Kak nam je, tak nam je
Morete si pregruntati dokod je to došlo da me je teca Franca pitala kaj je to nacija? Bil sam srečen kak črv v jabuki kaj me je ne nekaj težešega pitala pak sam joj lepo pojasnil da smo ona i ja akupa z sima vama v Lepoj Našoj nacija, oliti narod. Ve se vi najbrž pitate kak je teci Franci nacija na pamet pala? To je i meni mam bilo čudno, ali mi je rekla kak je gledala na televiziji Zokija Šprajca i jegovo “Stanje nacije”. Najme kaj, teca je se dobro razmela kaj joj je Zoki štek reči sam je ne znala kaj je to nacija. Morete si misliti kak ljudi morejo mirno spati dok jim Zoki Šprajc, djevojački Jovanovič, pojasni kaj muoči nacijo, očem reči, narod v Lepoj Našoj, jerbo čim Zoki ne dojde na rendes v dogovorjeno vreme mam su ljudi v paniki, očem reči, v streso. Znate kak je to, pak Zoki nejbole od sih zna kak je nam v Lepoj Našoj i što je tomo kriv kaj nam rekel zaslužan. Čuda se toga pripeti kaj nam običnaj smrtnikaj pobegne kaj ne ftegnemo v pamet zeti, ali zato je Zoki tu kaj nam se to donese na svetlo dneva. Jempot nam on pripoveda kak Zoki Šprajc, a drugi pot kak Zoki Jovanovič, kak mo da paše, očem reči, kakše so se nevole šteri tjeden pripetile. Morem vam reči da me je teca nikaj ne razmela sam je mahnula z rokom i odišla je vu svojo hižo, a tam si more gruntati kaj oče i ne mora nikomo nikaj reči jerbo jo nišči nikaj ne pita. I kaj je nejglavneše nema se z kim posvaditi.
Levo, desno nigdi pravice
Kakše so sam svaje bile med našaj političaraj minuli tjeden dok je v našemo Dubrovniko bila velika sesija sakefele političarov. Morete si pregruntati o čemo so se spominali političari z Jugoistočne Evrope ak je došel i precednik Ukrajine Volodimir Zelenski. Čistam je nekak normalno dok Rusija ratuvle v Ukrajini unda se navek tam de je precednik Ukrajine spomina o tomo kak bi več bila skradja vura kaj bi rat završil i kak bi se mir vrnul kak v Ukrajino tak i v Evropo, a i bilo bi čistam vredo da se prestane ratuvati po celomo sveto. Se je to v Dubrovniko bilo vredo, ali naši političari z leve strane so zamerili našemo premijero Drašeko Plenkovičo kaj je v Dubrovnik na sesijo pozval srpskoga precednika, kaj nem rekel, četnika, Aleksandra Vučiča, a ne je pozval našega žir heza z Pantovčaka druga Zokija Milanoviča. Ne bi vam tu znal reči što ima praf i je li je pravica na levoj ili pak na drugoj strani, ali nikak nebrem razmeti kak se je za reč javila Sandra Benčič z partije štera se “More”, se zna, a nikaj ne dela (kaj se nejbole vidi v “belom” Zagreb grado) kaj bode zbajala i na red pobrala premijera Plenkoviča kak je napravil dva velike grehe: prvi je greh kaj je ne pozval našega precednika Zokija, a drugi, i to vekši, je greh kaj je pozval srpskoga precednika Vučiča, šteri je bil četnik za vreme našega Domovinskoga rata i ratuval je protiv Lepe Naše. Ne bi se štel mešati vu to kuliko je ona mela prav ili pak ne, ali kak more ona nekoga na red pobirati, a si znuomo, verjem da smo ne pozabili jerbo to nebremo pozabiti, kak je Sandra lani v novembro na Den sječanja na žrtve Vukovara i Škabrnje hitala venca v Dunav za poginule četnike, očem reči, poginule agresore vu Vukovaro. Najte me krivo razmeti, ali mi to nikak nejde v glavo kak smo jempot na jenoj strani, a drugoč na drugoj kak da ne znamo de je pravica, očem reči, de je istina?
