Zrinski so nejbolši

Na se zadje se je pripetilo ono kaj se je moralo pripetiti. Najme kaj, nejpredi se je sam šepetujilo pre čakoski gracki vuri, a unda so počeli spominki po krčmaj i kafičaj, a zadji so se o tomo počeli spominati penziči. A dok se oni počnejo spominati unda se zna da se ne vidi sam dim nek več i ogej gori. A te spominki seposud so bili o tomo je li naš župan Matek Posavcov bode bežal maratona Međimorje, očem reči, Lejpa naša – Brisel ili nebo. Čim je Matek priznal da se je prijavil za te maraton mam so si počeli pripovedati: – Pak sam ti ja rekel da bode išel. A kaj vam nek rečem, ve so si spametni, ve si se znajo, a to je po onoj staroj: posle bitke si so generali. Naš si je župan dobro odvagnul, hajdi noči je ne spal, dugo si je gruntal, jezere i jezere kilometrov je „prebežal“ i bič je počil: On ide v Brisel! Da bi čovek reč rekel. A ve smo mi, kak bi kartaši rekli na štiho i moramo mo dati dosti glasov kaj se mo spunijo te jegove senje i kaj bodemo mi meli svojega čoveka v Briselo. Znate kak je to več je na izboraj, mi damo glase komo očemo, a što bode pobedil, očem reči, što bode išel v Brisel o tomo bodo zadjo reč rekli ovi šteri brojijo glase. Tak je bilo navek, pak tak bode i ve. Kaj vam nek rečem, štel bi kaj bi mi meli v Briselo svojega čoveka i ne to sam zato kaj se bodemo štimali žnjim nek zato kaj bode i nekše ojere dovlekel k nam v Međimorje naše malo. Verjem da ne bode pozabil otkod je genul v EU politiko. Dok sam čul kaj je Matek odlučil, morem vam reči da sam mo ne opče jalen!? Ne znati kaj je z menom? Najbrž so mi zadjipot v bolnici, dok so mi davali krv, ne dali krv od nekšega Međimorca nek nekša stranjsko. Vidite kak se to mam pozna. Naš međimorski jal nam je v krvi i tre sam malo spremeniti krv i se se spremeni.

Morem vam reči da naš Matek jako dobro stoji na ovomo našemo Fejsbuko, nejstarešemo na sveto. Znate šteri je to Fejsbok? To so vam nejstareše ženice z naše vulice štere pomalem, ali sigurno šprintajo prema devedesetoj leti i tri dni v tjedno se zidejo na kavi, v tračo pre jenoj od jif i unda pretepejo se ono kaj se je pripetilo i kaj je još važneše, se ono kaj se bode pripetilo. Vidite, na tomo Fejsbuko Matek jako dobro stoji i ženice so sigurne da bode on videl Brisela. Dok vam rečem da je teca Franca glasnogovornica toga fejsbuka unda morete biti sigurni da te fejsbuk se najbole zna. Fejsbuk – ženice nemajo nekše velike škole, ali zato imajo cele kupe životnoga iskustva. Kaj kaj toga je prešlo prek jivi ve več stari hrpti, pak i dva rate imajo pod sobom. Kuliko vidimo Matek se je još ne niti pravzaprav kandideral i več je zebrani. To privilegijo nemajo si oni šteri bi šteli dojti v Evropo. Morem vam reči da je te fejsbok Mladena Novaka niti ne spomenul.

Čakoski komunalci iščejo direktora. Do ve so meli direktorico, a ve pak iščejo direktora. Tak so bar napisali, nečejo več direktorico nek direktora. Nej znati je li se opče direktorice smejo javiti ili pak je te natječaj napravleni sam za direktore? Ne znati kaj se je Nadzornomo odboro direktorica tak zamerila kaj so joj niti ne dali šanso kaj bi se bila javila? Ili pak se je zamerila nekaj čakoskomo grackomo načelniko? Ne znati!? Ona več dva mandate, deset let, hercuvle v Čakomo, pak je se mogoče. No, so ne trebali ruon tak naprajti kaj so jo zbrisali vum z natječaja. Najgerek sam je li se ne bode javilo EU poverenstvo za jednakost spolova i zašpotalo se one šteri vedrijo i oblačijo v Čakomo i grado Čakovco kaj so ženama ne dali šanso i kaj so jiv hitili vum z natječaja. Vum z poduzeča jo morejo hititi, ali vum z natječaja to je ne smeti. Pak bo se državni stručnjak za se, za pravdo i nepravdo, za moške i žene, za deco i mlade, za Hrvate, Međimorce i nacionalne manjine, Željkec Puhovski, pojavil i na red nas pobral. Ne verjem da se tu bodemo zvlekli jer on več skorom pedeset let resteple pravdo i pravico po celoj Lepoj našoj, od Mure do Konavlja, od Iloka do Umaga. Mi si moremo gruntati kaj je pravda i pravica, a Željkec to nejbole zna i od toga svojega znanja jako dobro živi.

