Dok so, pred mesec dni, svecki labodoritaši hapili svojo maratonsko trko za sveckoga prvaka bile so v Kataro 32 reprezentacije, štere so se tri leti prepravljale, prek kvalifikaciji, za to svecko labodritaško prvenstvo. Med jimi so bili i naši Vatreni, a ve so v Kataro ostale sam štiri reprezentacije, med jimi so, kak verjem da znate, još navek naši Vatreni i oni bodo, zutra v soboto, igrali z labodoritašima Maroka kaj se zazvedi što bode tretji na sveto i što bode osvojil tretje mesto i dimo nesel brončano želencijo, a što pak bode četri i dimo išel z drvenom želencijom. Naši kockasti dečki so odigrali v Kataro več šest utakmici i dimo so poslali Kanađane, Belgijance, Japanere i Brazilce, a nas so na poto prema zlatnoj želenciji zastajli Argentinci i sodačka mafija, tak da ve bodemo igrali z labodoritašima Maroka, i to zutra odvečer, za brončano želencijo.
Bili smo čistam blizo kaj bi bili pak došli vu finale i igrali protiv Francozov, kak i pre štiri leti v Rusiji, za zlatno želencijo, ali so se labodoritaški soci i „plaftaši“, šteri gospodarijo z sveckim labodoritanjem dospomenuli drugač i naši Vatreni so „morali“ zgubiti od Mesija i Argentincov. Se je bilo vredo dok so igrali Luka Modrič i naši Vatreni protiv Mesija i jegove škvadre, ali dok je taljanski sodec Orsato zel stvar vu svoje roke i dosudil elvera, šteroga je samo on videl (neso ga vidli niti oni vu VAR-o) voda je genula na mlin Argentincov tak da so nas Argentinci sprašili 3:0 i poslali nas v borbo za tretje mesto. Neje niti to nikaj hudoga sam je ne lepo kaj o tomo odlučivle nešči drugi, a ne labodoritaši, jerbo talijan Colina, šteri je bil sodec ober sih socov je z naftalina zvlekel Orsatija kaj bode sodil naše polufinale i kaj je jako dobro pazil kaj nej pobedil bolši nek on šteri mora. Kaj je baba senjala (čitaj: sodec) to se je i pripetilo.
Medalja je naša
To kaj so nas Argentinci pobedili 3:0 so nam sam vrnuli ono kaj smo mi jiv v Rusiji tak pobedili. Ali mi smo jiv pobedili v grupi i poslali smo jiv dimo tak da so ostali i bez drvene medalje, a kaj se nam v Kataro nebre pripetiti. Naši Vatreni bodo sikak dimo išli z jenom medaljom i to ak ne svetlešom unda z drvenom. Pred štiri leti so drveno medaljo osvojili Englezi i jako so se štimali.
Ne moram vam reči da so si oni v Lepoj našoj, šteri ne drukajo za naše Vatrene, več drugi den Kak smo zgubili od Argentine mejali trenera Daliča i reshitavali so se z našim labodoritašima kak z nekšom škart robom, kak s zmazanaj krpaj, a naši dečki so v Kataro još ne rekli niti zadjo reč. Si oni šteri nikak nebrejo pozabiti našo negdašjo Jugo drukajo ne tuliko protiv Vatrenih nek so protiv kockastih. Ne sam da drukajo doma med svoje štiri zide nek se pušejo po cajtungima, portalima, Fejsbuko, Istagramo i kaj nem dale nabrajal. Kak da smo mi jako najgerek kaj si oni šteri se ne razmijo vu labodoritanje premišlavlejo o našim kockastima i Daličo.
Morem vam reči da se je i Vedrana Rudan, leva kolumnistica štera se nejbole zna i šteroj je nejlepše v Srbiji, ruon tak javila kaj nam nekaj reče o Tuđmanovoj Lepoj našoj, našim Vatrenima, očem reči, našim kockastima. Kaj bi mi bole razmili kaj nam ona oče reči o labodoritanjo započela je svoje premišlavanje med nogami. Jen čas se je motala med moškimi nogami de so dve loptice i „bezbol palica“, a na se zadje je odišla med ženske noge. Tam je zabila gola, došlo joj je milo tak da je tam i svršila. I to kratko i jasno: se je čuda bole dok se dobro svrši. Kuliko vidimo v to se razmi, a v labodoritanje čuda, čuda… meje. Med moškimi nogami je centarfor šteri se zabivle v gole tere žene nosijo na isti mesti. Ak je i od Rudanice preveč je.
Ovo svecko labodoritaško prvenstvo nam je pokazalo da mi v ovoj Lepoj našoj imamo još hajdi oni šteri i posle nekaj vejč od tridesti let, kuliko imamo Lepo našo, još navek živijo v Jugi i nebrejo jo nikak pozabiti. Još navek mašejo z negdašjom zastavom i reshitavlejo se s zvezdama petokrama i drukajo protiv Luke Modriča i naših kockastih.
Prepravlja se doček naših Vatrenih i to v nedelo odvečer v belom Zagreb Grado. Najgerek sam, jako sam najgerek što bode delal programa, kak to bode zgledalo. Što bode popeval, a što bode govore držal, a nejveč sam najgerek što bode itak ve ištekal strujo dok bode Tomson popeval „Geni, geni kameni…“ Pravzaprav sam štel reči kak smo niti posle štiri leti ne zazvedili što je prerezal drote dok so naši kockasti donesli srebrne želencije z Rusije???
Zakaj se zebre delajo v kmici???
Prelojsal sam celoga Čakovca od severa do juga, od istoka do zapada i seposod sam našel zebre v kmici. V kmici so zebre z ove strane štreke i onkraj štreke. Nejpredi sam si gruntal da to tak mora biti, ali sam videl da po drugim gradima, opčinama i selima svetijo svetla, i to ona nejjakša ober zebri. Znate kaj so to zebre? To so vam one crte po cestaj de oni šteri hodajo pešice morejo iti prek ceste, a kaj jim se nikaj nesme pripetiti. Vidite, zato nebrem razmeti zakaj se i ovi v Čakovco ne pobrigajo kaj bi i ober čakoskih zebri bilo svetlo tak kaj se pešakima nej pripetilo nikaj hudoga. Zima je več dugo z nami, a žnjom so došle raneše kmice (dnevi so čuda krajši) kaj ne bom megle niti spominjal.
Minuli tjeden sam se pelal za jenim stranjskim autom, no neje bil ruon stranjski nek z Dežele, ali so nam i oni stranjski jerbo so nam ne vrnuli naše peneze z Ljubljanske banke, i na glavni čakoski zebri (pre Županiji) je Janez naglo postal. Nesam vam rekel kak je bilo kesno odvečer, ruon se je počel mrak loviti, a i sprižđelo je. Rekel sam vam, Janez je naglo postal i to z prvim kotačima na zebri, a dok sam došel blizo videl sam kak je zbegel kaj je ne zahačil starešo gospođo, štera je išla prek ceste i to z mamrelom. Ne moram vam reči da je bila v črnomo kaputo i sam dragi Božek je pomogel kaj jo je ne podral i kaj se je ne nikaj hujšega pripetilo. Očem reči, da treba nametati nove friške žarulje, ve imamo i reflektore, imamo i led rasvjeto, štera jako malo struje nuca i prosil bi se one šteri to morajo naprajti nek to napravijo predi nek nešči nastrada. Rekel sam več, zima je, megle so, a i glaži na autima so bar malo zahukjeni pak bi štel kaj se nej nekaj hudoga pripetilo. Nebre naš dragi Božek biti seposod i navek!
