejneraj. No, ali dok je došel na razrušeni teren i rezrušene hiže unda je zazvedil što je itak zategnul ručno brenzo na obnovi? Neje teško pogunuti, se more iti sam nejpredi tre v red dotirati, očem reči, poprajti rezrušene hiže štere na spisko ima Milči Pupovac Pupi, a kaj se nej predi nikaj drugo poprajlo na brigi ima Pupijova fiškalica Tatjana Vukobratovič i jegova potprecednica naše Valde Anja Šimpraga. Kuliko vidimo, zabadav smo mi pobedili v zadjemo rato, ak nas Srbi i dale kontrolerajo i moremo naprajti sam ono kaj oni očejo i za kaj nam oni dajo viziperte. Oni davlejo sam viziperte, a mi moramo nabaviti se drugo, kak meštre tak i peneze. Očem reči, moramo nejpredi poprajti ili pak naprajti hiže onima šteri so bili na drugoj strani, onkraj nišana, a unda ovima našima ak ostanejo penezi. Za popravljanje naših hiži tre celi kup paperov, a za Pupijove je dosti kaj on (Pupi) z prstom pokaže štere hiže tre poprajti. Jako sam najgerek kak bode Brankec se ono napravil kaj je obečal i kak bode rezmonteral Pupijovo ručno Brenzo?
Kaj bodo naporajli od čakoskoga glavnoga trga
Došel je na red, pak, čakoski glavni trg kaj ga zlišpajo, kaj ga zbegacajo kaj bode zgledal kak to dragi Božek zapoveda i kak se to šika glavnomo međimorskomo grado i Grado Zrinskih. Natječaj je več zdavnja bil vuni. A si arhitekti i prostornjaki, šteri do sebe bar malo držijo, so rekli i ne sam rekli nek i nacrtali kak bi šteli kaj bi te novi trg zgledal, a kaj bi se Čakovčanci i Čakovčanke štimali žnjim. Morem vam reči da se tu more videti hajdi toga lepoga kaj bi se i Zrinski z tem štimali, ali se još, bar za ve, ne zna kaj bodo gracki oci rekli, očem reči, šteroga si bodo projektlina zebrali. Još se točno niti ne zna kaj bode se na tomo malomo čakoskomo trgo, a kaj pak ne bode? Kuliko se vidi krčmi ga več ne bode, ali to je ne nikaj strašnoga jerbo so krčme seposot okoli tak da ne bode tre iti jako dauko ak bode čovek žejen. Ali ak bode lačen to je več drugi par rokava i to bode si čovek moral poiskat kak i ve. Ne razmem one „stručnjake“ šteri bi znova metali na trg nekše bazene, vodoskoke ili pak zdence, a ne tak zdavnja smo zametali velikoga bazena na malomo glavnomo trgo jerbo so se v jemo kopali sam pesi i listje z parka. Još sam najgerek kak bode se naš novi-stari trg zval jerbo bi bila skradja vura kaj bi Nikola Zrinski Čakoski dobil i svojega trga vu svojemo grado za šteroga je tak čuda sega napravil. No, nišči je, bar za ve, ne rekel da Zrinski ne bode dobil, posle grada, i svojega trga.
Bili so spominki kak bi Nikola Zrinski Čakoski, posle biste vu svojoj čakoskoj knjižnici, dobil i svojega spomenika, i to na konjo, na svojemo glavnomo trgo vu svojemo (glavnomo međimorskomo) grado. Ak več očemo zbegecati trga unda bi bil red i da vrnemo duga Nikoli Zrinskomo i damo mo se ono kaj smo mo dužni i na kaj je čakal duže od tristopedeset let. Ne trebamo se nikaj fkrej vleči, Zrinski si je to zaslužil. Stranjski šteri dohajajo v Čakovec – Grad Zrinskih nejpredi spituvlejo kaj mi imamo od Zrinskih, a na se zadje dojde na to da skorom nikaj nemamo, a žnjimi se sam štimamo. A tuliko sega dobroga so nam Zrinski ostavili dok so z Čakovcom i Međimorjom hercuvali sam moramo znati to drugima pokazati. Nemamo se kaj špotariti, moramo se štimati z tem, morami mi poštuvati Zrinske unda bodo si stranjski, mlajši i stareši, ruon tak poštuvali i nas i Zrinske.
