18.9 C
Čakovec
Petak, 29 ožujka, 2024

Nek se i to zazvedi

HND  zebralo  stranjskoga  novinara  za  nejbolšega                                  

HND je ne hrvacko nogometno društvo nek je to hrvacka novinarska družina i oni sako leto zbirajo nejbolšega med sobom, očem reči, zbirajo novinara leta i to navek zberejo onoga šteri je po nečemo odskočil od sih drugih. Tak je HND družina za lanjsko leto zebrala kak nejbolšega negdašjega novinara Ferala i levičara od rođenja, Borisa Dežuloviča. Nebrem reči je li si je on zaslužil kaj bi bil nejbolši i je li ga lanjskoga leta ne bilo bolšega, ne bi znal točno reči jerbo se nejbolši HND novinar zbira sam med onima šteri so člani društva. To još nekak razmem, ali mi nikak nejde v glavo kak je HND družina zebrala za nejbolšega novinara v Lepoj našoj stranjskoga novinara? Najme kaj, Dežulovič je zebrani med sim novinarima HND društva kak nejbolši za minulo leto v Lepoj našoj, a još je niti jeden den ne preživel v Lepoj našoj jerbo od kak zna za sebe pak se do denes još navek živi i dela za Jugo. Kuliko vidimo i novinari delajo grehe i to ne male i kak se jim unda more veruvati?

V  belom  Zagreb  grado  se furt  nekaj  kuha  v  političkomo  lonco        

V belom Zagreb grado je nigdar ne preveč dosadno. Neje bilo niti dok je se bilo zaprto i dok je hercuvala Korona s Zagrebom i z Lepom našom. Malo, malo pak se nešči stane na levo nogo i mam bi nekaj menjal. Tak vam nejvečpot ljudima padne na pamet kaj bi menjali imena vulici ili pak trgi. Verjem da vam je poznato da ovi kaj držijo cugle vlasti vu svojimi slabimi, i hiravim rokama, ali se Morejo i se delajo z levaj rokaj, sako noč senjajo kak bodo vrnuli nazaj v beli Zagreb grad Ljubičico belo i kak bode ljubičica znova mela svojega trga v Zagrebo. No, neje to jedini trg i jedina vulica štera bi morala spremeniti svoje „krsno“ ime. Verjem da se bode to se spremenilo, ak se tak dospomenejo, i da bodo unda najempot dobili saki svojo vulicu ili pak svojega placa. Kuliko  se šepetuji i to se glasneše i glasneše okoli bana Jelačica, na glavnomo zagrebečkomo placo, moremo se nadjati novim vulicama i placima: Zelena levica ili pak Zeleni plac, Plac levičara, J.B.Tito, maršal Tito, Kumrovečki mališani, Moremo i još nešterne za štere so još ne sigurni. Brzčas bode nejpredi napravljena vulica prema Granešini štera bo se zvala: Prilaz Dijane i Milana prema Pionirskomo grado kaj purgeri vrnejo Milančeko se ono kaj je napravil (za sebe) i za beli Zagreb grad v minulih 20 let kuliko je hercuval v glavnomo hrvakomo grado!

Minul  je  petek  trinajsti                                                         

Minuli petek je bil jeden od onih štere zovemo črni petek jerbo je bil petek, a to je navek zadji delovni den v tjedno, očem reči prvi den vikenda. Najme kaj, do polneva se odelavle zadnji delovni den, a mam čim polne odzvoni počne prvi den vikenda i si se več počnejo spominati o tomo kam se pe črez soboto i nedelo, a posel se hiti na stran. I ne sam to minuli petek je bil črni ne zbog radi toga kaj je bila radna sobota nek zbog radi toga kaj je bil trinajsti. Ne znati što je da i de zmislil da je broj trinaest nesrečen broj za nas, ali si se toga držijo kak pijanec za leso, očem reči, za plot. Minuli petek je i naš prvi sosed, precednik Hungarije, Viktor Orban, mel hudoga dneva i to tak hudoga kaj so ga počeli kršeli zajedati. Mam čim se stal vjutro je z kištice na šublato zel vum staro karto Velike Hungarije i počel je znova pripovedati (čitaj: senjati) kak je naše plavo morje mađarsko. Do dneva denešjega nam je nišči ne nikaj povedal je li je mel vručino noč predi ili kak mo je ruon naše morje palo na pamet. Toplo se nadjam da je minul petek trinajsti i da sosedo Orbano več ne bodo takše mušice (čitaj: bedastoče) hodale po pameti i da se bode i dale šepuril po svojom Hungariji, a Lepo našo bode ostavil nam Međimorcaj i našim prvim sosedima Hrvatima. Najbrž je bil malo nervozen kaj mo je Osijek ne postal prvak Lepe naše v labodritanjo kak je on to splaneral. Ali kaj se labodoritanja dotikavle tu bi bole srditi morali biti Hajdukovci šteri več sedemnajst let čakajo kaj bodo zdigli v zrak pehara šteroga dobavlajo nejbolši hrvatski labodoritaši. Ne se tre mam srditi i na svajo vleči, pak nešči mora biti i na drugomo, očem reči, tretjemo mesti jerbo neje sramota osvojiti srebrno ili pak brončano želencijo.

Kaj  bodemo  predi  v red  dotirali                                 

Furt se prinas v Međimorjo nekaj dela, kak po Čakovco i okoli jega tak i po celomo hataro našega maloga Međimorja. Zidamo škole, šporcke dvorane, delamo kanalizacijo, popravljamo ceste, a nejveč od sega zidamo nove stane. Več smo zdavnja obečali sebi i dragomo Božeko kak bode Međimorje falaček zemle med dvemi vodami tu za se šteri imajo čas, šteri imajo peneze i voljo kaj bodo uživali v ljepotama štere nam je Božek dal. Dosti smo toga zlišpali i v red dotirali, a ve se spominamo kak bodemo zlišpali i prislaskoga Feštetiča, a ruon tak i hižo Međimorske popevke v Doljnji Dobravi. Se je to lepo o dobro, ali si nekaj gruntam da bi predi morali v red dotirati i zlišpati Mauzoleja Zrinskih pre Sveti Jeleni. Znate kak je to, grad Čakovec je Grad Zrinskih, međimorska županija ja Županija Zrinskih, pak unda dok furešti (čitaj: turisti) dojdo k nam v Međimorje očejo nekaj i od Zrinskih videti i nekaj se o Zrinskima navčiti. Tre prvo popravljati i lišpati ono kaj peneze donaša.

Štimamo  se  z  onim  kaj  imamo

Poglednite, prosim vas lepo, čemo bi bilo slično Međimorje da bi mi Međimorci (i to oni brežni) zapustili ili pak deli na čekanje naša vina, očem reči, naše Urbanovo? Jedva smo čakali kaj korona pete mekne z ovoga našega hatara i kaj znova pozovemo ljude kaj bodo došli k nam na of naš falaček zemle kaj si zemejo vuse friškoga domačega zraka i kaj si srknejo domačo žganico i nejbolše vino na sveto štero je dragi Božek nam Međimorcima dal. Tiblico kaj nem niti spominjal. Zakaj smo ruon mi Međimorci dobili od dragoga Božeka tua nejbolša vina na sveto? Zato kaj smo se prijavili Božeko na natječaj i Božek je se ponude spregledal i videl je da smo jedino mi Međimorci v semo nejbolši i da jedini moremo zapovati nejbolša vina i kak takša točiti sima drugima, ali sam onima šteri so si to zaslužili. Videl je dragi Božek da to morajo biti dobri ljudi šteri jako rado delajo i još rajši trošijo ono kaj je zraslo. A što oče nejbolša vina na sveto piti mora si znami dober biti. Pozivlem se šteri imajo radi dobro, kaj dobro, nejbolšo kaplico nek dojdo k nam, nek dojdo v Međimorje i ne bode jim žal.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE