Ovo več drugo leto za redom kak živimo z koronom ide pomalem svojemo krajo i si se prepravljamo za Božič, a unda i za novo leto i nadjamo se da bode čuda bolše od ovoga štero otpravljamo. Nejpredi se najdjamo da bode zdraveše od ove dve minule štere smo pregrmeli z maskama na gopcima, doma v karantenama, a nejhuje je bilo onima šteri so par dni bili i na respiratorima. Naša Vlada, očem reči, Vlada RH se ruon tak prepravla za novo leto, hajdi je toga dela pred sebe kaj kani drugo leto naprajti. Mi Međimorci smo bili najgerek kuliko penez kani Vlada potrošiti za Međimorje naše malo. Več hajdi dugo nam obečuvlejo fletno ,štreko od Čakovca do Zagreba, ali kak i čuda pot do ve stepali so se bregi a vum je zišel miš, tak smo ve zazvedili da bode tua fletna štreka, ali stopram za deset let. Što živ, što mrtev, rekla je teca Franca. Ona zna da se toga nebre fčakati jerbo bi unda bila stareša od Manoliča. Kak je to bilo lepo čuti kaj bode na hrvatski sever došlo nekaj vejč od petnaest milijardi kuničov, ali kak si znuomo hrvatski sever je dosti veliki falat Lepe naše i dok smo to malo bole spregledali kaj naši ministri planerajo unda smo zazvedili da bodemo mi Međimorci herbali od Lepe naše nekja meje od milijarde. Nebrem reči da je teh prek osemsto milijonov kuni mali penez i da se z temi penezi more jako čuda naprajti, ali kuliko sam videl Nedeliščanci so prosili zaobilaznico jerbo jo nejbole nucajo, a dobili bodo novo pučko školo. Brzčas so Nedeliščanci deco delali fletneše nek druge međimorske opčine i ve jim fali škola. Ne znati kak stojijo s zabavištima i je li tam imajo dosti mesta. No, nekaj se je genulo z mesta, ali zaobilaznico bode tre čim predi naprajti kaj se bodemo mogli fletneše voziti črez Nedelišče.
Makar se je korona šepurila na se strane, betežnikov ga bilo nejvejč do ve, ali Nedeliščanci so ne mogli zdržati i naprajli so božičnoga koncertlina i to 22-drugoga po redo, sam lani je ne bil i lani je korona pobedila. No, ovo leto so korona pasoši zvlekli koncertlina jerbo so na koncertlin došli sam oni šteri so meli korona pasoše. A si drugi ga bodo mogli gledati na televiziji. Morem vam reči da si oni šteri so meli viziperte pak so mogli dojti na koncertlin so srečni ljudi jerbo je to bil jako dober, ak ne i nejbolši koncertlin do ve. Branimir Magdaleničov je na kup nametal mužikaše, bandiste, pjevače (stare i mlade), plesače i se je štimalo kak singerica. Sa je sreča kaj je korona ne bila pozvana, pak je se minulo onak kak to naš državni Stožer, šteromo več nišči nikaj ne verje, zapoveda.
Sejeno je tua korona malo čudna , očem reči, malo na svojo roko. Nigdar čovek ne zna de bo jo zišel i kakše je vole dok jo zidemo. Ve poglednite na priliko kak vam je to prinas doma. Kak si znamo i kak nas stožer vuči doma žena i ja ne moramo nositi maske. Dok idemo v cirkvo tam si moramo deti maske tak dugo dok ne dojdemo vum. Posle meše idemo v kafič na kavo i tam ne nucamo maske makar ga tam vejč ljudi nek v cirkvi. Dok spijemo kavice i fraklece, kak je red, unda idemo v štacun i tam si pak moramo naheznoti maske. Od štacuna do mesnice maske nosimo v rokaj, ali dok idemo nutri pak se moramo skriti. Dok smo se nakupuvali odišli smo pak v kafič na okrepo i to bez maske. Predi nek smo genoli prema domo morali smo još v apoteko po nekše lekece, jerbo denes je nišči ne čistam zdrav, ali niti to je ne prešlo brez maske. Ve vidite kuliko pot si čovek (a i žena ruon tak) mora metati masko i jemati je doli i kaj se unda čudite kaj se gumice razhlebenčejo?
Verjem da si znate kak je minulo soboto vužgana i zadja, očem reči, četrta sveča na adventskomo venco kaj znači da nam je Božič več ne pred vratima nego na vratima. Još par vur i mali Isusek bode poranjkal na naša vrata (čitaj: srčeka). Denes je Badnjak, a odnavek je na Badnjak bil post i nemrs, kaj bi rekli da se je ne nikaj mesnato jelo, a i jelo se je sam jempot na den, a kak so naši ljudi bogoboječi čuda jiv još dendenes na Badnjak posti tak da se denes nemate kaj motati okoli štadnov z klobasima, pečenicaj ili pak cvirkima, jedino z čem si morete omastiti mustače so naši domaći langoši ili pak dalmoški dotepenci fritule, a se drugo, se dobrote i finote dohajajo na stol posle polnočke ili pak vjutro posle meše. Kaj ne bodete rekli da sam vam ne povedal kakši je red prinas v Međimorjo.
Prepoveda se na čehari med domačimi ženami: Odišle so dve plavuše v šumo po bora za Božič. Dugo so ga ne mogle najti, pak je na krajo ova malo stareša rekla: A kaj Štefa da sam zememo ovoga jenoga ne okinčenoga?
Kak političari tak i gospodarstveniki na krajo sakoga leta podvlačijo crte da vidijo kak so posluvali ovo leto štero pomalem odhaja v ropotarnico povjesti. Tak smo i zazvedili kak kompanija Tehnix z Doljnjega Kraljevca jako dobro posluje. Ne sam kaj se širi i kaj je sako leto se vekša i vekša nek povečavle broj težakov, a i plače furt rastejo kaj se ruon ne bi moglo reči za se fabrike ne sam naše međimorske nek i one v Lepoj našoj. Kak se Tehnix širi, ve ima deset fabriki, a i kak gazda Tehnixa, gospon Đuro Horvat, veli još ima hajdi toga na pameti tak da ne znati je li bode Kraljevec dosti veliki, očem reči, je li bode mel dosti placa kaj v jega zidejo se fabrike štere gospon Horvat ima na pameti. Kak smo več rekli ne rastejo sam hale nek i plače, kak se to lepo i po štacunski veli, furt raste i standard težakov. Nega ruon čuda fabriki v Lepoj našoj štere imajo prosječno plačo prek deset jezer kuni, a nišči nema menšo od jezero ojeri. Tehnix je postal poznati ne sam v Međimorjo, ne sam v Lepoj našoj nek i v celoj Evropi, Tehnix je Mercedes v Evropi kaj se dotikavle smetja, brige o smetjo i pospravljanjo smetja, očem reči, on nam pomaže kaj čisto i zdravo živimo. Kaj reči, saka čast gospono Đurijo i jegovim dečkima i kapa do zemlje.
Srečnoga, veseloga i blagoslovlenoga Božiča vam želem kaj nam mali Isusek donese zdraviče i strpleje za novo leto štero nas za voglom čaka!