Minuli tjeden, ne of ve nek on predi jega, so Čakovčari proglasili nejbolše športaše minuloga leta. Nejbolši je bil i ve, kak več i na leta, naš konjanik i gimnastičar Filip Ude. Nega je ruon koj navek nejbole posluhnul, negda se je i zritnul dok se je Fičo to nejmeje najdjal, tak da ga je znal i hititi doli z sebe, ali živleje je takše, negda se ide gori, a negda se, bormeš, padne i doli. No, kak je bilo bilo je, dok so čakoski šporcki težaki podvlekli crto zišlo je da je Fičo još navek nejbolši. Mortik je i on ne bil nejbolši lani, ali ga bolšega ne bilo tak da je zlatni tajer došel znova v Fičijove roke. Vredo je to kaj mo damo još malo kuraža, još malo vetra v hrbet jerbo se on prepravla za još jeno Olimpijača. On je vreden, trenera i vežba po cele dneve i ak bode si još dober z kojom mogla bi biti još jedna želencija. Nekaj mi je palo na pamet, mortik bi Fičo moral zameniti koja i dale vežbati na kobili, najbrž bi mo čuda bole išlo. Kobile imajo rajši ove iskusneše jahače šteri se razmijo v posel.

Nejbolša športašica v Čakovco je naša, evropska i svecka mlada tenisačica Tončika Ružičova. Ona je nejbolša na sveto za svoja leta. To kak dobro igra, kak pobeđuvle to je jako lepo za videti, ali nikak nebre ovima po sveto dopovedati de je to Međimorje malo otkod je ona došla i kaj je kaj je tak dobra. Kaj bode ona jim prepovedala da je na paradajzo, papriki, vugurkima, špargi, bažolo, gobaj i piščancaj, a nejrajši ima hajdinsko kašo, da oni to ionak ne bodo razmeli. Saka čast Tončiki, tak mlada, a več na krovo sveta. Rečite vi meni zakaj smo mi Međimorci tak dobri v semo zakaj se primemo? Najbrž je to zbogradi toga jerbo je Božek sveta stvoril med dvemi rekami i ve je se bole jasno da je to bilo tu prinas med Murom i Dravom, kak nam to lepo več na leta pripoveda naš doktor i monsinjor Kolarič, očem reči, Đurek Kovačov! I kak unda ne bodemo nejbolši ak smo več prvi na svet došli?

Nejbolše športaše v Čakovco ipak imajo Zrinski. Nejbolši ženski klub so rokometašice „Zrinskoga“, a nejbolši moški klub so streličari „Katarine Zrinski“. Kaj reči, ipak so Zrinski ostajli tu prinas nekše trage vu onih 125 let kuliko so hercuvali z ovim našim hatarom. Zrinskice so več hajdi dugo v Prvi ligi, držijo sredino lojtrice tak da nemajo kam pasti i ne sam da so fajne nek i jako dobro igrajo. Što ne verje nek dojde glet. Streličari, kaj jiv ne bodem spominjal, oni so kak vino kaj so stareši to so bolši. Nek jim naš Božek da zdraviče kaj bodo još dugo meli voljo, željo i dobro oko tak kaj se bodemo i dale žnjim štimali. Da je Mikula Šubič Zrinski živ znate kaj bi za jiv rekel? Ne znate? – Da sam mel jiv nigdar ne bi Sigeta zgubil!

Lepo je to kaj se štimamo z svojimi športaši i kaj sako leto falimo one nejvredneše. I čakoski gracki načelnik se štima z svojimi nejbolšimi športaši i obečal je da bode i dale pomagal one nejbolše. Med nejbolšima ga pak ne bilo labodoritašov, ali je zato Štef Kovač obečal da bode napravil novo labodoritaško igrališče i to od umjetne trave. Zabadav se si drugi športaši muočijo, zabadav so nejbolši, zabadav se jerbo nejveč penez navek odhaja labodoritašima. Nemam nikaj protiv labodoritašov, ali i drugi nekaj vredijo i nekaj nucajo i ak so do ve bili dobri unda bodo posle još i bolši.

Zrinski so dobro prešli kaj se športa dotikavle, ali v čakoski gracki knjižnici, štera se zove po Mikuli Zrinskom Čakoskomo, več dugo ga ne na zido ploče od kamena na šteroj je pisalo ono nejlepše kaj je naš čakoski Mikula rekel:  „Znam i nebom zatajil da sam Hrvat i da sam Zrinski!“ Na leta je, mam pre vrati, bilo to napisano na kameno, ali ga ve več hajdi dugo nega toga kamena. Ne znati kam je to zginulo, što je itak to fkral?

Ostavi komentar