Rokometaši dopelali i Thompsona
Nekaj vejč od šest let je minulo otkak so naši labodoritaši, naši Vatreni, napunili zagrebečki Jelačič plac dok so došli z Rusije z srebrnom želencijom posle kak so postali viceprvaki sveta vu labodoritanjo. Verjem da se zmislite kak je celi Zagreb, očem reči, cela Lepa Naša bila na vulicama Zagreba, kak so Luka Modrič i jegovi pajdaši ujedinili nas Hrvate i celo Lepo Našo. Zmislite se kak je cela Lepa Naša dihala skupa z našim labodoritašima, skupa s Zlatkijom Daličom, kak smo uživali posle sake pobjede v Rusiji, a bili tožni i pili na srce dok so nas vu finalo pobedili Francozi.
Kaj so napravili labodoritaši 2018. leta to isto so nam naprajli i naši rokometaši ovo leto, očem reči, zimo. Neje bilo tak zdavnja da smo ispali na Evropskomo prvenstvo v prvomo krugo, a ve pred tjeden dni smo odišli do kraja i osvojili srebrno medaljo zlatnoga sjaja i to na Sveckomo prvenstvo. Kaj vam to govori? Mi moremo se sam dok očemo. Našim rokometašima smo dopelali stranjskoga trenera, Dagura Sigursona z Islanda, kaj napravi reda vu našemo rokometo, med našim rokometašima. Makar je ne tak zgledalo dok je došel, ali je to tak dobro posložil kaj so i jega iznenadili. I jemo so pobegle suze dok smo pobedili jegovoga Islanda. Posle smo dimo poslalil naše prve sosede Janeze, a unda i druge sosede Mađare tak da smo vu polufinalo došli na Francoze šteri so nam, več na leta, delali probleme vu rokometaškim dvoranama. Morem vam reči da je tua Francuska došla na vrh glave našim dečkima i te Francozov jim je bil pun kufer, pak so protiv jiv igrali kak nigdar do ve i prek jiv odišli vu finale, a Francozima je ostala borba za brončano želencijo.
Kak zgledi preveč smo se potrošili protiv Francozov tak da smo vu finalo ne meli šanse. Moramo priznati da so Danci bili bolši i da so zaslužili zlatno želencijo. Makar nebrem reči, naši dečki so dali se od sebe, ali dale od srebra je ne išlo. Kak sam več rekel, dečki so dali se od sebe i zato je naša srebrna želencija zlatnoga sjaja.
Domagoj Duvnjak je igral po jeni nogi
Svecko rokometno prvenstvo se je igralo prinas v Lepoj Našoj, v Danskoj i Norveškoj. Mi smo nejbole pratili kaj se odigravle v zagrebečkoj Areni jerbo so tam igrali naši dečki, naši Kockasti. Se je dobro genulo, pobedili smo Bahrein, a unda i Argentino, ali smo se poškliznoli na Egipto. Morete si pregruntati kak je to strašno bilo da je moja žena kričala na televizor, a teca Franca je molila krunico. Kak bilo da bilo v drugi krug smo prenesli sam dva bode, ali smo ostali bez sredjih igračov i to bez kapetana Duvnjaka i Luke Cindriča. Trener Sigurson je pozval Karačiča, ali niti on je ne bil v nejbolši formi tak da je silom prilika na sredjemo igral naš glavni golgeter Ivek Martinovičov. Kak zgledi se je došlo na svoje dok smo došli v drugi krug, pobeđivali smo po redo, a naši golmani Dominik Kuzmanović i Ivan Pešić so obranili se kaj je išlo v gol i još vejč od toga. To nam je pomoglo kaj smo uspeli dojti do finala, a pomogla je i publika štera je bila na sakoj utakmici sedmi igrač.
Ve se je vidlo da i rokometaši morejo napuniti zagrebečko Areno i to dva tjedne sploh, a ne sam Lepa Brena i jena sneha Prijovička.
Dočakali smo jiv kak heroje
Dok so se naši rokometaši vrnuli z Norveške z srebrnim želencijama dočakal jiv je pun Jelačič plac. Bilo je tu cirka pedeset – šezdeset jezer ljudi i to od nejmlajših do nejstareših, ali ak ste dobro gledali unda ste vidli da ga bilo nejveč mladih. Dok so naši rokometaši putuvali prema Zagrebo pripovedalo se kak bode na Jelačič placo popeval i naš nejglasneši pevač Marko Perkovič Thompson jerbo so si jega zebrali naši srebrni, a jegova pesma „Ako ne znaš šta je bilo“ jim je bila kak himna za vreme celoga prvenstva. No, stiha se šepetujilo je li bode Thompson prvazaprav došel, je li ga bodo zagrebečki gracki oci pustili jerbo znamo kak je Thompson ne baš dobrodošel v beli Zagreb grad. Na se zadje je ipak Thompson dobil grackoga viziperta (čitaj: dozvolo) i popeval je z dečkima, a žnjimi so popevali i si šteri so došli, a mladi so bili nejglasneši.
Kaj reči, špot je i sramota kaj se moramo boriti kaj nam bode Hrvat Thompson popeval v Zagrebo glavnomo grado Lepe Naše, a Lepa Brena, jena sneha i kaj ne bodem dale nabrajal, morejo dojti da očejo.
Si šteri so došli pozdraviti rokometaše, zafalili so jim za se dneve vu šterima so uživali v rokometo, a posebno so jim zafalili: – Dragi rokometaši, neste nam donesli zlato v Zagreb, ali ste naprajli čuda vejč, dopelali ste nam Thompsona na Jelačič plac…
Stigla je i zahvala našim rokometašima od tvornice lekova Belupo z Koprivnice: – Za vreme Sveckoga prvenstva prodali smo NORMABEL prahe za smirenje vejč nek inače prodamo celo leto. Fala vam!
Ne hodam več v petek v štacun
Najgerek sam, jako sam najgerek je li bode kaj od toga kaj mi ne hodamo v petek po štacunima (čitaj: bojkota), očem reči, je li bodo štacunari zmenšali cene? A to bi morali naprajti čuda fletneše nek so jiv pomalem, mic po mic, zdiguvali. Morem vam reči da so cene besramno zrasle i da smo mi potrošači pre dugo to magadili, kupuvali smo ono kaj smo nucali i to tuliko sega kuliko smo penez meli. Nekaj si gruntam da se bode to kaj mi ne hodamo v petek v štacune štacunarima fest poznalo jerbo nam je blizo i Mađarska, a i Dežela, a tam je, kak velijo oni šteri hodajo, se faleše i to ne malo. Poglednite, prosim vas lepo, ak odidemo v Deželo unda si bodemo kupili i se drugo kaj nam treba, očem reči, celoga fasonga tak da ne bodemo morali prinas nikaj drugo kupuvati nek sam kruha i mleko, a od toga štacunari ne bodo mogli preživeti. To je kaj se štacunarov dotikavle, ali od čega bode živela naša država ak bodemo mi nosili penez prek meje k sosedima? Moral bode premjer nekaj drugo zmisliti ak oče kaj bodemo si meli od čega živeti. Nek se ve pokaže kuliko zna on, a kuliko pak jegovi ministri!
