Z dobrom volom i štiklecima protiv korone

Kak je to negda i odnavek bilo tak je to i vu ove naše dneve kaj jena nevola nigdar ne dohaja sama. Sima nam je poznato da je korona virus, šteri se je dotepel v Evropo z Kine (tak bar Ameri velijo), a k nam v Lepo našo se doteple od sih ovih naših sosedov, očem reči, z državi de naši težaki kruha služijo. Došel je z Italije, Dojčlanda, Osterajha, Dežele, a mortik i z nekih drugih zemlji kud se naši ljudi poteplejo, hodajo v šoping, na utakmice, skijanje ili pak kruha iščejo. Si, kak mi Međimorci tak i naši sosedi z Lepe naše se držimo sega onoga kaj nam naš državni stožer, a posebno minister za zdraviče Vili Beroš i policijski minister Davor Božinovič zapovedajo. To tak mora biti ak očemo kaj viroso stanemo na rep i kaj se ga čim predi rešimo i kaj nam nebo ostavil za sobom nekše velike nevole. Kak sam vam več rekel, te viros nam je prva i nejvekša nevola, a v nedelo vjutro smo meli v Zagrebo i hataro šteri je blizo glavnomo grado, potresa i to ne jenoga nek celi pušlek, par vekših i jakših, a jako čuda menših šteri so još do dneva denešjega ne hejali. Kak sam vam več rekel, nejbole se je zemlja v Zagrebo i okoli jega stepala v nedelo vjutro dok smo još si bili v postelaj i se kaj se je podrlo je bilo v nedelo. Te potresi, to je tua druga nevola štera je došla v Lepo našo. Stožer za korono nam je furt pripovedal kak nek ostajamo doma, a dok je bil potres si so pobegli vum na vulice kak je i red. Fala dragomo Božeko kaj je potres zbudil ljude pak so na vreme pobegli vum tak kaj je ne nišči nastradal, osim jene pucke na štero se greda podrla.

V minulo nedelo da je bil potres v Zagrebo je Joža Manoličov slavil svojih prvi sto let pak se spominajo po Fejsbuko, a i čakoski hucvuti pre gracki vuri, da je to zagrebečko podzemlje, očem reči Jožijovi pajdaši pod zemljom, čestitali rođendan Joži. Kak bilo da bilo, bila to čestitka ili ne, ali potres je celoga Zagreba zdigel na noge. Prosim dragoga Božeka i nadjam se da so se ovi jakši potresi zdošli i da so sam ovi slabeši ostali jerbo ovo kaj je podrto je čistam dosti za popravljati.

I to je još ne se, kak smo rekli nejpredi se je k nam dotepla korona i to z velikim nevolama za se nas, unda nas je dočakal potres, a ve je još z prtuletjom počela zima i to ne kakša god nego z vetrom severcom, mrazom i snegom. Nevoli celi kup. Kak to znamo reči v saki nevoli je i nekaj dobroga, to kaj je zima, kaj je mraz i sneg to je dobro kaj nas sunce ne vleče vum, pak leži zmagadimo v hižaj kak so nam ministri z Stožera i zapovedali.

Moram vam reči da so nejvekši krivci za to kaj se je te korona viros tuliko zapoval pre našim sosedima Talijanima labodoritaši Dinama. Verjem da ste ne pozabili kak so naši zagrebečki modri igrali v Ligi prvaka i kak so v prvomo kolu pobedili Atalanto v Zagrebo 4:0, a v četromo kolo su v Zagrebo vodili protiv Šahtjora 3:1, ali so Ukrajinci zravnali predi nek je glavni sodec otfučkal kraja. Očem vam reči da so Dinamovci pobedili na toj tekmi unda bi oni nastavili dale igrati v Ligi prvaka, a ne bi igrali Talijani i Atalanta. Verjem da ste me razmeli kaj sam vam štel reči, da nej igrala Atalanta unda ne bi niti bilo utakmice v Milano (Atalanta – Valencija 4:1), štera je igrana pred kraj februara meseca i na šteroj se je od korona virosa zarazil nejveč ljudi. Z Milana se je zaraza potepala dale po Italiji, prešla je, prek publike, v Španjolsko pak v Slovenijo, Švicarsko, Osterajh i Lepo našo. Se, no ne ruon se, ali nejvekše nevole kaj se korona virosa dotikavle so počela na labodoritaškoj utakmici v Milano. Ve vidite kuliko bi bilo meje zaraženih da so Dinamovci odišli dale, kak so i trebali, jerbo se tua utakmica v Milano opče ne bi igrala. Najbrž bi se igrala v Zagrebo, a tu prinas bi bilo čuda meje publike i zaraženi ne bi niti došli k nam. A kaj moremo ak je laboda okrogla i se je drugač zišlo kak so Dinamovci splanerali.

