Za se žrtve grada heroja Vukovara
Ne znati kak bode ovo leto zgledala Kolona sječanja vu našemo grado herojo Vukovaro 18. novembra, na državni svetek, da molimo za se one šteri so svoje živote položili na oltar domovine za slobodno i neovisno Lepo našo v šteroj mi denes živimo, a posebno za žrtvu Škabrnje i Vukovara. Sako leto predi Kolone sječanja vu Vukovaro so spominki što bode došel vu Vukovar, što bode v Koloni sječanja išel od vukovarske bolnice do grobja, a nejglavneše od sega je što bode išel prvi, očem reči, što bode predvodil Kolono sječanja. Za ovoletošjo Kolono je vukovarski gradonačelnik zebral HOS-ovce kaj bodo na čelo kolone jerbo so oni navek bili prvi 1991. leta da god je trebalo, a več hajdi dugo se jiv rivle na začelje sih kolona, kak vu Vukovaro, Škabrnji kaj ne bodemo Knin spominjali jerbo tam niti nebrejo dojti na obilježavanje godišnjice Oluje jerbo je Milči Pupovac protiv toga, a kak je on, več hajdi dugo i član naše Vlade jega se posluša. Sima nam je poznato zakaj Hosovci imajo te probleme? Zato kaj na svojim ratnim opravama nosijo staroga hrvackoga pozdrava ZDS, a te pozdrav Milčijo i jegovim četnikima nejbole oči krade. A oči jim krade jerbo so četnike naši braniteli pobedili vu Domovinskomo rato z tem pozdravom na odorama i z krunicama okoli šijaka. Vukovarski gradonačelnik, preštimani gospon Ivek Penava, je sa svojim grackim ocima odlučil kaj se bodo ovo leto dostojno zafalili Hosovcima za se kaj so v rato naprajli za Vukovar i za se kaj so dali za Lepo našo tak da bodo oni ovo leto na čelo Kolone vu Vukovaro. Zaslužili so kaj se jim još jempot Vukovar zafali: prvi so bili 1991. leta, a prvi bodo i 2023. leta.
Ne znati kak bode ovo leto vu Vukovaro zišel Milči Pupovac jerbo kuliko nam je poznato Milči je sako leto dohajal, ali ne kaj bi dal počast poginulim hrvacim braniteljima na Vukovarskom bojišto nek je došel z svojim četnikima i hitil je vence v Dunav za se stradale četnike. Došel je tuliko kaj je dolejal soli na rano preživelim hrvackim branitelima. Največpot je došel jeden den predi kaj je zbegel sudionike v Koloni sječanja. Jako sam najgerek, kak bode to zišlo ovo leto jerbo mo se je zagrozil sabornik z Domovinskoga pokreta Stipe Mlinarič da več ne bode dopustil Milčijove provokacije z vencima na Dunavo. Milči je član hrvacke Vlade i moral bi poštuvati se one žrtve štere so pale z samostalno Lepo našo tem predi kaj so on i jegovi četniki tomo krivi. Oni so šteli porinoti granico bliže zapado na linijo Virovitica – Karlovac – Karlobag i zbog radi jiv je rat trajal štiri leti i zbog radi jiv je palo nekaj vejč od šesnaest jezer ljuckih žrtvi.
Što se more dojti vu Vukovar?
Lepo je vukovarski gracki načelnik Ivek Penava rekel kak vu Vukovar na Dan sječanja morejo dojti si ljudi šteri očejo. Dok se je oglasil sabornik Stipe Mlinarič i rekel kaj si on grunta o Milčijovim vencima v Dunavao, mam ga je poklopil esdepeovec Peđa Grbin kak je Vukovar grad sih građanov Lepe naše i si morejo dojti i si morejo odati počast. A lepo mo je otpovedala Marija Selak Raspodič, Mostova sabornica, kak je to sječanje na stradanja hrvackoga naroda, a ne za one šteri so došli vu Vukovar z tenkima i šteri so razrušil hrvatski grad na Dunavo tak kaj je ne ostal niti kamen na kameno, a svoje živote vu tom trimesečnomo rato je dalo cirka 3000 branitelov i civilov. Zaslužili so kaj jim se zafalimo bar jempot na leto i to sim stradalima od Trpinske ceste, prek Semišča, Vojarne, Mitnice, Vodoturna, Bolnice, Ovčare, Borovo comerca…. i sih četničkih logora!
