15 C
Čakovec
Četvrtak, 28 ožujka, 2024

Zakaj je naš Darko „mali Ivica“???

Darko Horvatov naš, hadezeov i dobravski minister kajkaj sega v Lepoj našoj je zišel vum z Remetinca ( i to sam z tjeden dni starom novom taškom remetinkom) bez podrške Dobročancov, bez podrške nas Međimorcov, a neso mo dali podrško niti naši prvi sosedi Hrvati. Što zna kak bi to se završilo da je Darko mel podrško bar takšo kak je mel čakoski negdašji gracki načelnik i još navek važeči sabornik, Štef Kovačov, da mo je došel šef partije Peđa Grbinov dok so plave Štefove okice pustile predizborne suzike na čakoskomo glavnomo trgo sega par metri od glavne čakoske gracke vure. Neje drug Peđa došel sam davat podrško Štefo, žnjim je bila partiska europarlamentarka Biljana Borzan, štera mo je brisala soze, a ruon tak je Peđa sobom dopelal i televizijo tak kaj je cela Lepa naša vidla soze štere so čvapkale z plavih Štefovik okeci, a to so, kak se posle vidlo, bile soze rastanka od fotelje načelnika čakoske varoši.  Rekel sam vam,dofčerašji minister Darko Horvatov došel je vum z Remetinca bez podrške, ali z taškom, a televizija je došla kaj bodemo i mi v Međimorjo vidli da je naš Darko pravzaprav došel vum z glavnoga državnoga rešta. Nejpredi je došel vum i dok so za jim zaprla vrata na rešto unda nam je lepo rekel kaj kani naprajti, a kaj ne bode napravil. Ve si znamo da ne kani biti sabornik, to privilegijo je prepustil međimorskim grackim načelnikima, priločanco Kolareko i serjančaro Srpako, a on bo si zel v penezima kaj ga pripada i iskal bo si posla negdi mimo ministarske fotelje i zagrebečkoga Markovoga trga.

Na se zadje ve niti ne znamo zakaj je naš Darko pravzaprav završil v rešto? Na se strane se je pripovedalo kak je trguval z svojim ugledom, a več par meseci se pripovedalo i seposot smo mogli čuti i prepčitati kak je Darko bil nejhujši miništer, očem reči, nejslabeša karika v Drašekovoj Vladi. Ak je tak, a si so rekli da je tak, kakšega je unda ugleda mogel meti Darko i kuliko je toga mel ak je još žnjim i trguval? Darko je završil v rešto, a si oni šteri so skupa z Darkijom meli roke do lakta v državnim piksama z pekmezom z šterih so se delili penezi so bili sam zašpotani i to ne bilo kak nek nejjakše kak to Uskok i Dorh morejo naprajti. Kuliko smo meli za čuti Pupovcov potprecednik Vlade Boris Miloševič je, ruon tak kak i Darko, delil te peneze, a meli so cirka dva i pol milijonov, ali Boris je nekaj drugo on je zaštičeni jerbo on drži Vlado i Drašeka iznad vode. Kuliko vidimo niti med političkim cvetjom v Lepoj našo ga ne pravice.

Neje na meni kaj bodem delil packe oliti pravico, očem reči, kaj bodem ja određival što je kriv što ne, što je lopov što ne, ali čovek je bil v rešto i ostal je brez ministarske fotelje, a nišči ne zna zakaj? Si se spominajo o par milijončekov štere so on i pajdaši podelili, kak so rekli, svojim pajdašima. Pak, prosim vas lepo, komo boš pomogel ak naš svojim pajdašima. Ve mi je palo na pamet kak je negdašji potprecednik vlade Damir Polančec gulil državnoga kalampera mesto rešta sam zato kaj je svojim selskim labodoritašima vu svojemo Đelekovco spelal reflektore na labodoritaško igrališče. No, idemo mi nazaj na našega Darkija. Rekli smo da je završil v rešto zbog drobnih penez, a guverner HNB Vujčič i negdašji viceguverner iste te HNB, Damir Odakov, so nazobačili hajdi penez od naši sosedi Mađari (čuda vejč nek je Darko podelil) i nikomo nikaj. Ne da so ne bili niti na spominko v Uskoko ili pak Dorho nego jiv je nišči niti ne nikaj pital, a kamoli zašpotal!? No, neje to još niti se nek so se z temi „svojimi“ penezi pofalil vu svojaj imovinskaj karticaj.

