Za reoplane znuomo, ali kuliko nas pravica pravzaprav košta?

Francoski Rafali na naši nebi…

Ovo leto za 1. maj je ne bil sam bažolj nek so ober nas, po nebi, leteli i naši novi Rafali. To so reoplani štere je kupila Lepa naša kaj bodo pazili na naše nebo, očem reči, kaj nej nekomo na pamet palo kaj bi se vozil prek naše meje brez viziperta ili pak dopuščenja. Verjem da se zmislite kak dugo smo si zbirali, mi ili pak nešči drugi (čitaj. NATO) od koga bodemo itak kupili te reoplane? Na se zadje so zebrani francoski Rafali, ali vam pravzaprav ne bi znal reči zakaj smo ruon jiv kupili? Kuliko sam mel za videti imajo malo skrčena krila pak je mortik to presudilo jerbo smo mi ipak ne tak velika država kaj bi naši reoplani mogli reširiti krila kak to nejvekši ftiči i delajo. Kaj bodem vam rekel, bilo je lepo videti kak te reoplani z našim pilotima lečejo ober nas, ali so se ne si veselili reoplanima jerbo nešterni so bili veseli kaj so došli, a nešterni so kleli se po spisko, a nejbole Plenkija i jegove ministre šteri so ipak uspeli kupiti reoplane makar so se naši levičari nadjali kak ne bode nikaj od toga. No, naša Vlada nas navek iznenadi negda po dobromo (kaj je retkeše), a negda i po hudomo. Kak bilo da bilo reoplani so nas tazveselili, ali je mam i teca Franca pitala kuliko je to koštalo i što je to platil: I još je pitala je li joj ne bode ve penzija išla doli dok moramo te reoplane platiti? Ovi na krajo potokeca pravice so mam pitali kuliko je što del v žep i je li bodo došli i oni drugi šest reoplanov štere smo platili? To bi bilo po onoj našo staroj pučkoj pesmi: zginula je pikuša z dvanajstero prasci, šest je došlo, a šest nigdar ne bo? Ali je Plenki rekel kak se i ovi drugi reoplani delajo i da bodo drugo leto prinas. Pak komo bodemo veruvali, ak ne bodemo premijero – to te ja pitam?

… a finske Patrie po zemli!

Dok so počeli spominki što je kuliko del v žep za francoske, očem reči, naše reoplane, mam so mi na pamet pale finske Patrie, oklopna vozila, štere smo kupili pred nekaj vejč od petnaest let. Oklopnjaki so došli, ali za jimi so se vlekli repi jerbo smo jiv kupili skupa z mitom, očem reči, i unda se je navelikom pripovedalo kak je nešči što je pisal narodžbenico del hajdi penez v žep. Ne bodete veruvali, ali dva Finci šteri so peneze dali našim glavnim šrajfima so završili v rešto, ali prinas v Lepoj našoj se je ne nikomo nikaj pripetilo jerbo je nišči ne priznal kak je peneze dobil. A dok nišči ne prizna nebreš nikoga v rešt zaprti. Nejvečpot se je z prstom kazalo na Stipija Mesiča, šteri je v to vreme hercuval na Pantovčako, ali dale od kazaja z prstom se je ne odišlo. Rekla je teca Franca da so mo jempot i pretepli žepe, ali so nikaj ne našli tak da so optužnica i sumnje pale v tibro. Kak veli fiškal Miška, stepali so se bregi, a vum je došel sam mišek! Ak se je nikaj ne našlo na oklopnjakima šteri se vozijo po zemli kak bi se unda nekaj moglo najti na reoplanima šteri lečejo po zrako?

Na sod, na sod

Odnegda je poznato kak so naši ljudi, očem reči, Međimorci kak god so dobri i kredni, ali furt i navek jiv je muočila pravica tak da so za sako sitnico, se i sakoga, navek dali na sod. Neje bilo retko kaj je sosed soseda tožil sam zato kaj mo je prekosil ili pak preoral mejo makar je to ne bil bogzna kakši kvar, ali nek se zna na čijoj je strani pravica i de je pravzaprav meja. Nekaj sam si gruntal, a tu je na moji strani bila i teca Franca, da so naši mladi, naša deca i naši vnuki ne takši. Mortik je to i točno, ali kuliko vidim stare šege so negdi još ostale i mesto kaj bi se ljudi spominali i dogovarjali oni odma idejo na sod. A na sodo vreme pomalem ide i jako je teško dojti do pravice, a nejvečpot zbog radi fiškalov jerbo dok fiškali zemejo stvari vu svoje roke unda je pravica na čekanjo. Kaj vam bodem rekel, meli ste priliko prečitati, kak i ja, kak so na sodo zišle Međimorske vode i jiv negdašji dugoletni direktor Jožek Zorčecov. Deset let so sakefele soci iskali pravico je li so naši međimorski vodači po pravici natirali Jožeka v penzijo ili so mo trebali dati priliko kaj si on odela tak dugo kak dugo so mo dopuščali zakoni v Lepoj našoj. Kaj vam bodem rekel: i posle deset let je zišlo kak je Jožek mel ptaf i kak so ga trebali ostajti nek još dela cirka leto dni kaj bi mo i penzija bila malo vekša. No, znate kak je to dok odide baba z kolači unda je se drugač i mora tak biti kak soci velijo. Tak i nikak drugač. Dok Jožek doma sedi i čaka kaj ga pozovejo na posel, ovi v Nadzornomo odboro se nedajo i oni bi išli dale na sod. Kaj reči, lefko oni iščejo pravico jerbo so penezi ne jivi, a nas šteri pijemo međimorsko vodo i šteri jo plačamo, i to ne ruon tak malo, nišči ne pita je li bi se mi dospomenuli z Jožekom ili pak bi i dale išli na sod. A nišči nam je ne rekel kuliko je zahuzal Vladek Topolnjakov šteri je nejpredi nasledil Jožeka v direktorskoj fotelji, a posle ga je natiral dimo, očem reči, v penzijo tak da je moral iskati pravico na sodo. Dok je Vladek odišel v puno penzijo još si je zrihtal i otpremnino dvestojezerač i unda je nišči nikaj ne rekel, a ve bodemo i dale se dali v roke socima i fiškalima. Kak se lefko igrati z ljuckimi penezi.

Morem vam reči da je teca Franca, kaj se Međimorski vodi i Jožeka dotikavle, več tri dni stiha i sam v pod gledi. Dok me se več ne mogla rešiti unda mi je sam pošepetnola nek jo ostavim na miro jerbo ona tu nikaj ne razmi. Kaj vam bodem rekel, nisam niti ja preveč vpučeni vu te sodske pravice i nebrem si mesta najti kaj sam ne vu fiškale odišel ili pak med soce!?

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE