Minoli tjeden smo preslavili 104-to obljetnico otkak so naši japice i mamice rekli vekovečno zbogom Mađarima i odišli na svoje, očem reči, prepojili so se Lepoj našoj. Hajdi dugo je trelo kaj smo se rešili Mađarov, šteri so malo, malo pak halosili po ovomo našemo „Falačko zemle med dvemi vodami“: JIm je tu bilo strašno lepo i sploh jiv je nekaj vleklo na te naš falaček. No, kak smo več rekli naši ljudi, mi Međimorci, smo 1919. leta rekli da nam je dosti toga kaj bodo sosedi, pak makar prvi, z nami gospodarili. Naši spametni ljudi, nejspametneši štere smo unda meli: Ivek Novakov, Vinko Žgancov, Đurek Lajtmanov i pater Kapistran Geci so se zavzeli za to kaj Međimorje naše malo bode naše i Hrvacko. Morem vam reči da so 9. januara na denešji Fratarski trg dovlekli prek deset jezer Međimorcov i posle meše so te ljudi rekli zadje zbogom Mađarima. Minoli tjeden smo to obilježili i zafalili smo se sima šteri so to napravili, očem reči, zafalili smo se Iveko Novako v Macinco i čakoskomo grobjo (de je zakopani), Vinkijo Žganco vu Vratišinco, Đureko Lajtmano v Prelogo i patro Kapistrano Gecijo v Čakovco de na Katoličkomo domo ima svojo pločo jerbo je pater Geci nejveč delal na tomo kaj ljudi dojdo na Veliko skupščino v Čakovec. I kak znamo došli so jerbo jiv je pater Kapistran pozval i prek župnikov po cirkvama celoga Međimorja, a i prek jegovih Međimorskih novin, štere so se počele pisati i čitati mam po novi 1919. leti.
Sam smo se ne zafalil dragomo Božeko šteri je, ruon tak, toga 9. januara skupil naše Međimorce na mešo na Fratarskomo trgo, očem reči, pred cirkvom svetoga Nikole. Nebrem reči, meša na šteroj se je dragomo Božeko reklo fala za Međimorje naše malo je služebna i ovo leto v starešoj čakoskoj cirkvi, ali je nišči ne došel ak ne bomo spominjali Zrinsko gardo. Vejč ljudi je došlo na mešo dok je esdepe vladal z Čakovcom, a si znamo kak so esdepeovci isto verniki sam oni verjejo kak naš dragi Božek ne postoji i ne delajo stisko v cirkvi, ali jiv je bilo čuda vejč na meši za Međimorje. Nejso došli najbrž zbog radi sebe, a niti pak zbog radi Božeka nek so došli zbog Međimorja našega maloga. A v zadje vreme, ne sam letos, nigdi nikoga. A što je za to kriv? Pak nebremo biti krivi mi šteri dojdemo, a nti pak političari šteri ne dojdejo, kriva je korona. I ne znati točno štera. Ne znati štera točno pasmina ve hercuje, očem reči, šteri soj, ali je kriva. Predi korone je se bilo drugač, čistam drugač, pak sam vam rekel da so undai i SDP-eovci hodali k meši.
Kuna smo otirali, ojer drži svojo ceno, a se drugo ide gori
Dva je tjedne minulo otkak smo kuno natirali tak da ve po našim plitkim žepima roštajijo sam ojeri i to oni drobni i železni. Železne smo dobili, a za papernate treba dobro delati i šparati ak jiv očemo meti. Do ve smo se reshitavali z stotkaj i hiljadarkaj, a ve pak do stotke jako reško dojdemo. Si znamo da so cene sega kaj nucamo skoristile priliko i skočile so gori dok so kune išle nutri, a ojeri vum kak da smo mi Međimorci, mi Hrvati takši đenteki kaj to ne bodemo niti vidli. Vidli smo i v pamet zeli, ali si nebremo pomoči. Lefko nam je tam de si moramo nekaj kupiti i ak nemamo dosti unda si ne kupimo, ali jesti se mora kaj čeke ne bodem spominjal. Verjem da smo mi Međimorci vekši katoliki od Pape pak nejpredi plačamo čeke i se drugo kaj od nas političari, štere smo si zebrali, iščejo, a na krajo ostanemo mi ženi i lačni i kaj nem rekel goli i bosi. Država (čitaj: premijer Drašek Plenkovičov) nam je obečuvala kak bode se one gospodarstvenike šteri bez reda zdiguvlejo cene za vuho prijela i reda jiv navčila, ali je još ne prešla z reči na dela. Kak veli teca Franca, nejpredi so mahali z šakom, a dok so došli v kontrolo unda z prstom i kaj se je pripetilo: stepali so se bregi, a skotil se je miš! Saki prinas dela po svokjemo kak da nej meli gazdo, a gazda nam je naheznol te ojere makar smo i z kunom meli dosti problemov, očem reči, i kune so nam navek falile.
Teca Franca mi furt gomba
Nebrem vam reči kak se je teca Franca resfucnula zbog te cene štere saki den plazijo prema gori, očem reči, rastejo. Još sam jo nigdar ne videl tak srdito. Gombala je po cele dneve i noči. Dok joj je došla prva penzija v ojerima brojila jo je jeno sedem-osem pot i nikaj je ne govorila sam je gombala. Več sam ne mogel zdržati pak sam jo pital kaj mi ipak ona more reči o tem cenam i o toj inflaciji štera je tu ne polek nas nek z nami. Nejpredi se je tripot skašaljala i una mi je glasno i jasno rekla kak ona vidi kam ide tua naša politika i kak si ve bode ona mogla kupiti čuda meje sega za te drobne peneze (tak je točno rekla) štere dobavla za onih četrdeset let kuliko je hodala na posel i to k Granaro. To sam razmel, pak sam jo još zapital kaj si je ona ipak pregruntala de se bode zastajla tua inflacija? Lepo mi je otpovedala: Jožek, moj dragi, bi ti jo to rekla da bi znala kaj je to inflacija!
Velijo, Božek je brado nejpredi sebi napravil
Nebrem reči naši saborniki so se za sebe pobrigali i neso zglasali to kaj bi cene v jivomo restorano, v restorano de oni obedujo, zajtrekujo ili pak idejo na gablec odišle gori. Najme kaj, do ve je obed za sabornike koštal 18 (z slovima: osemnajst) kuni i ne moram vam niti povedati da so naši saborniki za to dobavlali ne sam glavno jesti nek juho i deserta. Je li je to čuda ili pak malo to bodete vi meni povedali. Brzčas hajdi sabornikov niti nej vidli v sabornici da so ne hodali na fal obed. Dok so sabornikima preračunali teh 18 kuni v ojere došlo je 2,39 ojerov i ve bode zišlo da je obed sabornikov ipak podražil i to za jedno lipico. Nešterni saborniki so več zbog radi toga gombali, ali si tu nebrejo pomoči, ali oni mlajši i šteri držijo do sebe i šteri ne plačajo z karticaj bodo platili 2,40 ojerov kaj znači da bodo ostajli tringeta od jenoga ojerovoga centa, očem reči, osem negdašji lipici. Ali takši ga ne čuda jerbo čuda je leži platiti z karticom, pak te je unda ne sram kaj si ne dal tringeta.
Nesam vam rekel kak je cena obeda za sabornike od 2009. leta pak do lani odišla gori za 50 proventlinov, negda je obed bil 12,oo kuni, a lani do novoga leta, predi ojera je bil 18,oo kuni. Neje niti sabornikima lefko!