Dok smo več pre državnim penezima štere smo resfrčkali moram reči kak je naša bogata država v prestečajnoj nagodbi oprostila Goranko Fižoličo i jegovoj Magmi prek pedeset milijonov kuni. I nikomo nika, još nas Fižulič vuči reda i pošteja. I unda bode nešči rekel kak mi v Lepoj našoj nemamo Farizeje?? Kaj bode na to Darko rekel?

Štel bi još nekaj pitati kak vas tak i sebe: ak Drašek Plenkovičov i jegov HDZ trdo drži vu svojim rokama cugle vlasti nejde mi v glavo zakaj so unda sam hadezeovci v rešto? Mortik ga ne v Remetinco dosti mesta za se, pak si nekaj gruntam kak bi bilo   vredo kaj se negdašja partiska politička škola v Kumrovco, štera je več na leta prazna, predela v rešte za se druge osim hadezeovce. Nek hadezeovci ostanejo vu svojemo Remetinco, a si drugi, šteri čakajo na red, bodo našli svoje mesto pod kumrovečkim soncem. Nekak mi zgledi dosti spametno kaj bodo ovi na vlasti v Remetinco, a ovi drugi (čitaj: opozicija) v Kumrovco. Tak bi bilo dosti mesta za se, pravna država bi leži dihala, a v reštima nej dohajalo do političkih svaji i podrški. Najte me krivo razmeti, ali očem sam pomoči našoj pravno državi kaj prevzeme vlast.

Poglednite napriliko, prvi šteri bodo išli v Kumrovečki rešt bodo vodeči partijci Peđa Grbinov i Arsen Baukov. Oni več na leta živijo v Zagrebo, a ruon tak, na leta, so prijavleni v Dalmaciji i kak Dalmoši dobavlajo peneze v Saboro za odvojeno živleje. Ruon tak na leta. I ve dok so se zazvedili jivi veliki i „smrtni“ (?) grehi čudijo se kak picek glisti da so bokčeki ne znali da je to ne smeti delati, očem reči, neje smeti varati državo. Kak moreš nekoga varati koga imaš rad??? Ili pak sam ja tu ne nekaj razmel kak bi trelo?  Kuliko vidimo naš Darko je mali Ivica za ove vodeče partijce.

Tak je i naš negdašji čakoski gracki načelnik Štef nejbole plačeni naš političar , očem reči, sabornik. Jempot je došel na saborsko sesijo i pobral je prek tristo jezer kuni. Kaj bode hodal i delal si stroške ak ga sikak plačajo kak da je bil i se stroške dobi kcoj k plači, a Plenki i Pupi so srečni kaj ovi v opoziciji imajo jedno roko meje. Si zadovolni v Saboro, a što nas porezne obveznike, šteri jiv plačamo, pita koga bodemo platili i kuliko. Mi davlemo peneze, q političari nejbole znajo komo jiv treba dati.

Ve vidite kak so si protiv Hajduka!!! Čim so Hajdukovci nabrali prave labodoritaše, počeli igrati pravoga nogometa i ne sam to nek so počeli i pobeđuvatimam je došlo do velikih problemov. Ovi kaj se malo bole razmijo v labodoritanje od mene velijo da bi Hajduk, posle dvajsti let, mogel, na se zadje, biti i prvak Lejpe naše. Čim se to zazvedilo mam je počel Rusko – Ukrajinski rat. Kuliko vidimo Ajduk pravzaprav nema srečo, si so protiv jega!

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE