Kaj se kuha v političkomo lonco Lepe naše?
Reka pravice bi več bila odnesla i Zokija Milanoviča, Sandro Benčič, Kato Pejovič, Rado Borič i Peđo Grbina da je ne v aprilo presušila.
Čim so se zdigli pod nebo Lepe naše naši novi Rafaeli mam se je zdigel tlak onim Hrvatekima šteri još dendenes (još navek) živijo v Jugi, našim “jugovičima.”
Milči Pupovac bode nas zastupal, nas, Hrvateke i Lepo našo, v Briselo. Ako ga zberemo. Mi smo na potezo. Jega nam je ponudil na svojemo biračkomo listeko naš župan Matija Posavcov, a ve se čaka na nas biračko telo je li mo bodemo potpisali potnoga naloga? Neje Pupi več vu Vladi i mam se ravna vum z Lepe naše. “Pošteno” je moral oditi vum z Vlade i ve “pošteno” oče iti vum z Lepe naše, ali za to išče i pošteni kupček penez! Zračunal si je čovek kuliko vredi.
Ili bodemo znova poslali Sunčano Glavak štera je v Briselo kak doma. Znova se ravna i naš belički zet Iveka Vilibora Sinčiča? V Briselo ne tre saditi kalampera.
Bosanci, očem reči, Bošnjaki nikak nečejo priznati da v Bosni i Hercegovini živijo i Hercegovci i to ne kak nacionalna manjina neg kak ravnopravni konstitutivni narod skupa z Srbima i Bošnjakima. Nikak nebrejo v nam Hrvatima (čitaj: Hercegovcima) videti svoje sosede i furt nam bajajo kak smo v zadjemo rato bili protiv jiv. Mi smo bili protiv jiv, a oni so bili prinas na našemo hataro kak izbeglice i to ne malo nek prek 600 jezer. Več zdavnja je Tanja Torbarina kak legenda hrvackoga novinarskoga nalivpera napisala: “Več je poginulo bošnjačkih izbeglica od ležečih policajov na hrvackim cestama neg v rato!”
Pak bode zagrebečka Arena puna
Naš pevač z Eurosonga o šteromo se v zadje vreme furt žene spominajo, kak na mlekari tak i na čehari, Marko Purišič oliti Baby Lasanga rasprodal je več tri zagrebečke Arene, a mora još dve ak oče dostiči Aleksandro Prijovičko, sneho Lepe Brene, štera je Areno pet pot napunila. A Marko Perkovič Tompson još navek nebre v Areno niti z kuplenom kartom.
Spominki pred štacunom z pivikaj v rokaj
Zišli so se pred selskim štacunom na pivikaj Tonča, Ivek i Štef drugi den čim je Reka zgubila v Osjeko i tak potepla ovoletošje labodoritaško prvenstvo. Cmizdri pajdaš Tonča, i to mam posle Eurosonga, kak si pederi morejo biti prvi sam jegov Hajduk nebre. Mam ga je, posle druge pivike, zmiril Ivek šteri je rekel kak je on Dinamovec od da se je narodil i kak nema nikaj od toga kaj je Dinamo več dvajsti let furt prvi jerbo on i dale dela za minimalec od 750 ojerov. Priskočil je Štef kaj ga smiri, pak mo je rekel, dok je spraznil drugo flašo: – Probaj si pregruntati kak bi ti bilo da bi delal za minimalac i navijal za Hajduk?
Šteri so to partizani zlatni?
Spomenik partizanima na čakoskomo Kvatričo je tam več duže od pedeset let. Navek je bil črni kak je to od bronce napravil zob vremena. Ve, ne tak zdavnja, jeno jutro minuloga meseca partizani so postali zlatni i to kak bi rekli prek noči. Ne znati što jiv je pozlatil, očem reči, što je naručil kaj bodo ve partizani posle pedeset let zlatni. V črleni knigi piše kak je za vreme Drugoga rata poginulo nekaj vejč od tristo partizanov, a dok so partizani natirali Mađare z Međimorja i prevzeli cugle vlasti vu svoje oslobodilačke roke, za vreme porača je nastradalo nekaj meje od jezero ljudi i to jiv je nejveč nastradalo brez soda i socov. Zato ja pitam šteri so to ve partizani zlatni? Oni do četrdeset pete ili pak oni posle četrdeset pete? I što jiv je dal prefarbati na zlatno? Najte me krivo razmeti, ali da bi se postavil spomenik blaženomo Alojzijo Stepinco trebamo naprajti anketo i pitati ljude je li so oni za to ili pak neso, a dok tre prefarbati partizane na zlatno unda nikoga nikaj ne pitamo i to napravimo prek noči. Nemam ja nikaj protiv partizanov, moj japa i moji strici so bili partizani, ali si dobro znamo da je v Domovinskomo rato 78 naših Međimorcov dalo živote za ovo slobodno, samostalno i neovisno Lepo našo, a niti jede je ne zaslužil kaj bi bil zlatni!?
Čirilica štera govori
Još jeden Marko se je pojavil na povjesno-zabavnomo nebi Lepe naše, za Markija Purišiča i jegovo pesmo Rim tim tagi dim si znajo, a za Markija Stričeviča i jegovo knigo “Tito v Rusiji” čuda meje. Fletno je zišla tua kniga, črez par let bode sto let kak je Tito bil v Rusiji, a još denes se ne zna, bar Markec ne zna, kak je v Rusijo išel Josip Broz, a z Rusije je došel drug Tito. I ne sam to, ne zna se kak se je to pripetilo kak je Josip Broz odišel v Rusijo brez jenoga prsta, a vrnul se je drug Tito z semi prsti? Kaj kaj toga se je pripetilo v Rusiji jerbo je Josip Broz bil jaki i visoki čovek, bil je visoki meter i osemdeset, a vrnul se je mali drug Tito visoki, očem reči, mali jerbo je bil visoki sam 162 centimetre. Otkak se je drug Tito vrnul on se je navek i seposot potpišuval sam kratko kak Tito i to na čirilici, a sima je poznato da je Josip Broz ne pisal čirilico. Kaj reči, kak god gledimo čudna je tua zemla Rusija, tam so se pripetila kajkakša čudesa kaj se dotikavle Josipa Broza i Titija i to se posle kak je tam došel komunizam na svetlo dneva i kak je drug Staljin zel vu svoje roke cugle komunističke vlasti.
Čirilica je presodila i v Beogrado dok so Srbi sima na sveto šteli reči kak je Nikola Tesla jiv i ničiji drugi, a to kaj se je narodil v Lepoj našoj, v Smiljano polek Gospiča, i kaj se je z tem navek štimal to je jim ne važno. Kakši so Srbi več je, na svojo roko, oni so svojega aerodroma v Beogrado nazvali po Nikoli Tesli i tam so mo naprajli velikoga, cirka pet meternoga, spomenika na šteromo so ga potpisali z čirilicom, a sima šteri bar malo poznajo Nikolo Teslo znajo kak je Tesla nigdar ne pisal čirilico i nigdar je ne bil v Beogrado!
