Vu šteromo grmo, itak, se skrivle zajec?
Neje trelo biti preveč spameten kaj bi se znalo da bodo se pojavili veliki problemi okoli naše čakoske bolnice. Najme kaj, još je niti novi ravnatelj Nikola Hren, šteroga je postavil novi “gazda”, a to je država, več smo čuli i zazvedili da to žnjim ne bode nikaj štimalo jerbo je član krive stranke, štera je nejvekša nevola v Lepoj Našoj. Več se je na pre znalo da bode hajdi doktorov zmenil, očem reči, na sako mesto ravnatelja bode postavil svoje ljude. Si znamo da saka nova metla, što god jo kupi (čitaj: postavi) drugač pomeče i saki od nas dok nekam dojde za šefa, direktora ili pak ravnatelja postavlja za šefe svoje ljude, tak je to od postanka sveta, a kuliko vidimo niti denes je ne drugač. A tak bi i vi, a i ja, naprajli dok bi nekam na novo došli. Ne bi se štel mešati je li je trelo nešternoga doktora ili pak šefa zmeniti jerbo ne poznam tak dobro te ljudi da bi mogel reči kak jeden vredi, a drugi pak ne, ali da bodo ruon si ostali to sam se ne nadjal, a niti pak oni. Ne slažem se da je trelo nekoga zmeniti sam zbog radi toga kaj je vu krivoj stranki ili pak partiji več bi trelo postavljati, ne sam šefe nek i druge doktore, na one posle de se nejbole razmijo. Znate kaj, lefko se špotariti z doktorima dok jiv ne nucaš, ali dok prvič poranjkaš na ambulanto doktora zbog radi toga kaj te nekaj gvinta, cuka i pak ti z čista mira furt nekaj kroli vu želoco unda je to čistam nekaj drugo. Navijam za to kaj novi ravnatelj postavi za šefe one nejbolše kaj ne bodo morali dugo biti na bolovanjo jerbo dok oni ne delajo nema što pomoči nama betežnikima. Prosil bi doktore nek ne pozabijo na Hipokratovo zakletvo i nek se po njoj ravnajo jerbo so ne išli v školo za doktore zato kaj bodo na bolovanjo. Saki si treba malo nekaj zamagaditi i se bode pomalem došlo na svoje, a ne delati po onoj staroj partiskoj: dej Božek, ali dej odma ili pak ak je ne po mojemo unda ja tu ne igram. Kam bi došel naš Luka Modrič da ne bi mel strpleja z svojim ravnateljom (čitaj: trenerom), očem reči, šefom Anđelotijom.
Kaj so iskale Mrak Taritaš i Dalija Oreškovič prinas v Čakovco?
Ne znati kaj so v minulo soboto iskale v Čakovco sabornice Anka Mrak Taritaš i Dalija Oreškovič? Što jiv je pozval k nam v Međimorje, v Čakovec? Najbrž on šteri jiv je pozval zna zakaj je to napravil i kaj se nadja da bi one mogle naprajti nam i našoj županiji štera je lokomotiva gospodarskoga napretka v Lepoj Našoj. Pripoveda se da so došle spasiti našo bolnico kaj se nazaj vrne nam Međimorcaj v roke i kaj jo zemejo nazaj od “novoga gazde”, a to je ministarstvo zdravstva, očem reči, naša država. Tu ruon nikaj ne razmem, pak kak bode Anka Mrak Taritaš spasila zdravstvo i bolnico pak je ona arhitektica. Zmislimo se kak je odišla z struke v politiko i dendenes je v politiki. Negda je bil ministrica graditeljstva i prostornoga uređenja i zahuzala je dok je obnavljala Gunjo. Pripovedalo se da je v Gunjo postavljala zlatne pipe v Kupaonice kak Milči Bandičov vu Zagrebo. Mortik so ne bile zlatne, ali so tuliko koštale.
Ruon tak niti se Dalija Orešković nikaj ne razme vu bolnice i zdravstvo jerbo je ona fiškal i bavila se fiškalijom tak dugo dok se joj fiškalija ne zamerila pak je ostajla moža Frana Letico, zela deco i odišla v politiko. Kaj tu moremo reči, nejbole se živi od kruha bez motike, a to je prinas politika. Najgerek sam, jako sam najgerek kakšo so itak dijagnozo dale Anka i Dalija za našo bolnico? Nekaj se je moralo pripetiti da je odma osem doktorov kirurgov odišlo na bolovanje. Moramo meti furt na pameti da so naše nejvekše bogatsvo ljudi, Međimorci, kak težaki tak i doktori jerbo kaj nam znači bolnica, kaj nam značijo hiže, zgrade, štere smo si sami naprajli ak nemamo ljude, doktore, šteri nas bodo vračili. Kaj nam znači Međimorje naše malo, nejlepši falačec zemle med dvedmi vodami na ovomo sveto ak se bodemo zdošli mi Međimorci šteri to hasnuje i održavlemo? Kaj reči, on šteri ne mora ve zbetežati nek počaka dok se doktori vrnejo na posel i dok se zazvedi što bode gazda, što bode postavljal ravnatelje, a što pak šefe. A, na se zadje i ono nejglavneše: što bode lečil nas betežnike?
Pak smo trn v peti našim sosedima
Naši sosedi Janezi so se počeli nazaj štimati z svojom Melanijom, štera je žena novoga precednika Amerike Donalda Trampa, kak je to bilo i zadji pot dok je Tramp prvič bil precednik Amerike. Mi si tu nikaj nebremo pomoči jerbo si je Tramp nagledal Melanijo i za njo je prisegel pred Božekom i ljudima i to čuda predi nek je postal precednik. No i mi Hrvati imamo konja za trko z našim sosedima, a to jiv bole boli i čuda je vekša bol zbog radi toga nek veselje kaj je jiva Melanija prva gospa Amerike. O čemo se dela, a o čemo drugomo nek o skijanjo. Najme kaj, mi v Lepoj Našoj nemamo niti dosti snega, a ne kaj bi meli skijališta de bi trenerali naši skijaši i skijašice i tak se prepravljali za nastupe vu Sveckomo skijaškomo kupo. Početkom ovoga 2025. leta so se skijašice spuščale po slovenskomo snego v Kranjskoj Gori. To je skijalište z šterim se naši sosedi Janezi nejbole štimajo posle skakaonice v Planici. V Kranjsko goro so došli si nejbolši skijaši na sveto, a i Janezi so dopelali se svoje puce štere se znajo skijati. Mi z Lepe Naše smo došli z našom jenom jedinom skijašicom, Zrinkom Ljutič, jerbo nam je druga nejbolša skijašica Leona Popovič još na bolovanjo posle operacije kolena. Tomo se je ne nišči nadjal ak ne računamo Zrinko Ljutič, jenoga japo Amira i celo familijo Ljutič da bi Zrinka mogla biti pobjednica slaloma v Kranjskoj gori. I to se je ruon i pripetilo: si so došli z nejbolšim skijašicama, a prva i nejbolša je bila naša Zrinka. Morem vam reči da je v publiki bilo hajdi ljudi z Lepe Naše jerbo so se posle Zrinkine pobjede vidle sam zastave Lepe Naše. Još nekaj, Makar je bil red kaj domačini, i naši sosedi Janezi, pozdravili pobjednico Kranjske gore, ali slovenske zastave so se ne vidle nek so bile na pol koplja. Neje niti Janezima lefko, nemamo svoje skijalište za treninga i dojdemo z jenom skijašicom i nejbolši smo.
