Zadnji pot sam vam skorom se rekel kaj sam kanil za naše zlatne rokometašice, štere so na Evropskomo prvenstvo osvojile brončano želencijo. Nesam rekel kak smo jiv dočakali, očem reči, kaj so govorili ljudi šteri držijo v rokama cugle državne vlasti, a kaj so delali. Si šteri so meli priliko: od precednika Sabora, precednika Vlade i precednika Države, presednika HRS-a so ne mogli najti reči z šterima bi nafalili naše fajne puce kak so bile dobre, kak so dobro igrale i kak smo se žnjimi štimali. To je bilo na jednoj strani, a z druge strane je prijenos bil na štrtomo programo državne televizije, a dok moški dojdo dimo, bilo rokometaši ili labodoritaši unda je to navek na prvomo programo. Tuliko o ravnopravnosti, kaj nam spominjal da je državna televizija nama šteri jo plačamo pokazala sam zadje dve utakmice. Neje mela dosti penez kaj bi kupila i druge utakmice, pak smo jiv morali gledati prek Janezov ili pak Srbov. No nesmemo preveč gombati jerbo nam bodo povečali pretplato.
Nebrem razmeti sam sebe kaj se čudim državnoj televiziji ak so naši dečki, šteri vodijo Rokometnoga sveza Lepe Naše, kupili pucama avijonske karte za dimo posle prve tri utakmice v grupi jerbo so se niti oni ne nadjali kaj bi naše puce mogle pregaziti negdašje i denešje svecke prvakinje.
Ipak brončane rokometašice imajo nekaj zajedničkoga z našim srebrnim labodoritašima. Najme kaj, labodoritašima je nešči ištekal strujo (niti dve i pol leti posle se je ne zazvedilo što je itak to napravil) dok so popevali Tomsonovo pesmo Lepa li si, a pucama so predi nek so došle dimo lepo rekli nek se ne hurmajo z tom pesmom ak kanijo kakše peneze dobiti i da morejo popevati bilo štero pesmo sam Tomsonove ne. Ak je srebrnima ne bilo dopuščeno unda nebrejo brončane meti nekšo vekšo privilegijo.
Morem vam reči da se dosti ljudi zišlo pred zgradom naše županije dok so došle naše rokometašice Paula i Stela Posavec, makar se je, zbog radi korone, skrivalo da bodo došle kaj se nej zišlo vejč ljudi nek Capak i Beroš dopuščajo. Štel sam vam još reči da so te naše puce Strahoninčarke, a jiv je dopelala v rokomet Darinka Pavlekovičova, štero si znamo po coni – Črna , štera je ruon tak Strahoninčarka i bila je jedna od nejbolših, ak ne i nejbolša međimorska rokometašica. Denes je Črna trenerica prve ekipe Zrinskoga. V reprezentaciji Lepe Naše igra još jena Strahoninčarka Nikolina Zadravec, štera se je ruon tak kak i sestre Posavec navčila igrati rokomet v Zrinskomo, a ve igra v Podravki, ali je zbog radi korone ne putuvala v Dansko. Verjem da bode ova kolajna dopelala nove pucike v dvorane i to ne sam prinas v Međimorjo nek po celoj Lepoj Našoj tak da ženski rokomet bode i dale išel pobedničkim stezama, štere so naprajle Stela, Paula i jive pajdašice.
Korona Božič je pravi Božič ak ne bodemo nikaj bajali državnomo Stožero kaj je premalo ljudi pustil v cirkve jerbo smo si bili doma z svojimi familijami kak je to red za Božič, a nesmo letali od štacuna do štacuna i iskali sake fele poklone, štere je unda mali Isusek v Badnjoj noči, predi svojega rođendana, reznašal od hiže do hiže i metal pod okinčene cmreke. Kak bilo da bilo nigdar smo ne bili tak čuda skupa, ali se je sejeno, makar smo nikam ne preveč hodili nekaj našlo pod cmrekom za sakoga pre hiži. Nešči je i to moral reznositi. Moremo reči da nam je, na se zadje, ipak korona ne odnesla Božiča, ali ga je zato odnesla štacunarima (nekaj malo) i krčmarima (čuda, čuda vejč).
Još se nebremo dospomenuti što itak reznaša te dare po našaj hižaj. Prvi, na početko decembra počne sveti Nikola, a pod bor, kak smo več rekli, to dela mali Isusek. No, saki den čujem da je Ded Mraz još ne odišel v penzijo ili pak je odišel, ali dela štiri vure. Bil sam najgerek i to jako, što je itak te Deda Mraz kaj je tak žilavi? Teca Franca mi je lepo pojasnila da je Ded Mraz brat svetoga Nikole šteri je skrenul v levo i odišel je v partizane.
Nebre Nova (stara) levičarka Rada Borič određuvati što bode išel v cirkvo i da jerbo ona ne hoda v cirkvo. Cirkve so dosti velike tak da si oni šteri dojdejo morejo nutri, a kuliko znuom, a tak mi je i teca Franca rekla, da so levičari nigdar ne delali stisko v cirkvi pak je niti denes ne drugač. Ak sam dobro razmel drugarico Borič ona niti v krčme, očem reči, v kafiče preveč ne hoda jerbo da hoda unda bi znala kuliko bi ženih duši zišlo v kafič ak bi saki potrošil sedem kockastih metrov. Mortik 5-6, a krčmarima se ne splati hlapariti krčmo za tak malo ženih. Najgerek sam jeli je gospođa Rada okinčila svojega boriča za Božič?
Kakše god mere donese naš državni Stožer, šterih se unda mi (ne)pridržavlemo, ali tak dugo ne gombamo dok nam Stožer ne zapre krčme. A čim zapre krčme unda je nervoza na se strane: z jene strane so nervozni krčmari jerbo jim je Stožer zel kruha z rok, a z druge strane so nervozne se one žene duše štere so navčene saki den, bar na kratek čas, navrnuti v krčmo tam okrepiti svoje zmočeno i ženo telo, a ruon tak napasti svoje oči na ritici ili pak zizekima frčne kelnerice.
No, to je još ne se. Verjem da se zmislite kaj se je pripetilo dok je naš vrli državni Stožer prvič zapral krčme, a to je bilo v marcijušo na Jožefovo. Sam par dni posle zapiranja krčmi je bil potres v belom Zagreb grado, a ve dok so znova zaprli krčme znova je bil potres, ali ve v Petrinji i v Sisko. Najbrž bi si dečki i puce z Stožera malo duže premišlavati predi nek zapirajo krčme ak nečejo kaj se bode potres španceral po celoj Lepoj Našoj!?
Pred nami je novo leto, 21.v tretjemo jezeroletjo, želem vam čuda sega, nikaj hudoga i to se brez betega!
