Je li bodo naši vnuki pak hodali vu vojsko?
Več se hadji dugo pripoveda o tomo kak naša deca i naši vnuki bodo morali znova iti vu vojsko jerbo naši sosedi so pak počeli ne sam gledati prek meje k nam v Lepo Našo nek i znova halosijo kaj bi mejo zrivali na ono negdašjo crto, štero so si sami narisali i štero od negda sejajo, Virovitica – Karlovac – Karlobag. Tak je bilo i negda, pred nekaj vejč od tridesti let i neso dugo zmagadili nek so se skompali z jugosoldateskom, z negdašjom “narodnom vojskom” seli so se v reoplane, samohotke, tenke i se drugo kaj jim je došlo pod roko i genuli so prema meji Lepe naše. Neje to tak zdavnja bilo pak se još dobro zmislimo kak so se nejpredi otpelali do Dežele, a unda so se vrnuli nazaj i ostali so štiri leti prinas v Lepoj našoj, ali so naši braniteli ne hitili puške v kuruzo nek so četnike i “narodno vojsko” sforšibali nazaj otkod so i došli. Kak sam rekel, minulo je tridesti let i pak se nekaj kuha pre našim sosedima, a čim je tam ne kak treba moramo se i mi prepravljati kaj se nej pak nekaj pripetilo kaj nečemo i kaj nam ne paše. Kaj peške kaj z traktorima. Poglečte sam, čim smo mi kupili šest reoplanov od Francozov mam se i naši sosedi spominajo kak i oni morajo nabajti nove reoplane, nove tenke, samohotke, zrakomlate kak da smo jiv z našimi Rafaleima v rit pehnoli. Mortik so jiv ne tuliko pehnoli naši novi reoplani nek naši spominki o tomo kak bodemo našo deco znova morali pošiljati vu vojsko i kaj bodo se tam prepravljali za „nedaj Božek“ posjeto na tenkima okinčenim z cvetjom. Bole da se prepravimo i nikaj ne bode nek da mirno spimo, a unda nas sirene zbudijo dok več sosedovi tenki i reoplani prejdejo prek naše meje.
Naši sosedi, ruon tak, kanijo kupiti nove reoplane, ali oni jiv nabavljajo od Rusije, a Rusi ve nemajo cajta delati za druge jerbo i oni jiv nucajo v Ukrajini. Štel bi reči sosedima četnikima šteri zunova halosijo prek meje na naš hatar nek si ne pozabijo nabaviti i jeno dvjesto novih traktorov. Kuliko se zmislimo traktori so jim bili od nejvekšega hasna pred nekaj vejč od tridesti let.
Si se “falijo” sam župan je stiha
Več hadji dugo se spominamo o novim vekšim plačama naših političarov. Nejglasneši o tomo so pajdaši za šankom jerbo dok si čovek vleje v sebe par kupici “kerozina” unda je nejspametneši i se nejbole zna. A i kuražen je. Za šankom so nejvečpot moški, a žene se o političkim, bračnim i vunbračnim problemima spominajo posle nedeljne meše, a črez tjeden na mlekari, čehari, na kavici ili pak po štacunima. Nejpredi smo natepli državne političare jerbo so jim i plače nejbole skočile, a unda smo se spustili niže v grade ili pak opčine. Kuliko vidimo sima so plače išle gori, očem reči, sima onima šteri praznijo sakefele račune (čitaj: proračune), a nikomo od onih šteri jiv punijo. No, neso ruon si bili na dnevnomo redo jerbo se o županima, kak našemo tak i drugima, nikaj preveč ne pripoveda? Ne verjem da so sima plače išle gori, a župani so ostali na starima? Zazvedili smo kak je ve čakoska gradonačelnica došla na to kaj saki mesec dobi kuvertlina z pet jezer ojeov tak da ne verjem da naš župan ima meje, a poznato nam je da je župan za štengo višeši od gradonačelnikov i načelnikov pak bi unda bilo nekak i red ak so sima išle plače gori da je unda i župan vu svojemo kuvertlino našel bar malo vekšega kupčeka penez nek je to do ve bilo. Najbrž je tak, ali smo mi to još ne zavedili.
I penziči štečijo…
Čim so se penziči pobunili mam je premijer, Drašek Plenkovičov, našel negdi rezervni kupček penez i obečal je penzičima da ne morajo zdigati halabuko jerbo kani zdiči i penzije. Nebrem reči, lepe peneze je AP obečal penzičima, a dok je to govoril čistam se ozbiljno držal tak verjem da kani i dati se ono kaj je obečal. Moremo reči da so cene sega odišle dosti gori pak da je državna kasa dosti več i kaserala prek pedevea tak da AP more i nekaj toga podeliti penzičima jerbo mo je čuda bole to nek se bode žnjimi svadil. Pak morajo i penziči od nečega živeti. Kaj ne bode AP posle rekel da sam ga ne spomenul: najme kaj, kuliko god bode AP zdigek penzije penziči bodo na precedničkim izborima svoje glase dali Zokijo Milanovičo. Znajo penziči kak to farizeji delajo!
Sveti Remoš se vrnul vu Štrigovo!
Dok je korona hercuvala po ovomo našemo sveto, a tak i po ovomo našemo “Falačko zemle med dvemi vodami” retko se je i jako stiha mogla čuti istina kak se je sveti Remoš (čitaj: Jeronim) rodil vu našoj Štrigovi, štera se je negda zvala Stridon. Kak da so naši Štrigovčanci, a i mi Međimorci fpešali i prestali se boriti za našega Remoša? Dok smo mi bili stiha Dalmoši so svetomo Jeronimo dali Splicko-dalmatinsko županijo, a i splickoga aerodroma tak da je zgledalo kak da smo mi Dalmošima priznali da je sveti Jeronim jiv. Pak nebremo si navijati ili pak zavijati za Hajduka makar sam on živi zanavek. Na tretji mesti. Ali ne, ovo leto na Remušovo, zadjega septembra, sveti Remuš se je vrnol nazaj vu svoje rodno mesto, vu svoj rodni Stridon, svojo Štrigovo. Nejpredi smo zafalili našim Dalmošima kaj so županijo i aerodroma nazvali po našemo Međimorco, a unda smo jiv zmislili kak je v četrtomo stoletjo, da se je sveti Jeronim narodil (347. leta), Dalmacija bila do Drave i Mure i zato je Jeronim bil Dalmatinec, a za ovo Remušovo godovno je profesor doktor i monsinjor Matija Berljak, međimorec z Cirkovljana, izdal knigico-vodiča za Štrigovo – mesto rođenja svetoga Jeronima, a naša Čakoska Matica, je skupa z naši međimorskim županom nakanila snimiti filma o svetomo Jeronima i to po scenario šteroga je napisala, naše čakosko zlatno naliv-pero, Kristina Štebih. To je još ne se, sosedi Janezi na čelo z murskosobočkim biškupom so priznali da je v Štrigovi (Stridono) rođen sveti Jeronim, a štrigoski župnik je jako lepo rekel kak je “sveti Remoš naše fare sin”. Neje nikaj zaostal niti štrigoski opčinski načelnik, Rebernik, on je lepo rekel da je Štrigova dom vina i domovina svetog Jeronima. Bil bi on rekel svetoga Remoša, ali unda nej bila rima, a dok je proščeje v opčini i fari unda je čuda lepše dok je rima. Dok ve to znuomo kaj se je pripetilo vu Štrigovi vu ove Dneve svetoga Remoša unda moramo priznati da je za nas Međimorce, kaj se svetoga Remoša (čitaj: Jeronima) dotikavle korona ipak mela nekšega hasna.
