Neso si građani jednaki ?
Ne znati zakaj so si građani Čakovca ne jednaki? Bar ne za čakosko gradonačelnico Ljerko Cividini! Najme kaj, pravi građani Čakovca so sam obični ljudi, šteri imajo svoje interese, a na drugoj strani so privatni poduzetnici, a oni pak imajo svoje i to privatne interese. No, tak je ne po celomo Čakovco jerbo je čistam drugač v centro Čakovca, a čim idete malo vum, tam se to se meja. Zakaj je to tak? Bodem vam povedal? Došlo je do svaje za falaček zemle na glavnomo čakoskomo trgo, Trgo Republike, šteroga so čakoski gracki oci kanili zrihtati i zlišpati, ali se je tu pobunila robna hiža Međimurka, očem reči, jeni gazda, štera na tomo trgo posluje več od minuloga stoletja i to več 45 let. Nekaj zemle okoli hiže je od robne hiže i ve se privatni poduzetnici bunijo i očejo svoje dok je na drugoj strani čakoska gradonačelnica štera se bori za građane, kak smo to mogli v novinaj i na portalaj prečitati ili pak na radio čuti, a protiv privatnih interesa. Najte me krivo razmeti, ali meni vam tu nikaj ne jasno: pak kaj so privatni poduzetnici ne građani Čakovca? Dok plačajo komunalno naknado, vodno naknado, spomeničko rento, sakefele poreze, parkinga, unda so građani, a dok nekaj svojega očejo unda so ne građani nek privatni poduzetniki z svojimi interesi. Nišči ne poveda nikaj o tomo kak so čakoski gracki oci natirali građane, kupce privatnih poduzetnikov, vum z centra Čakovca i da je robna hiža navek prazna, a kupci so po trgovačkim centrima na severo, jugo, istoko i zapado. Robna hiža je prazna, a čeki gracke uprave redovito dohajajo. I još nekaj, ak nešči oče dojti kupuvat v robno hižo mora Grado Čakovco platiti parkinga pak i prek toga građani, kupci robne hiže Međimorka, punijo gracko kaso, tak da ne vidim zakaj so privatni poduzetnici z svojim interesima ne građani Čakovca, a punijo gracko kaso dok so si drugi građani otkod god oni došli.
Na istoko je čistam drugač
Na istoko je čistam drugač. Tam je hatar čakoske vojarne, jeden falat i to malo vekši, prodani privatnim poduzetnicima šteri so ruon tak meli svoje privatne interese i tam je zazidani novi trgovački centar. Da bi privatni vlasniki, privatni investitori z privatnim interesima mogli zazidati ono kaj so kanili, čakoski gracki oci so, prek grackih večnikov, spremenili urbanističkoga plana jerbo je nigdar v čakoskoj vojarni (a niti pak v kasarni) ne bilo predviđeno kaj bi tam bil trgovački centar. I kaj bodem vam rekel i to je napravljeno jerbo je to bilo v intereso privatnika. Kak je plan spremejeni, tak je zrasel i novi trgovački center. Ali so z tem trgovačkim centrom ne bili zadovoljni niti privatni poduzetnici z svojim interesima, a niti pak građani šteri so dohajali kupuvat v te novi trgovački centar. Najme kaj, bilo je teško dojti do toga novoga privatnoga trgovačkoga centra, a isto tak je bilo teško oditi dimo. I kaj je unda napravljeno? Znova se je zmenil urbanistički plan i napravljen je novi rotor tak kaj bodo građani leži dohajali i odhajali z toga trgovačkoga centra. Rotor je napravljeni jer so to iskali privatni poduzetniki, privatni investitori z privatnim interesima i to je se bilo vredo jerbo je to na istoko Čakovca, a se je čistam drugač ak privatniki nekaj očejo i imajo svoje interese na glavnomo čakoskomo trgo. Ne moram vam reči kak so novoga rotora platili građani Čakovca i to z gracke kase kak bodo i privatno zemljo na glavnomo čakoskomo trgo. Brzčas so i privatni poduzetnici privatni investitori građani Čakovca bar tak dugo dok punijo gracko kaso. Se je v Čakovco privatno i privatniki punijo gracko kaso pak bi to čakoski gracki oci trebali znati. A dok se penezi trošijo, unda gracki oci to delijo onak kak si oni pregruntajo. Kuliko sam mel priliko prečitati, si oni šteri kanijo biti čakoski gradonačelniki obečuvlejo da se bode Čakovec jednako razvijal po celomo svojemo hataro, a i ja bi bil za to kaj bodo jendaki ovi na severo, jugo, istoko i zapado, a i ovi v centro Čakovca.
Neso niti ogjogasci si jednaki?
Sako naše međimorsko selo, sako malo vekše mesto, ima svoje ogjogasce i to je tak od negda. Nebremo reči da je to tak odnavek jerbo smo ogjogasce ne nucali dok je ogej ne zmišljen. Ljudi kakši so več bili so nejpredi zafremali društva ogjogascov štera so pomagala pogasiti ogja dok je negdi prek reda gorelo i dok se nešči, nejvečpot deca, igral z šibicami. Znate kak več dugo mi Međimorci imamo ogjogasce da nejmlajša društva več imajo cirka sto let. A nešterna i vejč. Štel sam vam reči kak so ogjogasci Doljnjega Vidovca ovo leto preslavili 140 let otkak so zafremali svoje prvo društvo ogjogascov. Ne moram vam reči, jerbo si znajo kak se je vu tem društvima ogjogascov delalo dragovoljno i volonterski kaj ne bomo rekli zabadav. Vidovčani so ovo leto dobili od međimorskoga župana Matije Posavca poveljo za 140-letno aktivnost kaj jim tre čestitati i tre jiv pofaliti. Si šteri delajo i volonterajo znajo kak je teško držati na kupo jeno društvo leto-dve, a kuliko je muke trelo kaj društvo preževi 140 let. No, štel sam vam reči kak so minuli tjeden priločki ogjogasci preslavili 150-letnico svojega djelovanja i nikak mi nejde v glavo kak je to našemo župano, šteri se jako dobro pamti i to tak kaj se si čudijo kak mo to se zide v glavo, pobeglo kaj jim je ne dal poveljo. A tu mo je mogel pomoči i jegov precednik Županiske skupštine Dragec Glavinov, kak Priločanci velijo, stareši, šteri je rođeni Priločanec i još navek je građanin Priloka. Verjem da bode župan to kaj mo je tua obljetnica pobegla ispravil prvom prilikom, a Drageca bode zašpotal jerbo je Dragec tu kaj župana zmisli ak je, nedaj Božek, nekaj pozabil kak se je to ve pripetilo.
Briga za biračko telo
Od prvoga majoša pak do denes saki den se negdi kuha bograč, bažolj ili pak gulaš, pečejo se ribice, ćevapi, klobasi, kotleti…, gemištece, pivike i žganico niti ne moram spominjati, sam kaj nam biračko telo ne bode lačno i ženo, očem reči kaj nam biračko telo ne bode skaleralo. Znate kak je to, ak smo se več kandiderali za nekši posel od opčega interesa, unda se moramo brigati za biračko telo ak očemo kaj nas oni v nedelo prepoznajo dok dojdejo na biračko mesto.
Morem vam reči da so se niti ovo leto, kak veli teca Franca, ne kandiderali nejbolši, unda moramo zbirati med onima šteri nam se nudijo. No, neje to nikaj novoga i zato pamet v glavo, olovko v roke i zebrati nejbolše med onima šteri nam se nudijo. Tak je bilo navek pak niti vezda ne bo kaj nekak ne bo.