Moram vam priznati, nebrem vam skriti se se okoli te korone i toga jenoga virosa vrti. Z koronom se stanemo, s koronom smo po celi mili den, s koronom idemo i spat. I neje to još se, čuda je nas šteri i po noči sejamo korono. I to ne bilo kak, senjamo da smo jo pobedili, da smo jo sfondali, da smo jo pretirali, a dok se vjutro stanemo se pak ide znova. Vužgeš televizijo i kaj vidiš, nejpredi ministra Božinoviča z maskom, unda zdravoga ministra Vilija i mam nam je sima jasno da rat protiv korone još traje i kak ministri velijo još mo niti ne vidimo kraja. Si šteri nam dobro očejo nam pripovedajo kak moramo biti borbeni i dobre vole i moramo biti sigurni da bodemo i v tomo rato protiv neprijatela šteroga ne vidimo pobedili. Čuda je huncvutariji i štileci vum zišlo prek Fejsbuka, Interneta i sih drugih kanala, ali velijo v Stožero da je to jako dobro kaj se hecamo i da nas to gori drži. Ne znam je li ste meli priliko nekaj čuti ili nekaj prečitati, ali bodem vam ja napisal jeno par štikleci tak kaj bode vas dobra volja gori držala. I ne sam to, kaj ne bodete saki čas halosili vu frižider jerbo bi se vam moglo pripetiti, kak moje pajdašo Štefeko, kaj je zalihe za dva tjedne sredil za tjeden dni. Hodal je i po noči vu frižider, ali je priznal da je ne nikaj jel nek je samo pil. I morete si pregruntati kak ve lepi okrogli zgledi, kak stoliterni lagev i to on drveni.

– V minulim vremenima so naši sosedi Zagorci kajkaj toga preživeli: feudalce, ratove, betege, krize…, ali ne verjem da bode zapiranje krčmi sam tak prešlo?

– Vladek Šeks je zapretil Plenkijo: Kaj ti ne bo palo na pamet zaprti krčme!

– Fčerašja obavijest Glavnog protiv korone stožera: Pazite kaj kupuvlete…, v štacunima se je pojavil lažni šekret paper!

– Ak of korona viros pravzaprav dojde v Zagreb grad, zarazil bo pol Hercegovine!

– Ovoga korona virosa so najbrž zmislile žene:

  1. a) sam moški hmirajo
  2. b) ukinoli so nogometa
  3. c) nesmeš iti v krčmo
  4. d) moraš furt biti doma s ženom

– Bosanski Stožer je obavestil naše študente: “Od zutra se več ne prodavlejo fakultetske diplome do daljnjega! Što je kupil, kupil je!”

– Zavod za javno zdrastvo nam oče reči: “Osim kaj si redovito perete roke ne bi preškodilo kaj bi se negda i skopali…”

– Međimorski znanstveniki so zazvedili i sima dajo na znanje: deci žganice na den ne sam da je jako zdravo, nek je i čuda premalo…

– Spituvlejo žene po Fejsbuko: Je mortik štera sprobala je li se more viagra deti v testo? Nigdi nebrem kupiti kvasa!

– Spominajo se moški: Kaj bo ak zaprejo mesnice i štacune z jestvinom pak bodemo morali iti v lov? Ja, niti ne znam de čevapi živijo!

– Draga navučitelice, fčera je naš Štefek ne bil na sato biologije, mamica je gledala “Ljubav na selo” i neje dala televizijo niti za živo glavo…

– Pripoveda se da so si Francozi nakupuvali hajdi vina i ris gumici, a mi pak meljo i šekret papera. Nigdar mi ne bomo gospoda.

– Tri pot sam več spal i šest pot jel, a još je denes!

– Donald Trump, američki precednik, je zazvedil da je vrag zel šalo: To z korona virosom je ozbiljno. Denes hmirajo ljudi šteri so nigdar predi ne hmirali!

– Da smo ne na vreme vništili gospodarstvo ve bi meli ogromne gubitke!

Ak se v kuhji kuha, v spavaonici spi, kaj se dela v karanteni??? Sam pitam?

– Vidite kak vreme v karanteni fletno ide, fčera prtuletje, a denes več zima!!!

– A nišči mi je ne veruval da bom se v korizmi odrekel krčme!?

– Na se zadje so ipak počeli štrofati se one šteri so ne za dom spremni!

– Denes sam del v sako hižo po jeno flašo vina. Zutra idem od krčme do krčme.

Ostavi komentar