16.7 C
Čakovec
Petak, 29 ožujka, 2024

Spomenik Zrinske garde v Bečkom Novigrado

Pobjedniki  pišejo  i prekrajajo ono kaj  se  pripetilo

Sako leto dok nam dojde nekši den šteri je vezan za povjest  štera je saki den se dale od nas i navek zazvedimo nekaj novoga kaj smo do ve ne znali. Ne sam da smo mi ne znali nek je nišči ne znal, a furt dohajajo, kak se to veli, „nekši novi klinci“ šteri pred nas donašajo furt nekaj novoga, svojega. Tak so naši antifašisti cirka pred dvajsti dni obilježili den oslobođenja Međimorja od Mađarov, Nemcov, ustašov, nacistov i drugih fašistov i dohajaje komunistov šteri so unda vedrili i oblačili četrdesetpet let. Zazvedili smo kak so Međimorje oslobodili Bugari od strane Kotoribe, Vidovca i Priloka, a Rusi so došli z Belice i Prislavca restirali Mađare i Nemce i oslobodili Čakovca. Letos smo zazvedili kak so došli i partizani šteri so preplavali Dravo pre Novi Seli i pomogli Črlenoj vojski. Još nam je nigdar nišči ne rekel da so došli partizani i zakaj se den oslobođenja Međimorja oboležavle šestoga aprila, a bitka za Štrigovo je bila šesnajstoga aprila? Kak da Štrigova i jeni hatar ne spada v Međimorje, a tu rastejo i pijejo se nejbolša vina na sveto. I još nekaj, nigdar smo ne točno zazvedili da so došli partizani z Kalnika v Međimorje i koga so oni točno našli na našemo falačko zemle med dvemi vodami i koga so natirali, posle štiri leti okupacije, dimo. Mi smo se negda vučili v školama o Međimorskomo partizanskomo odredo i pred nas so metali karte o potima i stezama partizana 1945.leta. Ve dok čovek pogledne te karte i denešje karte za turiste i one so čistam iste, očem reči, partiztani so negda hodali točno po potima po šterima denes idejo vinske ceste.

Najgerek sam da so itak partizani „preplavali“ Dravo v Novi Seli i da so došli reda delat k nam v Međimorje? Pitam to sebe, pitam vas i se druge jerbo i moj japa i moj stric so bili partizani, ali oni so dimo došli pred kraj aprila, negdi okoli Jurjeva, a bili so pre mladi kaj bi bili meli šoce vu Vulariji ili pak v Novi Seli. Nišči mi je  to ne znal reči, a več ga jape, a niti strica hajdi dugo ne na ovom sveto.

Još nekaj, si znamo da so za vreme Drugoga rata v Međimorjo hercuvali Mađari i da so oni zbrisali pred Bugarima i Rusima, a još se je ne zazvedilo što je kriv za onih prek devecto ljudi, naših Međomorcov, šteri so završili pod zemljom, očem reči, po grabama i jarkima v Kotoribi, na Sepo pre Gornjemo Hraščano, v Ksajpi polek Svete Jelene ili pak v Štrigovi? Ruon tak je ne znati zakaj so naši ljudi bili v rešto v Staromo grado i de so završile jive kosti? Hajdi je cajta minulo, skorom osemdeset let pak je več skradja vura kaj bi i mi zazvedili kaj se je pravzaprav pipetilo na našem falačko zemle na krajo drugoga rata?

Još 1946.leta je Winston Čerčil rekel: Fašizam bode se črez jeno vreme počel zvati antifašizam!.

Kuliko  pot  naš  kokot  zakukuriče  črez  leto???

Si šteri smo šteli meli smo priliko čuti kak je apostol Peter zatajil Jezuša i to tri pot zaredom i mam posle kak je Peter zgrešil kokot je zakukurikal i to tri pot. Peter si je odma v pamet zel kaj mo je Jezuš rekel da ga bode zatajil i to tripot predi nek kokot zakukuriče. Kak je Jezuš rekel tak se je i pripetilo. Rečite mi, prosim vas lepo, kuliko pot bi naš kokot črez leto zakukurikal da bi saki pot kukurikal dok mi napravimo kaj se ne dela, kaj se nesme, očem reči, dok mi zgrešimo. Najbrž bi bilo jako teško najti takšega kokota šteri bi mogel furt kukutikati. Ne verjem da mi tak malo grešimo kaj bi jeden kokot mogel to se foljgati. Za Petrov greh si znamo, si so zazvedili, a za naše grehe sam mi znamo jerbo naš kokot je pre leni da bi navek zakukurikal dok zgrešimo. Ili pak mi preveč grehov delamo?

Znate kak je to v živlenjo:: navek se najde jeden Peter šteri nas bode zatajil, jeden Juda šteri nas bode izdal i jeden Poncije Pilat šteri nas bode osudil… A posle si si tri skupa ruke operejo kak da se nikaj ne pripetilo.

Kumi se nej smeli baviti z politikom???

Zazvedili smo da so se v našoj Međimorskoj županiskoj skupštini zišli kumi sake fele, nekaj običnih, nekaj krsnih, nekaj fermanih, nekaj gostuvanjskih, a nejveč križovatih. Nekaj sam si gruntal o tomo kak se svadijo na sesijaj kak da nemajo drugoga posla. Ne znati je li je biti nekomo kum greh ili sukob interesa jerbo biti nekomo kum je ne i nebre biti greh, a niti sramota. Najbrž bi trelo dok bodemo znova išli glase davat kaj se na listeke napiše što je komo kum pak se unda nek biračko telo odredi je li bode nekomo dalo glasa ili pak ne bode? Kak je biračko telo krivo za se tak unda bode i za to, očem reči, ak bode naše međimorsko biračko telo zebralo kume za političare unda nišči ne bode smel nekomo bajati i na red ga pobirati sam zato kaj je nekomo kum. Verjem da se vi slažete z menom?!

Spomenik Petru Zrinskomo i Frano Krsti Frankopano

      Pred tri leti je čakoska Zrinska garda postavila v Bečkomo Novigrado spomenika našim hrvackim mučenikima Petru i Frano i to na mesti de so jim, pred 351 leto, odsekli glave jerbo so se pobunil protiv apsolutizma gazdi v Bečo. Spomenika je napravil naš čakoski kipar Miha Štebih, a pomogli so ga postajti v gracki park v Bečkomo Novigrado naši gradiščanski Hrvati. Te spomenik je trebal bit otkriti lani na 350-to obletnico mučeničke smrti, ali je korona to ne dopustila. No, verjem da se letos nikaj ne bode pripetilo do nedele i da bode spomenik ovo nedelo ugledal, kak se to veli, svetlo dneva. Rekli smo več da je hajdi cajta minulo od kak so Petar i Fran svoje živote dali za naše bolše zutra i da smo se mi jim, kak god kesno, odužili za jivo žrtvo i da jiv nesmo pozabili. Ono za kaj so se oni borili pred nekaj vejč od tristo let uspeli so ostvariri naši branitelji v Oluji 1995.leta.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE