Niti so se svije ne tomo nadjale
Verjem da se je ne nišči tomo nadjal da bodo svije (čitaj: pajceki) meli glavno reč drugo leto dok mi v Lepoj našoj bodemo pak hodali glase davat i to tripot najempot. Očem reči, ovo leto, štero je več na poceko, bodemo morali zasukati rokave i tri pot bodemo morali svojega glasa dati. Morali bodemo zebrati nove EU sabornike i to v šestomo meseco, a ruon tak bodemo znova zbirali precednika Lepe naše i to pred kraj leta. A da bodemo zbirali nove sabornike to niti dragi Božek ne zna jerbo o tomo odlučivlejo saborniki šteri ve hercujejo na Kaptolo. A glase za nove (stare?) sabornike bodemo išli davat dok nas pozovejo. Ve vidite davanje glasov je jako blizo zato je i tak velika svaja okoli pajcekov, ali ne sih nek sam onih betežnih. Teško je tu biti spameten i znati koga je se pokosila tua svinska kuga i kak more biti to da je zbetežalo vejč pajcekov nek smo jiv meli po našim kocima. Ne znati otkod so se zmogli oni pajceki šterih ga ne bilo zapisano v knigi da so se skopecnoli. Kuliko čujemo seposot se pripoveda da se tu ne svadijo sam pajceki nek i politika tu ima svoje prste, a što je vredneši v Slavoniji, je li je to HDZ ili pak Domovinski pokret bodo izbori pokazali, oliti kak smo več rekli nišči se ne tomo nadjal da bodo pajceki, očem reči, svije odlučivale što bode štiri leti sedel vu našemo Saboro ili pak što bode se pet let gavaleril vu Briselo?
Ve znuomo čija je do ve bila Slavonija a drugo leto bodemo zazvedili čija bode dale Slavonija? K leto bodemo zazvedili je li bodo prevagnoli oni šteri krmijo pajceke i svije ili pak oni drugi šteri sejajo repico, sunčanico pšenico i tikve?
Dalmoši ne hranijo pajceke oni se brigajo za ribe
Odnavek je tak bilo da so Slavonci hranili pajceke, a Dalmoši pak ribe, očem reči, Slavonci so se brigali za plodove kocov, a Dalmoši za plodove morja. Denite roko na srce i priznajte kuliko pot ste meli priliko čuti kak so naši turistički težaki prepovedali kak mi v Lepoj našoj moramo povezati Dalmacijo i furešte, šteri sako leto dohajajo v Dalmacijo na našo debelo vodo i “zeleno hrvacko” (čitaj: Slavonijo) de rastejo si oni oblizeki štere saki den imajo na stol naši turisti. Čuda se je pripovedalo, ali nigdar se je još ne pripetilo kaj bi i prešli z reči na djela. Naši “zeleni” imajo svoje brige, a Dalmoši svoje. Dok so oštri spominki z Dalmošima o tomo što kaj dela, komo kaj zraste i što od čega živi unda se je hajdi pot pripetilo kak so se Dalmoši falili kak so oni v božekovoj cukor piksi i zato je jim dal morje, a oni se morajo pobrigati kaj bodo ribe mele kaj jesti kak bi oni meli i kaj loviti. Najte me krivo razmeti, nemam vam ja nikaj proziv Dalmošov, ali još sam nigdar ne videl kak oni hranijo ribe v morjo? Očem reči, da bi oni hranili ribe i da se dragi božek ne bi pobrigal za ribe unda bi mi morjo mogli loviti sam girice ili pak, tu i tam, srdelice!
Nikak si nebrem pregruntati kuliko bi Dalmošov trelo kaj nahranijo jeno dvestokilnato tuno?
Kaj imajo zajedničko?
Kaj imajo zajedničko Jakuševec v Zagrebo, Brezje vu Varaždino i Totovec v Čakovco? Si oni imajo brege od smetja, očem reči, to so mesta kad se vozi smetje, V Jakuševec zagrebečko (dok se vozi) v Brezje varaždinsko (dok ga je mesta), a v Totovec čakosko i međimorsko. Kak smo zazvedili nejslabeše smetje imajo v Zagrebo jerbo se bregi od smetja sako malo zaruhnejo. Ovi vu Varždino imajo jako žilavo smetje jerbo ono zdrži na dežđo, snego, vetro i suncu duže od petnaest let i još je tak fajno kak da je fčera dopelano. Ovo naše međimorsko je nekše posebne sorte i ne znati kaj mi Međimorci mečemo vu te kante za smetje kaj se skorom sako drugo leto smetje vužge i to z čistoga mira. Čudno je to smetje kam god ga denemo. Poglečte, nejvekši so problemi ak ga ostavite pred hižami i nikam ga ne otpelate, a dok ga skladnete na nekše smetlišče tam vam ruon tak neda mira. Najgerek sam, jako sam najgerek kak z tem smetjom dojdejo na kraj oni šteri ga imajo čuda vejč od nas i kak to oni skladajo kaj jim se ne vruhne, kaj jim ne zacuri ili pak kaj se jim niti ne vužge? Teško mi je veruvati da so si ljudi po sveto spametneši od nas bar kaj se smetja dotikavle?
Žganica saki den se vejč vredi
Odnegda se je pripovedalo da tre piti vino i to ono bolše jerbo se po dobromo vino pamet dobi. I ne sam pamet nek i zdraviče. Verjem da ste ne pozabili kak so naši stareši govorili da ga pre hiži, štera ima gorice i klet, nega betega jerbo je klet apoteka. Do ne tak zdavnja dobro vino je bilo na velikoj ceni, a ve, par let nazaj, na lojtrici lekov i žganica je splazila hajdi visoko. Neje nikaj novoga da se prinas v Međimorjo žgajari i pije žganica, ali dok so se zišli moži z brežnoga Međimorja v Selnici i dok so zafremali Udrugo međimorska žganica Tepka žganica je dobila na ceni i to prek noči. Nejpredi so dečki šteri štimajo žganico naprajli Festival žganice v Merhatovco pre Đureko, a posle so se, prek Zasadbrega, preselili v Selnico de ve Festival ima stalnoga kvartelja. Morem vam reči da so se dečki hajdi navčili kak i da tre brati i kuhati sadovje, a još več kaj se žgajare i žgajarenja dotikavle tak da ove zadje žganice govorijo štiri jezike, a on što jiv pije još i vejč. No, ljubiteli žganice so tu ne postali, minuli tjeden so zafremali Čajanko i to ne kakšo god nek pravo domačo, očem reči, čaja z žganicom. Za probo so to naprajli v Doljnjemo Koncovčako i morem vam reči da so meli tri škatule čaja od lipe i jeno deset flaši žganice. Ne moram vam reči da je te čaj nejbolši, bar za ve, na sveto, a i prinas v Međimorjo. Dosti je ak vam rečem da je čaj pol vure venca držal i da je restiral se betege šteri so si našli kvartelja v opčini Selnica tak da je ve opčina Selnica nejzdraveša v naši Međimorski županiji. Kuliko vidimo leki rastejo se okoli nas sam jiv tre na vreme pobrati, zakuhati i zašgajariti. Još je niti jeden beteg ne pobedil žganico ak je ona negdi okoli dvajstitri gradi.
