Ve bodo si zazvedili da so Luka Modrič i „Kockasti“ nejbolši

Međimorsko biračko telo ga je ne prepoznalo

Minoli so izbori i za, kak se to lepo po štacunski veli, europarlamentarce. Malo je oni štero so meli za kaj feštati v nedelo navečer dok so se zaprla birališta, a čuda vejč je bilo oni štero so se nadjali da bi mogli biti zebrani, ali se je to ne pripetilo. A neje se pripetilo jerbo je prek preveč bilo oni šteri so šteli prek biračkoga tela dojti do velikih penez z jene strane, a z druge strane premalo je bilo oni šteri so došli zbirat tak da se je na hajdi mesti pripetilo da ga vejč bilo oni napisanih nek oni za stolom šteri so zbirali. Na listeko z našim županom Matijom Posavcom je bil i sabornik Milči Pupovac, a on je bil tak dobro zamaskerani (tijam na dvanajstomo mesti) kaj ga je naše međimorsko telo niti ne prepoznalo. Dosti naši biračov ga je niti ne vidlo kaj je bil na listeko makar se je slikal na Mađerkinomo brego. A kaj se čudite, pak niti teca Franca je ne vidla kaj Milči ima željo za Evropom, očem reči, za Briselom. Morem vam reči da je i meni te Fer plej listek, ruon tak, bil malo čuden jerbo nikak mi je ne išlo v glavo što je tu koga trebal vleči: je li ovi gori one doli ili pak oni doli ove gori? Ili pak jeni druge? Nekak mi je zgledalo da se niti jenomo od sih teh na listeko ne išlo v Brisel jedino se je Valter Flego nadjal da bode dobil još jenoga mandatlina, ali, kuliko smo vidli neje mo se posrečilo.

Zagrebečki purgeri so srečni kaj so potpali pod Međimorje

To več si znajo, o tomo se spominajo žene na čehari i mlekari, a o tomo več i vrapci žlabrajo po drevima i krovima, a to je kak se bodo ovo zimo zagrebečki purgeri greli na međimorski plin. Si znajo, a posebno so zadovoljni zagrebečki purgeri kaj so potpali pod međimorski plin, očem reči, Međimorje plin. Najme kaj, dvapot so Zagrepčanci respisali natječaja kaj so iskali na čiji se bodo plin greli i obedvapot je naš Neno Hranilovičov (direktor Međimorje plina) pobedil Tomeka Tomaševiča prvoga čoveka purgerov i Zagrepčancov. Ve je zišla istina na svetlo dneva, a to je da je ne istina kak Tomek i jegovi kompiči se MOREJO nek je istina kak oni nikaj nebrejo. Zagrebečki purgeri so srečni i zadovoljni kaj se bodo faleše greli na međimorski plin jedino Tomek nebre spati jerbo so mo Međimorci zeli glavnoga posla tak da bodo ve nejvekši penezi iz purgerske kase išli k nam v Međimorje. Mortik je Tomek kanil kuriti pol zime z smetjom štero se kupča pred sakom malo vekšom hižom i otkak je Tomek zeli cugle zagrebečke vlasti vu svoje preštimane roke več je Zagreb ne bela, očem reči, čista varoš.

Nikaj se ne čuje, da bode Lojzek Stepincov dobil spomenika?

Več je dva mesece minulo otkak so Čakovčanci i Čakovčanke davali glase za to je li bode Lojzek Stepincov dobil svojega spomenika v Čakovco kak bi to šteli dečki i puce v Zrinskoj gardi, Čakoskoj matici hrvackoj i međimorska Družba Brača Hrvackoga Zmaja? Brzčas je več dosti cajta minulo i što god je brojil glase več je to mogel sto pot naprajti. Otkak Čakovec ima svojega Grada to je bilo prvič kaj so Čakovčari morali davti glase za spomenik šteri se oče v grado postajti. Do ve je navek bilo tak kaj so to vu svoje roke zeli gracki oci ili pak gracki večniki, a brzčas je Lojzek nekaj posebno čim je napravlena anketa. Prosil bi lepo gospođo gradonačelnico nek nam lepo sima reče kak je Lojzek zišel med Čakovčankama i Čakovčancima. Kak to dugo traje bode si još nešči pregruntal da se tu nekaj skrivle?

Kaj bo z hižicama na Dravi pre Kuršanco?

Sako malo nešči pita kaj bode z hižicami na Dravi, očem reči, na jezero polek Drave vu Gornjemo Kuršanco. Ne tak zdavnja so na dnevnomo redo bile i hižice na Priločkoj Marini, ali kuliko se vidi i nikaj ne čuje tam je to ipak nekak sređeno. Što je i kak sredil o tomo se nigdi ne spomina, bar ne preveč na glas. Ali Kuršanec je nekaj drugo, tam se još navek dela kak negda zdavnja na Divjemo zapado jerbo zemljo more dobiti i kučico deti sam on šteri prvi dojde jerbo nega dosti placa za se. Znate kak je to, de ga dosti za se tam nišči neče, a dok se nakj dela po skrivečki unda to ljude vleče. Ili pak ak sosed ima svojega falačka na Dravi unda očem i ja svojega. Kak god maloga. Na Dravi v Kuršanco se zna čija je zemlja, zna se čija je voda, čija je struja, čije so kučice sam nišči ne zna čiji so itak komarci. A nigdar ga ne bilo tuliko komarci i nigdar so ne tak pikali kak ve dok so inšpektori poslali naloge za rušenje kučici. Kak da prosijo inšpektore nek ne otirajo ljude jerbo ne bodo meli koga pikati. Kuliko vidimo saki se bori za sebe!?

Zlatko Dalič zna kaj očemo od jega i kockastih

Denes bode hapilo Evropsko labodoritaško prvenstvo i to v Dojčlando. Zna se da so tam i naši labodoritaši, naši kockasti, a mi objektivni kibici, kakši smo več je, čekamo od naših da bodo nejbolši jerbo otkak je Zlatko Daličov zel vu svoje roke cugle vlasti vu laboritaškoj reprezentaciji mi smo furt med nejbolšima. Ne ruon nejbolši, ali prvi do nejbolših: bili smo drugi na sveto, pak unda tretji, a lani smo bili drugi v Evropi. Za ovo prvenstvo v Dojčlando smo se jako dobro preprajli, a predi nek smo genuli prema Dojčlando, prema Berlino de igramo prvo utakmico i to z Španjolcima, šterima smo hajdi toga dužni i kanimo jim ve tu zeti mero, pobedili smo Makedonce prinas doma i Portugalce v Portugalo. Makar oni šteri nemajo radi Daliča i kockaste brundajo kak je za Portugalce ne igral Kristijano Ronaldo, a Makedonci so igrali bez Aleksandra Makedonskoga, ali nek se zna: pobjeda je pobjeda. Več se ve zna da bodo naši kockaste v Dojčlando meli nejveč publike, a po tomo bi unda morali i naši Vatreni biti nejbolši. Ali kaj ne bodo zišli kak Hajdukovci šteri so, ruon tak, meli nejveč publike. No, kockasti so navek bili nekaj drugo, pak niti ve v Dojčlando ne bode, najbrž, drugač!

Nemci denes igrajo svojo prvo utakmico na EURO 2024. protiv Škocke, a svojo zadjo utakmico bodo igrali za mesec dni, vu finalo, protiv kockastih i Lepe naše. Kaj ne bodete rekli da sam vam ne rekel!

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE