Zagrepčanci so herbali Lončara
Ne bodete veruvali, ali bormeš je tak: zagrebečki gracki načelnik Tomica Tomaševič je dal grobno mesto Budimiro Budi Lončaro zabadav i to ne bilo de, nek na Mirogojo i to v Aleji velikana. Pitam vas pitam, kak vas tak i sebe, pak čiji je velikan bil Budimir Buda Lončar? Stoprocentno ne naš, ne od Lepe Naše jerbo je on drukal za Jugo, za četnike i do zadjega svojega dneva je živel v Jugi. Bil je dugo minister do zadjega i unda je drukal protiv nas, naše Narodne garde i naših branitelov. Bil je minister dok je Ivica Račanov dal oružje naše Teritorijalne obrane v kasarne jugosoldateske, a ruon tak je bil vanjski minister pak je shodil v Ujedinjenim narodima v Newjorko kaj so zglasali embargo na uvoz oružja Lepoj Našoj tak kaj smo se mi Hrvati 1991. leta borili protiv jugosoldateske i četnikov z golaj rokaj i lovačkaj puškaj. Buda je bil jeden od onih šteri so drukali za jugosoldatesko i četnike sam kaj mi Hrvati ne bi zafremali svojo državo, svojo Lepo Našo i to čistam sami bez Srbije i Srbijancov. Dok se to znuomo, a i Tomica je to znal, unda mi je čistam čudno kak je Tomica dal Budi večnoga kvartelja na Mirogojo i to zabadav. Pak je Mirogoj ne Tomičin nek zagrebečki, od sih Zagrepčancov. Kaj reči, Tomica je z Budine škvadre, a to so oni šteri još den denes drukajo za Jugo i ne podnašajo Lepo našo. Još sam fali kaj bo Buda dobil svojo vulico v belom Zagreb grado kak jo ima i komunistički ubojica i zločinac Vlado Ranogajec. Zagreb, očem reči, Tomaševič je Budi se dal, a jegovi boduli z Preka so ga otprajli kak da so ga nigdar v živlenjo ne vidli – niti so mo špalera držali, niti so mo potnico ne igrali, a niti so mo zadje zbogom ne rekli. Pak nebre nam se Tomica pofaliti kak on pozna Budo bole nek jegovi sosedi i zemljaki z Preka, očem reči, z otoka Ugljana.
Posel se deli na spametni i fizički. Spametni posel se dijeli na umni i bezumni, a fizički posel se podeli težakima!
Nisi beskoristan ako možeš koristiti kao loš primjer!
Za deco ga ne dosti penez
Čakovčanci z čakoskoga Juga, očem reči, Buzovčari, Pustakovčari, Putjančari, Travničari i Martančari so pak deti na čekanje. Najme kaj, trebalo se zidati novo zabavište na čakoskomo Jugo, ali so gracki oci i gradonačelnica Ljerka Cividini deli to zabavište na čakanje jerbo ga ne dosti penez tak da to južno zabavište mora čakati bolše i bole penežlivo zutra. Nebrem razmeti kak ga ve najempot ne dosti penez, a gracki oci se falijo kak so se duge, štere je napravil negdašji gracki načelnik Štef Kovačov, povrnuli i da ga v kasi je dosti penez. Ne sam dosti nek ga je i viška. Ve bi mogli reči da so penezi za zabavište sfalili jerbo so grackim ocima i grackim dužnosnikima zdigjene plače pak je negdi moralo sfaliti? Još nekaj, kak ga navek dosti penez za rotore, a z druge strane Čakovec kak Grad – prijatel dece nema dosti penez za deco, očem reči, za svoje prijatele? Ako ga pravzaprav ve najempot ne dosti penez unda je trelo to reči mladim možima i mladim ženama nek malo počakajo kaj bodo unda delali deco dok ga bode dosti penez za jaslice i za zabavišta.
Bez obzira kak tehnologija fletno napreduvle, srednji prst ostaja i dale nejfletneši prenos poruka.
Nešterni ljudi tak radi imajo svoje žene kaj rabijo ljucke… Sam kaj nej svoje trošili!
Makar je inflacija hejala, penezi i dale falijo
Inflacija je vpešala, hirava je i se slabeša i slabeša, ali niti naše bukse so još ne k sebi došle otkak so kune odišle v ropotarnico povjesti, a ojeri so prijeli v roke cugle vlasti. Ojer je sedem i pol pot jakši od kune, a kuna je cirka 8 – 9 pot slabeša od ojera tak da nikaj nebremo zazvediti ak gledimo cene po pijaco i štacunaj od lani i ovoga leta jerbo so lani več bile cene v ojerima. Si pripovedajo da so cene lanca ftrgle predlani dok so išle z kuni vu ojere, unda so si koristili gužvo, očem reči, skoristili so priliko jerbo nišči ne zna i nikak nebremo zazvediti z kuliko smo podelili kune kaj smo dobili ojere. Mortik je se to štimalo dok smo koristili matematiko, ali čim nam je na pamet došla računica i dok smo vidli kak to nišči ne kontrolira unda smo naračunali cene takše kakše so nam pasale kaj zaslužimo kuliko nucamo. Prilika dela od čoveka lopova. A dok smo vidli da se nišči nikaj ne buni unda ga “našoj inflaciji” ne bilo kraja. Lepa Naša i Plenki so kontrolerali plina, strujo, nafto i benzina, a se drugo je bilo v našaj rokaj. A kaj bodemo zmenšali cene ak dobro prodavlemo i po vekšim cenama. Več zaslužimo!
Več duže od četrdeset let se falim kak sam srečen kaj sam pijanec, a ne drogeraš, a ve mi je i tu v pipi vgaslo jerbo je pijača (čitaj: pivo, vino, žestice) tak podražila kaj bodem moral i pijačo ostajti. Rečite mi, prosim vas lepo, kak bo to zgledalo dok bodete vidli starešega ozbiljnoga čoveka i to seroga kak pije vodo? Kak da je čovek ostal bez pameti. A i voda je dosti draga. No, pumpa na vrto košta kaj košta, ali posle je voda zabadav. To se vam ja sam falim, ne bodete me našli z lončekom vode v roki jerbo ne verjem da bi me voda mogla tak okrepiti kak to napravi vino. Vino davle krepost, a i pamet? Tak se bar falimo!
Dok sam bil mali bojal sam se pijancov. Ve vidim da smo ne tak opasni!
Kaj delaš v petek navečer? – Nejveč pot odidem na pijačo. A, posle? – Posle je pondelek!