Nega mira v Palestini, a niti v Izraelo
Na Bliskomo istoko pak je došlo do nove svaje izmeđo Palestincov i Izraelcov. Tam se plamen rata sako malo znova vužge. Tak je bilo i ovo leto dok je Hamas napal Izraelce na velikoj fešti i tu je stradalo cirka dve jezere civila, a med jimi žene i deca. Ne sam da so nastradali nek jiv je Hamas hajdi odvlekel v Gazo kak svoje taoce. Neje dugo trelo i Izrael je genul prema Gazi kaj oslobodi svoje taoce, ali ne sam da oslobodi nek i gazi se pred sobom. Kuliko smo zazvedili Hamas se neče pomiriti z Izraelom i oni očejo kaj Izrael i Židovi zginejo z ovoga sveta jerbo, kak velijo Hamasovci, drugač ne bode mira na ovomo palestinskomo hataro. Teško mi to se pratimo kaj se tam događa, ali vidimo da ga mira nega i kaj se mira dotikavle (ili bar primirja) se ne vidi svetlo niti na krajo tunela.
Javila se naša stranka Moremo i jiva sabornica Sandra Benčič i išče od naše Vlade kajbi se izborili za prekid rata i kaj bi se otprla istraga protiv sih šteri so vu tomo rato (Izrael–Hamas) naprajli ratne zločine protiv civilnoga stanovništva. Ne gruntam si da je to nekaj hudoga sam znuom da so od pada Vukovara do denes minule 32 leti, a od kraja našega Domovinskoga rata i Oluje je minulo 28 let i još je nišči ne odgovarjal niti za jenoga civila nastradaloga vu tom štiriletnom rato, a stranka štera se More, a niti pak sabornica Sandra Benčič je nigdar ne iskala kaj bi se poiskali si oni šteri so ratne zločine nad civilima delali vu našemo Domovinskomo rato.
Zakaj so si protiv zagrebečki modri?
Si znuomo kak so Dinamovci prešli v Konferenciskoj ligi protiv češke Viktorie, znuomo da so zgubili nejpredi v Zagrebo, a posle i v Češkoj. Zgubili so 1:0 i prinas doma i v Češkoj, a Čehi so zabili obedva gole z elverov. I to kakših elverov? Elvere štere je sam sodec videl. V Zagrebo so Čehi tirali labodo fkrej od gola i jen je igrač opal, a sodec je mam pokazal na elver, a da je ne niti z okom trepnul. Elver šteroga čovek ne bi niti rođenomo brato dosodil, ali ak sodec zna kak utakmica mora ziti unda z čistoga mira dosodi elvera. Neje niti VAR-a nucal. Ne isto, ali još huje je bilo v Češkoj. Tam je elvera dosodil grkljanski sodec i to tak kaj je ne niti z okom trepnul. Posle je dosodil elvera i za Dinamo, ali dok je išel pogledati na VAR televizijo unda so mo tam rekli da je to ne elver pak ga je poništil. No, to neje bilo se, posle je Dinamo zabil gola i pak so ga ovi z VAR-a poništili jerbo je bil opsajd. Nam so pokazali da je Ristovski bil jeden milimeter v opsajdo i da gol ne vredi. Kaj jim to znači kaj je pravica na tvojoj strani, a zgubili so obedve utakmice. I unda bode nešči rekel na UEFA i Čeferin nemajo tu svoje prste?
