Dugo, kaj dugo, jako dugo, a mortik još i duže smo iskali nekaj ili pak nekoga što bode stal na rep korona viroso, oliti tomo COVIDO, kak se to po štacunski ili pak gracki veli. Naši akademiki, farmaceuti, doktori, koršmiti i si drugi šteri imajo nekaj malo vejč soli v glavi so štrumfali duže od leto dni, kaj leto dni, bormeš je več minulo i leto i pol kak se te svecki beteg, šteri je lonceka ftrgel vu Vuhano v Kini, dosmickal k nam, nejpredi v Evropo, a mam počasi i v Lejpo našo. Dosti dugo so fabrike lekecov i cjepiva šlajdrale kak bi li zmislile nekaj s čim ili kim bi mi Davidi mogli iti u boj, u boj protiv nevole (čitaj: Golijata), očem reči, vuteske štero je nišči ne videl, a sfondala je po celomo sveto vejč od milijon ljudi. Dugo se je nikaj hasnovitoga ne moglo najti i unda se je, kak strela z vedroga neba, pojavilo labodoritanje i mam prvi tjeden otkak se je hapilo Evropsko labodoritaško prvenstvo je pol betežnikov ozdravilo, a druga polovica več neče priznati da je betežna, a respiratori v bolnicaj hmajikuju. Što bi se itak nadjal da se tak nekaj opče more pripetiti? A pripetilo se je! Prosim vas lepo de ste zadjih dva tjedne čuli po celoj Evropi ili pak prinas v Lepoj našoj, na našemo falačko zemle med dvemi vodami da se nešči spomina o koroni, o distanci, o razmako, a jedino kaj je od korone i sih meri ostalo so maske. Istina Božek, jeni jiv nosijo v zadjemo žepo, drugi v taškici, a oni tretji, nejbole preštimani oni jiv imajo na bradi. Kak bilo da bilo, šteli to mi priznati ili ne, ali čim se je pojavila laboda i labodoritanje kak druga (druga, to je ona mam posle prve) nejglavneša stvar na sveto korona je pala na drugo mesto i brzčas ne bode opstala.
Naši labodoritaši so hapili igrati v Engleskoj i to v Londono i to ne onak kak naši labodoritaši znajo i kak smo mi kibici navčeni nek so igrali kak da so došli z samoizolacije. Englezi pak so bili fletneši i spretneši pak so naši labodotitaši odišli po riti k meši, a Englezi na prvo mesto. Nekaj je bole bilo v Škockoj de so nas dočakali nejpredi Čehi, štere smo ne pobedili, ali smo niti ne zgubili tak da smo se mogli nadjati kaj pemo dale se do prekfčera dok smo igrali z Škotima na jivomo igrališčo. Kaj bom vam rekel, naši dečki so pomalem došli k sebi i Škote smo ostajli doma na popravnom, a mi pak idemo dale. Prosim vas lepo, što se od nas zmisli da so nam naši labodoritaši ne trenerali živce i da smo se ne sekerali dok so oni igrali. Pred tri leti smo bili srebrni v Rusiji, v Moskvi, ali i tam so nas sekerali prek sake mere makar je na krajo se dobro zišlo
A kak bode ve to na ovomo Evropskomo prvenstvo niti dragi Bože k ne zna, ne ruon točno. Znuomo da ve nejpredi igramo z Španjolcima. Štere smo šteli zbeči, ali nam se je ne trefilo. No, ali ak očemo biti prvaki Evrope, a očemo, unda moramo pobediti se po redo kak one šteri nam pašejo tak i one šteri nam ne pašejo. Ak mene pitate ja bi prosil nešterno drugo reprezentacijo nek nam pobedijo Francoze jerbo prek jiv smo još nigdar ne prešli. No, mortik pak je ovo antikorona prvenstvo prava prilika kaj se jempot obračunamo i z Francozima kaj nam ne bodo duže rakrana.
Morem vam reči da se predi utakmice z Škotima neje čulo nikaj lepoga o našim labodoritašima. Znate več i sami da mi prinas v Lepoj našoj imamo milijon izbornikov, nejmeje, i saki od nas zna čuda vejč od Daliča i jegovih pomočnikov. Ali posle kak smo „potopili“ Škote na jivomo „bazeno“ unda so oni nejglasneši bili jeden den stiha, ali čim smo dobili Španjolce za protivnike ve so pak te isti glasni, kaj nem rekel srečni kaj smo dobili nekoga šteri nas bode nakefal i poslal dimo. Ak mene pitate to so oni jalnoši, kaj jiv ne bom nekak grše nazval, šteri so isključili razglasa v Zagrebo pred tri leti dok so naši Vatreni došli kak srebrni z Moskve. Nebrem razmeti te naše ljude šteri nemajo radi labodoritanje, a ono nas je rešilo korone.
Ak so naši dečki posle Škocke rekli da so ve došli k sebi i da ve znajo da morejo i dale tak dobro igrati i da morejo bilo koga pobediti unda jim moramo veruvati. Pak nekaj si gruntam, pak so si dečki zaslužili kaj jim damo još jeno šanso. Si znamo da je labodoritaška laboda okrogla i da ga več ne države čiji dečki ne znajo labodo ritati. I još nekaj tre znati, ne pobedi v labodoritanjo navek bolši! Po novim pravilima, a tak velijo i ovi vu VAR hiži, pobednik je on šteri vejč goli zabije. Tak da ve naši dečki znajo kaj jim je za delati, ne morajo preveč dobro igrati sam nek probajo zabiti vejč goli od protivnika. Verjem da je to ne preveč teško sam ak se protivnik z tem slaže.
Naš izbornik Zlatko Dalič nam je otkril da je zazvedil kaj mora naprajti ak očemo i dale pobeđuvati, očem reči, ak očemo oditi do kraja. Mora v igro uključiti i dvanajstoga igrača. A ve znamo da morejo i naši dvanajsti igrači dojti na naše utakmice jerbo do ve so mogli sam domaći. Verjem da našim igračima nejbole fali, kak navijačica, bivša precednica Kolinda Grabar Kitarovič. Verjem da smo ne zabili kak je ona pratila naše labodoritaše po Rusiji i pomogla jim kaj so se, na se zadje, dimo vrnoli z srebrnom želencijom. Nikaj mi spametnoga ve ne dohaja na pamet što bi mogel biti takši dvanajsti igrač kak je bila Kolinda i najbrž bi unda pak mi, očem reči, naši labodoritaši došli do nekše, a mortik i zlatne evropske želencije?
Javila se naša međimorska doktorica na privremenomo poslo i na dobromo glaso v Zagrebo da bodo naši labodoritaši, ak dojdo dimo s želencijom, meli pre joj v bolnici zabadav pregleda od sih betegov šteri so jiv mogli zahačiti dok so se klatarili od igrališča do igrališča po celoj Evropi. Lepo je to kaj i naši doktori, očem reči, doktorice poštuvlejo naše labodoritaše. Saki navijač je važen!
