Nebrem veruvati da se prinas v Lepoj našoj ne zna je li imamo viška ili pak manjka cjepiva protiv korone virosa. Z jene strane cjepivo fali jerbo so redi šteri čakajo kaj bodo vcepleni jako veliki, a na drugoj strani imamo sakefele padobrancov šteri so naleteli na cjepivo štero je bilo viška i unda so jiv doktori nagovarjali, kaj nagovarjali, nek prosili nek se cepijo kaj cjepivo nej potkvar došlo. Najte me krivo razmeti kak mi vu toj Lepoj našoj ne znamo kuliko cjepiva imamo i je li nam fali ili pak imamo preveč. Ne verjem da so nam ovi Fajzeri, Rusi, Norvežani, Kinezi poslali gešenk par logožari cjepiva i to sam zato kaj bodemo mi prinas zdelavali kajkakše huncvutarije. I još nekaj, kak morejo doktori meti viška cjepiva? Ak na kutiji piše da ga nutri deset nekciji unda ga najbrž i deset je, ali ak naši doktori, kakši so več maheri je, z te deset nekciji vcepijo jedanaest ljudi unda so negdi nekoga fkanili, očem reči, nešči je dobil meje nek je mera. To vam je tak kak pre šankerici Bariki, štera ima šestico korpice, i natoči pijančekima na šanko deset gemištov z liter vina i nišči ne gomba jerbo ak dečki na šanko slabeše gemište pijejo duže so i v krčmi. Pustimo krčmo, pustimo reshitano šankerico Bariko i idemo nazaj na antikorona cjepivo. Tu me ve nekaj gvinta, je li bodo te inekcije, štere so malo menše ili malo slabeše, dosti kaj ne bodo pustile korona virosa vu naše telo? Najbrž mi to ve ne bode nišči znal reči, a do kraja leta se bode se znalo ak nam ne bode prekesno. Kaj vam morem reči, zapišite se za ceplenje, stanite v red i čakajte, veli minister da bode dosti igli i cjepiva za se. Pak smo ne na to došli kaj ne bodemo ministro veruvali.
Kaj se je pripetilo minuli tjeden. Odišla je Vedrana Rudan, novinarka i v Beograd i tam se je dala vcepiti. Nebrem razmeti zakaj se si čudijo kaj je odišla v Beograd, pak saki ftič leti vu svoje jato. No, to je ne se, ne sam kaj se je vcepila v Beogrado i tam so, kak ona veli, jo čakali. I ne sam to, cjepivo je za jo bilo tam prepravleno, očem reči, cjepivo jo je čakalo. Ak je ona još navek ne počela živeti v Lepoj našoj nek živi v negdašjoj državi unda je nekak čistam normalno da i tua ide na cepleje. Dok čovek ne verje državi vu šteroj živi i kruha služi unda nebre veruvati niti doktorima je li jo bodo vcepili s dobrim cepivom. A čim se je cepila z ruskim cepivom v Beogrado mam je dobila v jenaj našaj dnevnaj novinaj dve stranice. Kam bi došle novine i kak bi bile debele da bi saki šteri se cepi ili vcepi protiv korone dobi sam pol stranice.
Par dni posle Vedrane v Beogrado se je dal vcepiti i Čiro Blaževič. Ne znati kak je on odišel v Beograd, pak je tam nigdar ne bil trener? I ne sam to, zebral si je rusko cjepivo, a nigdar je ne bil trener niti vu jenomo ruskomo klubo. Ve vidite kaj korona ili pak strah od korone dela od ljudi? Dojde tak čoveko, vjutro dok se stane, želja kaj bi toga dneva bil vcepleni i unda ne bira niti vreme, niti mesto, a niti pak cjepivo sam kaj bi mo se želja spunila. A kaj bomo rekli, Čiro je odnavek bil malo na svojo roko, ali je i on dobil jeno stranico v našemo malomo dnevnomo cajtungo.
Verjem da ste čuli kak se je nejpredi šepetujilo, a ve se več pripoveda na glas kak je on šteri se cepil z ruskim cjepivom dobil Putina (napriliko Čiro), on šteri je vcepleni Fajzerom dobil je Bajdena, on šteri je vcepleni Astrazenicom dobil je Makrona… Kuliko sam mel za čuti i naši sosedi z Osterajha so počeli delati svoje cjepivo i što bo se cepil žjiim cjepivom dobil bo Kurza.
Ve dok se mi svadimo što je cepleni po redo, što mimo reda, što prek reda morem vam reči da sam včera v parko videl mlado dečka kaj se sam vcepil, ali vam ne bi znal reči je li je to bilo po redo ili pak prek reda.
Zišla je na svetlo dneva „istina“ kak so se negdašji precednik Lepe naše Franjo Tuđman i srpski precednik Slobo MIloševič dogovarjali kak bi se negdašja država Juga restepla na sastavne falačke bez rata. Dok so spominki išli več krajo dospomenuli so se kak se bodo našli na granici između Lepe naše i Srbije. No, do skončaja je ne došlo jerbo je Tuđman čekal Miloševiča v Zemuno, a Slobo našega Franceka v Karlovco.
Pitam vas pitam kaj imajo zajedničko beli Zagreb grad, grad Vukovar i međimorska nejvekša opčina Nedelišče. Pitanje za milijon kuni, a več nemate niti jenoga đokera. Ne kanim vas preveč močiti, dosta vas je doli hitila korona, pak vam bodem rekel kak so vu ta tri mesta respušteni ogranki SDP-a. Novi precednik esdepea Peđa Grbin kani restirati se one (socijal)demokrate šteri ne mislijo kak on. On nam je lepo pojasnil da je partija jakša ak si v joj mislijo kak jeden, očem reči, kak on i to bo tak, ne se zna, dok sam glavni ja! Tak je bar Peđa rekel, a jegova se ve posluša. Najbrž je i on demokracijo študeral pre Klasičo ili pak Jakovini!?
Lepo našo furt držijo na oki i furt jim nekaj smeta ili jim je nekaj ne prav. Dok je mito i korupcija vu pitanjo Lepo našo je ne muoči nikak zbeči i dok so v Briselo delali lojtrico štera država je v Evropi nejbole korumpirana Lepa naša je zavzela visoko drugo mesto. Bili bi mi nejbolši, prvi, ali so nam sosedi dali mito kaj jiv prepustimo.
Več duže od tjeden dni je v Lepoj našoj je malo bole zima nek smo navčeni. Morete si pregruntati kak je bilo zima prinas ak mi je voda v pumpi na vrto zmrzla? Nadjam se da je zima dosti stisnula i da se bodemo uspeli rešiti smrdlivih martinov, šterih je lani bilo vejč nek Turaka pod Sigetom. A znate kakši so martini? Sikam se rivlejo kak robača v rit, a smrdijo da je ne za povedati. Sa sreča kaj sam ne mel hudo korono jerbo unda ne bi niti zavohal kaj martini smrdijo!
