Ne moram vam niti govoriti kuliko je tinte i papera potrošeno vu ovih minulih, nekaj meje od mesec dni, kak se piše o onoj milijardi štero so Škugor i pajdašija pozobačili v INI i to prek trgovine (čitaj: šverca) plina. Si smo čuli za penzionera šteri je našel na svojemo računo pol milijarde kuni, a neje znal što mo je poslal toga pušlina penez. No, tu je još ne kraj jerbo, kak nam je sima poznato, INA je pol – pol fabrika, očem reči, pol je od mađarskoga MOL-a, a pol je naše sam kaj Mađari gospodarijo z celom Inom makar mi imamo pol Uprave. Dok se je zazvedilo kak je z INE zginula milijarda, a da je to nišči ne primetil, mađarski dečki z Uprave Ferenc i Jozsef so podnesli ostavke kaj bo se znalo da so oni tu ne meli prste, ali so kak hezi v Upravi krivi kaj so penezi zginuli. Tak so naprajli ovi poštejaki v Upravi, a naši Barbara, Niko i Darko, skupa z precednikom Šandorom, so se ne osječali krivi pak so i dale ostali. I ne sam to nek so si, kak Poncije Pilat, oprali roke i posipali se z pepelom, očem reči, isplatili so si nagrade za to kaj so v minulom leto jako dobro posluvali. Ne bodete veruvali, ali saki je odnesel prek šesto jezer kuni. Posle, kak so dobili peneze dobili so i otkaze. Mađari so podnesli ostavke, a naši so dobili otkaze kaj znači da imajo pravo dobiti i otpremnine. Kak i seposot tak i tu se ne zna kuliko je tua otpremnina, a verjem da je ne mala jerbo so jim plače bile cirka deset jezer ojerov (bruto). Ve vidite kak je spametno i bogato biti političar i to ne običan političar nek političar z debelom kožom šteri je za se zaslužan (zato je dobil i nagrado), a neje nikaj kriv i zato je ne podnesel ostavko nek je poharačil i otpremnino. Moramo deti roko na srce i priznati da to si nebremo, treba za to meti vupeše i ne sekerati se na to kaj obični mali ljudi i poštejaki velijo i kak te gledijo. Čuda je leži magaditi dok imaš pune žepe tak da imaš z kim platiti plina kak god dragi bil.
Čuda nam je leži bilo sima pre srco dok nas je naš precednik Vlade, Drašek Plenkovičov utješil kak so penezi šteri so zginuli z INE v megli (čitaj: plino) na sigurnomo v rokami stranjke na vlasti, očem reči, Hadezeja. Kaj reči, več hajdi dugo Hadezeovci so na glaso kak „poštejaki“ i oni so glavni „gosti“ v Remetinco. Ne bi štel nikaj hudoga reči o tim čuvarima penez, ali sam jako najgerek da jiv itak bode INA znova vidla. A kaj bodo INI davali peneze ak so se nigdar ne žalili da jim plin fali?
Kaj god bodete vi rekli, ali poštejaki so negda čuda meje krali nek denes!
Hajdukovci so pak zmenili trenera
Engleska kraljica Elizabeta 2. je odišla k Božeko na račun pred tri tjedne v devedesetsedmom svojemo leto i posle kak je sedemdeset let nosila kraljevsko kruno. To si znamo, ali smo ne znali kak je vu vreme dok je bila kralica ispratila vejč od sto trenerov Hajduka. Več ve negdašji hajdukov trener litvanac, Valdas Dalmauskas, je trebal biti te sretnik šteri bi kraljico ispratiti na vječno počivalište. No, kak so Englezi toga kraličinoga sprevoda muhljavo prepravljali hajdučka metla je pomela i Valdas tak da je, na se zadje, nišči z Hajduka ne išel kraljici na sprevod. A kak se je pripovedalo kraljica je navijala za Hajduk i nadjala se da bode itak još jempot doživela kaj bode Hajduk prvak predi nek jo Božek pozove k sebi. Ali kuliko vidimo neje se fčekala.
Joža Manolič, vu svojemo stotretjemo leto, se još navek nadja!
Sveti Jeronim se je narodil v našoj Štrigovi
Drugi tjeden, zadjega dneva vu septembro bodemo obslužavali Remuševo v Štrigovi. Kak i sako leto. Pred šest let je zišla na svetlo dneva debela kniga pavlina Jožeka Bedekoviča „Natale solum“ („Mesto rođenja“), a par let posle je doktor, profesor, monsinjor i Cirkovljančan Matija Berljak izdal knigo o tomo kak je Papa Nikola peti napisal bulo da je naša Štrigova on Stridon vu šteromo se pred nekaj vejč od 1650 let narodil sveti Jeronim. Mi Međimorci, očem reči, Štrigovčanci imamo črno na belo da je sveti Jeronim Štrigovčanec i več šest let čakamo kaj bi opčinski oci ili pak turistički težaki napisali na table kak je tu rođeni sveti Jeronim, ali ne znati je li se bodemo toga fčakali. Dobro nam je poznato kak so si Dalmoši zeli svetoga Jeronima kak svojega makar jedino Štrigovčanci imajo knige v šterima to piše.
Ruon tak se i naši sosedi Janezi rivlejo, očem reči, oni pripovedajo kak je v Deželi rođeni naš sveti Jeronim. No, to je jako teško za poveruvati, a posebno nam šteri znamo da je Dežela postala država pred nekaj vejč od sedemdeset let, a več smo rekli da se je sveti Jeronim rodil jezerošesto let predi. Oni bi šteli, ali kaj nejde nejde.
Kakše je vreme prinas v Međimorjo?
Naša državna televizija je nas Međimorce, več zdavnja, hitila v škarpo kaj se dotikavle temperature i prognoze vremena. Rekli so Zoki Vakula i pajdaši da je prinas v Čakovco navek isto vreme kak i vu Varaždino pak unda nas ne bodo spominjali jerbo smo mi menši od Varaždina i jive županije. Zbrčkavlejo se z nami kak da mi nej plačali tv pretplato. A mi smo plačali predi, a plačamo još navek i nikaj se ne bunimo. Nekaj si gruntam, pak nemamo mi v Međimorjo sam Čakovca, šteri je preblizo Varaždina, imamo i druge grade, mesta ili pak opčine štere so hajdi dale od Zagorja. Napriliko, mogla bi prognoza vremena iti z Štrigove. Makar se Zagorje i Varaždin vidi z Mađerkino brega, ali neje ruon tak blizo Varaždina kak zgledi. Verjem, očem reči, siguren sam da bi hajdi ljudi v Lepoj našoj šteli znati kakše je vreme bilo, kakše bode i je li je bilo vroče ili pak zima, je li je bil mraz, sneg, dežđ ili pak sonce svetilo na Mađerkinomo brego, na Štrigovčako ili pak v Štrigovi, očem reči, naši sosedi prek Drave bi šteli znati kakše je itak vreme v mesti de se je narodil sveti Jeronim? Zato bi naša državna televizija, Zoki Vakula, šteri je naš međimorski zet, i cirkovljančan i metereolog gospon Mikec tu, ruon tak, mogli pomoči. Nek se čuje za Međimorje, nek se čuje za Štrigovo. Dok bode tak unda bodo si v Lepoj našo znali da se bere grozdje, da mošt vri, da je Vincekovo, da je Remušovo ili pak Martinje kaj ne bodo furt spituvali!