Naši Međimorski plinači so pobedili na “vročemo tereno” v Zagrebo
Nejpredi se je nišči ne nadjal kaj bi naši Međimorski plinači mogli pobediti Zagrebečke plinače i to na jivomo igrališčo v Zagrebo. Kaj reči, pripetilo se ruon ono kaj se je nišči ne nadjal: Međimorci so pobedili skorom kak Bayern Dinamovce i to dvapot. Da so Dinamovci meli priliko znova igrati v Minheno ne bi brzčas drugoč fasovali devet komadov, ali kuliko znuomo Tomaševič i jegovi plinači so i drugoč zgubili i odišli so po riti k meši. Nemam tuliko placa kaj bi napisal kakše je se hujncvutarije i norije delal Tomek Tomaševičov šteri si je pregruntal da on se more i da mo je se dopuščeno, ali na se zadje je ipak moral hititi puške v kuruzo tak da je vreme pokazalo da mo je pol Zagrepčancov (i to ona vekša polovica) obrnulo hrpta i da mo ne verje pak so se priklonili našim plinačima. Neje niti čudno jerbo je Tomica naklal cele kupe smetja po celomo Zagrebo i ve čim dojdete v Sesvete duha po smrdljivomo smetjo vam se rivle vu nos kak se nam je negda rivala duha iz zagrebečke klaonice mesne fabrike “Sljeme”, štera je bila vu Sesvetama. Kuliko sam mel za čuti od profesora Baltazara purgerski gracki načelnik Tomek je kanil kuriti smetje i tak greti Zagrepčance, ali je nigdi ne mogel nabaviti tak velike peči jerbo to več nišči, pod milim Božekom, ne dela na kugli zemaljskoj. Kuliko vidimo ovi kaj se “Morejo” so malo zaostali za napretkom tehnologije.
Čuda je leži drugoga kritizerati, probajte se zmisliti kuliko so drevja i kameja nahitali na negdašjega gradonačelnika Milana Bandiča. Najgerek sam, jako sam najgerek je li se bodo zagrebečki gracki oci navčili kaj od naši Međimorski plinači? Nekaj mi se zdi da je brzčas več prekesno jerbo drugo leto v majušo bodo zgubili izbore: stiha so došli na vlast, a još bole stiha bodo odišli v ropotarnico povjesti, a Živi zid jim bode špalera držal na sprevodo. Kak veli teca Franca, voda jiv je donesla, a smetje jiv bode odneslo. Bandič je bil onakši kakši je bil, ali dvajsti let je držal v rokami cugle vlasti i hercuval v belom Zagreb grado.
Kaj so se direktori zdošli?
Mortik nemam praf, ali si vejč hajdi dugo gruntam o tomo kak so se prinas v Međimorjo zdošli direktori, očem reči, ravnateli? Najbrž je ne tak, ali čim dojdejo natječaji na svetlo dneva dojde i hajdi moljbi, ali hajdi oni šteri dajo moljbe imajo nekšo falingo ili pak jim nekaj fali kak v imovinski kartici Sandre Benčič. Najme kaj, več hajdi dugo zbiramo direktora komunalnoga poduzeča Čakom v Čakovco i nikak da zberemo nejbolšega, a cvetje, trava, smetje i grobiče čakajo što bode, posle Ivice, držal cugle komunalne vlasti v Čakovco i što bode hercuval z grobičom? Sa je sreča kaj Ivica ima čas i kaj jega mesto penzionera čaka jerbo da je ne tak unda bi novi komunalni direktor došel na mrzlo foteljo, a ve mo jo Ivek greje. Istina Božek da to nekaj košta, ali denes je več ne nikaj zabadav, a čuda je bole da novi direktor dojde v toplo foteljo nek da se odma prvi den prehladi i odide na bolovanje.
