12.8 C
Čakovec
Utorak, 16 travnja, 2024

Zazvedil sam zakaj Štrigovčanci nečejo svetoga Remoša

 Več sam vam parpot pripovedal kak mi nikak nejde v glavo zakaj Štrigovčanci ne napišejo poleg table svojega mesta, svoje opčine Štrigove da je to Stridon, mesto vu šteromo se rodil sveti Remoš (čitaj: Jeronim). Rekli so mi da je to ne naučno dokazano da se je sveti Remoš tu rođeni. Dok sam to čul ne sam mogel k sebi dojti. I ne sam to nek sam se dve noči obračal v posteli. Rečite mi, prosim vas lepo, ak je do ve ne dokazano da je sveti Remoš tu rođeni da unda bode jerbo je pred dve leti minulo 1600 let ot kak je hmrl. Štrigovčanci imajo v rokama Bulo pape Nikole V, štero je Papa izdal pred nekaj meje od pecto let i ve so se Štrigovčanci  počeli špotariti z onim kaj je Papa pred pecto let napisal. Očem reči, ve so Štrigovčanci došli na to kaj ne verjejo Papi, a kak bodo unda veruvali školanomo pavlino Jožeko (mojemo imejako) Bedekovičo,  šteri je, ruon tak pre nekaj meje od tristo let napisal kak je sveti Remoš naš čovek i to Štrigovčanec.

Štrigovčanci imajo knjigo, imajo Bulo i ne vupajo se pofaliti kak je sveti Remoš naših Štrigoskih bregecov list, a naši Dalmoši nemajo nikaj, ali se navelikom falijo kak je sveti Remoš (tam je sveti Jeronim) rođen negdi okoli Splita ili Trogira. Znate kaj, bil sam v Splito i tam sveti Jere (čitaj: Jeronim) ima nekšo kapelico i oni ga svojatajo, a prinas v Štrigovi smo mo mi zazidali katedralo z dva turne i z Rangerovim freskama i još čakamo kaj nam nešči, nekši naučnik, to potvrdi. Nebrem to razmeti, Bulo Pape je monsinjor Matija Berljakov, naš Cirkovljančan, donesel z tajnoga arhiva vu Vatikano i poklonil Štrigovčancima, a oni čakajo kaj jim se, još jempot, skaže zvezda repatica.

Si se slažejo z tem kak se je sveti Remoš narodil na meji Panonije i Dalmacije i makar si znamo da je Panonija nigdar ne preplivala Savo, očem reči, meja Panonije je nigdar ne bila onkraj Save i ne znam kak so jo unda Dalmoši odvlekli tijam do Trogira oliti Splita. Ruon tak so naučniki, i to geografi, dokazali kak je Sava nigdar ne tekla črez Dalmacijo, ali Dalmoši so kak Dalmoši, neso strahopezdeci kak mi Međimorci i svetoga Remoša so odvlekli na more jerbo jim se to bode splatilo. Ak ne denes unda zutra.

Ne znati šteri so to naučniki dokazali kak je naš čakoski Stari grad, očem reči, Grad Zrinski zafremani na pozojo, a ne na drvenim fondošima? Neso niti jani, ali ak se bode o tomo govorilo, a i pisalo, kak se počelo, par let unda bode zišlo na to da je to tak bilo. Pozoj je v Staromo grado, pozoj je vu sim knigama i prospektlinima o čakoskomo Staromo grado makar se zna da so ga zmislile Čakovčanke i Čakovčanci i to pred cirka tridesti let, a sveti Remoš je več na čekanjo duže od jezerošesto let.

Naši  labodoritaši  so se ne  hapili  kak  smo  se  mi  nadjali

     Svecko labodritaško prvenstvo se je hapilo igrati v minulo nedelo i ve bodemo bez brige od sega drugoga skorom mesec dni. Ne znati je li bo što mogel skubicerati kuliko se bode pive, gemištov, žganice, kojekov, viskija ili pak bambusov spilo ili kuliko se bode sakefele oblizekov pojelo, kaj roštilja, tibilce, boncekov, jegera, pršota ili pak kulena. Sega toga bodo stoli puni predi utakmice, a se bode prazno ostalo posle sam ak bodo naši labodoritaši igrali kak treba i pobjeđivali kak so to delali pred nekaj vejč od štiri leti v Rusiji. Katar nam je čuda dale i se je čuda dražeše nek je to bilo v Rusiji tak da bode tam čuda meje naših kibicov, ali niti to prvenstvo ne bode prešlo bez naših črleno – belih kockici. Moramo deti roko na srce i priznati kak smo se nadjali da bodemo pobedili Maroko, ali, na se zadje smo i srečni bili kaj smo osvojili boda i kaj smo ne odišli po riti k meši kak so to naprajli Argentinci protiv Saudijske Arabije ili pak Švabi protiv Japancov. Teh par dni kuliko prvenstvo traje se je pokazalo da denes več si znajo labodo ritati i da se niti z jenom labodoritaškom reprezentacijom ne muoči špotariti. Ne sam kaj je ne počelo onak kak smo se si nadjali nek smo odma posle tekme z Marokom počeli mejati ne sam igrače nek i našega trenera Zlatkija Daličovoga. Do ve nam je pet let dober bil, a ve najempot nikaj ne zna i nikaj se ne razmi v posel šteroga več dugo dela.  Posle Rusije smo ga falili kak je jako dober i čuda bolši od trenera sih trenera Čirija Blaževiča. Tak je rekla i naša negdašja precednica Kolinda Grabar Kitarović. Se zmislite? No, vreme bo pokazalo kuliko pravzaprav vredijo naši labodoritaši i je li bodemo tak dauko došli kak je to bilo pred štiri leti. Bilo bi lepo da se Luka Modričov i pajdašija skažejo onak kak so nam obečali i kak smo se mi nadjali dok smo jiv pošiljali v Katar.

Verjem da ste čuli kak je minister za škole, đake, navučitele, navučitelice, profesore i podvornike dal svoj blagoslov kaj veliki odmor v školi tak dugo traje kak dugo naši labodoritaši igrajo. Kak smo več rekli ova tekma protiv Maroka je ne bila onakša kakšo smo se nadjali, niti tekma, a niti pak rezultat. Naši so tak hudo igrali kaj so nešterna deca iskala kaj se vrnejo nazaj na nastavo.

Znate da se v Kataro niti za vreme Sveckoga prvenstva nesme piti alkohol kak je to inače šega ne sam naših kibicov. Kuliko sam mel za čuti sa je sreča kaj si naši kibici nebrejo kupiti pivo jerbo bi bankroterali. Najme kaj, pivo košta blizo sto ojerov, a neje niti čudno ak kava, i to ona kratka bez mleka, košta deset ojerov. Ve bi i ja pital ove glavne labodoritaške šrajfe kam so itak zarivali to Svecko prvenstvo? Ali kaj reči, kuliko sam do ve videl se so tribine pune, pak unda nešči ima peneze kaj dojde to glet? Neso si bokci na ovoj kugli zemaljskoj!

Črni  petek  je  za  se??

     Kak sam mel za čuti i naši policaji so se uključili v črni petek. Najme kaj, što bode nekaj zahuzal v (črni) petek, očem reči denes, bode mel pedeset procentov popusta. I unda bode nešči rekel kak naši policaji nemajo srca.

Ostavi komentar

Povezani članci

Ostanimo povezani

49,190FanoviLajkaj
608SljedbeniciSlijedi
0PretplatniciPretplatiti

NAJNOVIJE